សម្តេច ម៉ែន សំអន ប្រកាសតែងតាំង លោកជំទាវ ជា សុផាកន្នី ជាប្រធានកិត្តិយស សាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងបរិស្ថាន

ភ្នំពេញ៖ នារសៀលថ្ងៃអង្គារ៍ ៣កើត ខែផល្គុន ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១២ ខែមីនា ឆ្នាំ២០២៤ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា បានអញ្ជើញអធិបតីក្នុងពិធីជួបសំណេះសំណាលជាមួយសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងបរិស្ថាន ដើម្បីអបអរសាទរ ខួបលើកទី១១៣ ទិវាអន្តរជាតិនារី ៨ មីនា ២០២៤ ក្រោមមូលបទ «ស្រ្តីនិងក្មេងស្រីក្នុងបរិវត្តកម្មឌីជីថល» ដែលបានរៀបចំឡើងនៅសណ្ឋាការកាំបូឌីយ៉ាណា រាជធានីភ្នំពេញ។

ថ្លែងក្នុងឱកាសនោះ សម្តេចកិត្តិសង្គហបណ្ឌិតបានពាំនាំនូវការផ្តាំផ្ញើសាកសួរសុខទុក្ខនិងសេចក្តីនឹករលឹកពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងជាប្រធានកិត្តិយសសមាគមនារីកម្ពុជាដើម្បីសន្តិភាពនិងអភិវឌ្ឍន៍ និងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជូនដល់សមាជិក-សមាជិកាទាំងអស់ដែលបានអញ្ជើញចូលរួមក្នុងកម្មវិធីថ្ងៃនេះ។

សម្តេចកិត្តិសង្គហបណ្ឌិត ក៏បានថ្លែងកោតសសើរនិងវាយតម្លៃខ្ពស់ដល់ ឯកឧត្តម អ៊ាង សុផល្លែត និងថ្នាក់ដឹកនាំគ្រប់វិស័យ គ្រប់លំដាប់ថ្នាក់ រួមទាំងថ្នាក់ដឹកនាំនិងសមាជិកាសមាគមនារីដែលសហការ សាមគ្គីគ្នាបំពេញភារកិច្ចមិនរួញរាចំពោះការលំបាក នឿយហត់ ដើម្បីសម្រេចបាននូវសមិទ្ធិផលដ៏ធំធេងគួរជាទី មោទនៈនេះ។

ទន្ទឹមនឹងនេះ សម្តេចកិត្តិសង្គហបណ្ឌិត ក៏សូមអបអរសាទរចំពោះលោកជំទាវ លោកជំទាវ ជា សុផាកន្នី ដែលត្រូវបានប្រកាសជាប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ក្រសួងបរិស្ថាន។

សម្តេចសង្ឃឹមយ៉ាងមុតមាំថា លោកជំទាវ និងសមាជិការដែលបានប្រកាសក្នុងថ្ងៃនេះ នឹងខិតខំប្រឹងប្រែងអស់ពីសមត្ថភាព កម្លាំងកាយចិត្ត ប្រាជ្ញាស្មារតីដឹកនាំសមាជិកាទាំងអស់អនុវត្តឲ្យបានជោគជ័យធំធេងថែមទៀត នូវទិសដៅភារកិច្ចក៏ដូចជា លក្ខន្តិកៈរបស់សមាគមនារី និងការងារស្នូលរបស់ក្រសួងបរិស្ថាន និងជឿជាក់យ៉ាងមុតមាំថាឯកឧត្តម អ៊ាង សុផល្លែត និងបន្តជួយគាំទ្រដល់គណៈកម្មការសាខាសមាគមនារីក្រសួងបរិស្ថានឲ្យមានលទ្ធភាពបំពេញ ភារកិច្ចបានកាន់តែទូលំទូលាយថែមទៀត។

សម្តេចកិត្តិសង្គហបណ្ឌិតបានលើកឡើងទៀតថា ៖ បច្ចុប្បន្ននេះ ដោយសារតែមានការរីកចម្រើននៃវិស័យបច្ចេកវិទ្យាគមនាគមន៍ និងព័ត៌មានវិទ្យា ដែលវិស័យនេះបានដើរតួនាទីកាន់តែសំខាន់សម្រាប់ជួយសម្រួល ដល់ការប្រាស្រ័យទាក់ទងគ្នាដល់មនុស្សជុំវិញខ្លួន និងជុំវិញពិភពលោក និងបានជួយគាំទ្រដល់ការ កិច្ចអភិវឌ្ឍសេដ្ឋកិច្ច-សង្គមលើគ្រប់វិស័យ។ ប៉ុន្តែ នៅក្នុងបរិវត្តកម្មឌីជីថលនេះ មានមនុស្សជាច្រើន ជាពិសេសស្ត្រី និងក្មេងស្រី អាចនឹងក្លាយជាជនរងគ្រោះ ដោយសារការលួងលោម និងចាញ់ល្បិចបោកប្រាស់ និងសមត្ថភាពនៃការយល់ដឹងបច្ចេកវិទ្យានៅទាប ខ្វះការវិភាគ និងការពិចារណា ឬ ខ្វះការការពារពីក្រុមគ្រួសារ និងសង្គមជាតិ ដូចជា ការឆបោកតាមប្រព័ន្ធឌីជីថល ការជួញដូរស្ត្រី-ក្មេងស្រី និងការបៀតបៀនតាមរូបភាពផ្សេងៗ ដែលធ្វើឱ្យប៉ះពាល់ដល់តម្លៃស្ត្រីខ្មែរជាដើម ៕