មន្ត្រីជាន់ខ្ពស់ក្រសួងទេសចរណ៍៖ កម្ពុជាជាគោលដៅទេសចរណ៍ ដែលផ្តល់ភាពកក់ក្តៅ ប្រកបដោយភាពទាក់ទាញ សម្រាប់ទេសចរមូស្លីម
ភ្នំពេញ៖ កាលពីព្រឹកថ្ងៃទី ៧ ខែមីនា ឆ្នាំ២០២៤ ឯកឧត្តម ទិត ចន្ថា រដ្ឋលេខាធិការប្រចាំការ តំណាងដ៏ខ្ពង់ខ្ពស់ ឯកឧត្ដម សុខ សូកេន រដ្ឋមន្ត្រីក្រសួងទេសចរណ៍ បានចូលរួមជាអធិបតីក្នុងវគ្គបណ្តុះបណ្តាល អំពីនិន្នាការ និងតម្រូវការ របស់ទេសចរមូស្លីម ដល់ភាគីពាក់ពន្ធក្នុងវិស័យទេសចរណ៍។
វគ្គបណ្តុះបណ្តាលនេះក៏មានការចូលរួមពីសំណាក់ ឯកឧត្ដម ងូវ សេងកាក់ អភិបាលរង តំណាង ឯកឧត្តម ប្រាក់ សោភ័ណ្ឌ អភិបាល នៃគណៈអភិបាលខេត្តសៀមរាប គណៈអុីមាំខេត្តសៀមរាប វិស័យឯកជននៃឧស្សាហកម្មទេសចរណ៍ក្នុងតំបន់ខេត្តសៀមរាប និងភាគីពាក់ពន្ធក្នុងវិស័យទេសចរណ៍មួយចំនួនទៀត នៅសណ្ឋាគារ អង្គរសេនជូរី ក្រុងសៀមរាប ខេត្តសៀមរាប ។
ថ្លែងក្នុងវគ្គបណ្តុះបណ្តាល ឯកឧត្ដម ទិត ចន្ថា បានគូសបញ្ជាក់អំពី សក្តានុពល នៃទេសចរណ៍មូស្លីម ដែលក្រសួងទេសចរណ៍ចាត់ទុកជាទីផ្សារមួយដ៏សំខាន់សម្រាប់គោលដៅកម្ពុជា ។
ឯកឧត្ដម បានគូសបញ្ជាក់ថា ដោយសារកត្តាសុខសន្តិភាព ស្ថេរភាព និងគោលនយោបាយសុខដុមនីយកម្ម តាំងពីដេីមរៀងមក ក្រោមមគ្គុទ្ទេសក៍ដឹកនាំដ៏ត្រឹមត្រូវ និងឈ្លាសវៃ របស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ក៏ដូចជាការបន្តដឹកនាំប្រកបដោយភាពបុិនប្រសប់ និងស្វាហាប់ របស់រាជរដ្ឋាភិបាលក្នុងអណត្តិទី៧ នៃរដ្ឋសភានេះ ដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានធ្វេីអោយកម្ពុជាក្លាយជាប្រទេសដែលមានភាពលេចធ្លោមួយ ទៅកាន់ពិភពនៃបណ្តាប្រទេសឥស្លាម ។ កិច្ចការនេះសមស្របជាមួយនឹងការដាក់ចេញនូវគំនិតផ្តួចផ្តើម របស់ឯកឧត្ដម សុខ សូកេន បង្កេីន៥ អភិវឌ្ឍ៣ (BUILD+3Ds) និងផែនការអភិវឌ្ឍន៍ទេសចរណ៍មូស្លីម របស់ក្រសួងទេសចរណ៍ បានដាក់ចេញកន្លងមកផងដែរ ដែលនឹងធ្វេីអោយកម្ពុជា ជាគោលដៅដែលផ្តល់ភាពកក់ក្តៅ និងភាពទាក់ទាញសម្រាប់ទេសចរមូស្លីម ។
ឯកឧត្ដម កាទេី មហាំម៉ាត់ណោសស្រុី រដ្ឋលេខាធិការ និងជាប្រធានក្រុមការងារទេសចរណ៍មូស្លីម នៃក្រសួងទេសចរណ៍ បានប្រាប់ឲ្យដឹងថា ដោយសារភ្ញៀវមូស្លីម ពួកគាត់មានតម្រូវការមួយចំនួនដូចជា ម្ហូបអាហារហាឡាល, ការបដិសណ្ឋារកិច្ច និងការផ្តល់សេវាកម្ម បែបមូូស្លីម…ជាដេីម ទាមទារឲ្យវិស័យឯកជន ភាគីពាក់ពន្ធក្នុងវិស័យទេសចរណ៍ យល់ដឹងអំពីនិន្នាការ និងតម្រូវការភ្ញៀវមូស្លីម ។ ដូច្នេះវគ្គបណ្តុះបណ្តាលនេះសំខាន់ណាស់ គឺមានបំណងចង់ឲ្យវិស័យឯកជន និងភាគីពាក់ពន្ធក្នុងវិស័យទេសចរណ៍បានយល់ដឹងអំពីតម្រូវការរបស់ភ្ញៀវមូស្លីម ដេីម្បីងាយស្រួលឲ្យមូលដ្ឋានអាជីវកម្មរបស់ពួកគាត់ បានរៀបចំទទួល បដិសណ្ឋារកិច្ចល្អប្រសេីរ ជូនដល់ទេសចរមូស្លីម ជាពិសេសគោលដៅខេត្តសៀមរាប ដែលជាគោលដៅដ៏សំខាន់សម្រាប់ព្រះរាជាណាចក្រកម្ពុជា។
ឯកឧត្ដមប្រធានក្រុមការងារបានបន្ថែមថា ការទាក់ទាញទេសចរមូស្លីម មិនត្រឹមតែជំរុញកំណេីនទេសចរណ៍ប៉ុណ្ណោះទេ ប៉ុន្តែវាថែមទាំងជួយជំរុញការវិនិយោគ ជាពិសេសការវិនិយោគលេីវិស័យហាឡាល ដែលកម្ពុជាជាប្រទេសមានសក្តានុពលស្រាប់ទាំងវិស័យកសិកម្ម និងឧស្សាហកម្ម ផងដែរ៕
