អភិបាលខេត្តស្ទឹងត្រែង បញ្ជាឱ្យបញ្ឈប់នូវការបំផុសបំផុលចលនា រុករានដីព្រៃ កាន់កាប់ និងបែងចែកដីនៅក្នុងតំបន់សហគមន៍ព្រៃឈើ តំបន់ព្រៃលិចទឹក និងតំបន់ដីព្រៃឈើសហគមន៍

ភ្នំពេញ៖ ឯកឧត្ដម ស្វាយ សំអ៊ាង អភិបាលខេត្តស្ទឹងត្រែង និងក្នុងនាមគណៈកម្មការដើម្បីទប់ស្កាត់ និងបង្ក្រាបបទល្មើសធនធានធម្មជាតិថ្នាក់ខេត្ត បានដាក់ចេញបទបញ្ជាឱ្យបញ្ឈប់នូវរាល់ការបំផុសបំផុលចលនា ទោះនីតិបុគ្គល ឬរូបវ័ន្តបុគ្គលណាក៏ដោយ ក៏ពុំមានសិទ្ធិរុករានដីព្រៃ កាន់កាប់ និងបែងចែកដីនៅក្នុងតំបន់សហគមន៍ព្រៃឈើ តំបន់ព្រៃលិចទឹក តំបន់ដីព្រៃឈើសហគមន៍ និងនៅក្នុងតំបន់ការពារធម្មជាតិនោះទេ។

តាមរយៈសេចក្តីជូនដំណឹងស្តីពី វិធានការទប់ស្កាត់ និងបង្ក្រាបការកាប់រាន ដុត ឈូសឆាយ និងហ៊ុមព័ទ្ធដ៏ព្រៃឈើ ដីព្រៃលិចទឹក និងដីតំបន់ការពារធម្មជាតិ ដើម្បីវាតយកដីធ្វើជាកម្មសិទ្ធិ នៅក្នុងភូមិសាស្ត្រខេត្តស្ទឹងត្រែង នៅថ្ងៃទី៥ ខែកុម្ភៈ ឆ្មាំ២០២៤ ឯកឧត្ដម ស្វាយ សំអ៊ាង បានបញ្ជាក់ថា “តំបន់សហគមន៍ព្រៃឈើ តំបន់ព្រៃលិចទឹក និងតំបន់ការពារធម្មជាតិ មួយចំនួនស្ថិតនៅក្នុងភូមិសាស្ត្រខេត្តស្ទឹងត្រែង គឺមានបុគ្គលមួយចំនួនបានធ្វើការបំផុសបំផុលចលនាឲ្យធ្វើការ កាប់រាន ដុត ឈូសឆាយ រុករាន ទន្ទ្រាន ហ៊ុមព័ទ្ធ បែងចែកកាន់កាប់ដីព្រៃឈើ ដីព្រៃលិចទឹក ដីតំបន់ការពារធម្មជាតិ ការទិញ-លក់ដីរដ្ឋ និងការបញ្ជាក់ទិញ-លក់លើដីរដ្ឋដោយខុសច្បាប់ ដើម្បីវាតយកធ្វើជាកម្មសិទ្ធិនៅបន្តកើតមាន ក្រោមលេសខ្វះដីអាស្រ័យផល ឬបង្កបង្កើនផល និងលេសថាមានការកាត់ឆ្កៀលដីសម្រាប់ឱ្យសហគមន៍ប្រើប្រាស់ អាស្រ័យផល”។

ទន្ទឹមនិងនោះឯកឧត្ដមបានណែនាំឱ្យបញ្ឈប់នូវរាល់សកម្មភាពល្មើសច្បាប់ដូចជា ការឈូសឆាយ កាប់ឆ្ការ ដុត រុករាន ទន្ទ្រាន ហ៊ុមព័ទ្ធ បែងចែកដីព្រៃឈើ ដីព្រៃលិចទឹក និងការដាំដុះដំណាំលើដីសហគមន៍ព្រៃឈើ ដីព្រៃលិចទឹក និងដីក្នុងតំបន់ការពារធម្មជាតិ។

បន្ថែមពីនេះឯកឧត្ដមបានឱ្យបញ្ឈប់រាល់ការទិញ-លក់ដីរដ្ឋ និងការបញ្ជាក់ការទិញ-លក់លើដីរដ្ឋដោយខុសច្បាប់ នៅក្នុងតំបន់សហគមន៍ព្រៃឈើ តំបន់ព្រៃលិចទឹក តំបន់ដីព្រៃឈើ និងដីក្នុងតំបន់ការពារធម្មជាតិ។

ជាមួយគ្នានោះឯកឧត្ដមអភិបាលខេត្ត បានណែនាំដល់អាជ្ញាធរមូលដ្ឋាន ជាពិសេសមេភូមិ មេឃុំ-ចៅសង្កាត់ និងរដ្ឋបាលក្រុង-ស្រុក និងមន្ទីរ-អង្គភាពជំនាញ ត្រូវបញ្ឈប់នូវរាល់ការបញ្ជាក់លើលិខិតទិញ-លក់ដីរដ្ឋ ការផ្ទេរសិទ្ធិ ឬបញ្ជាក់លើប្លង់បង្ហាញ ទីតាំងដីនៅក្នុងតំបន់សហគមន៍ព្រៃឈើ តំបន់ព្រៃលិចទឹក តំបន់ដីព្រៃឈើ និងតំបន់ការពារធម្មជាតិនិងត្រូវនិរាករណ៍រាល់លិខិតបញ្ជាក់ទិញ-លក់ដីរដ្ឋ ការផ្ទេរសិទ្ធិ ឬបញ្ជាក់លើប្លង់បង្ហាញទីតាំងដី៕