ឯកឧត្តម ចាន់ ស៊ីណាត ដឹកនាំកិច្ចប្រជុំស្តីពីការរៀបចំនិងអនុវត្តន៍នូវយុទ្ធសាស្ត្រគ្រប់គ្រងវិស័យធនធានទឹក និងឧតុនិយម ក្នុងភូមិសាស្ត្រខេត្តបន្ទាយមានជ័យ
ភ្នំពេញ៖ ឯកឧត្តម ចាន់ ស៊ីណាត រដ្ឋលេខាធិការក្រសួងធនធនទឹក និងឧតុនិយម បានអញ្ជើញដឹកនាំកិច្ចប្រជុំបន្ទាន់មួយស្តីពីការរៀបចំ និងអនុវត្តន៍នូវយុទ្ធសាស្ត្រគ្រប់គ្រងវិស័យធនធានទឹក និងឧតុនិយមនៅតំបន់បឹងទន្លេសាបក្នុងភូមិសាស្ត្រខេត្តបន្ទាយមានជ័យ នាសាលប្រជុំនៃមន្ទីរធនធានទឹក និងឧតុនិយមខេត្តបន្ទាយមានជ័យ។
សូមជម្រាបថា កិច្ចប្រជុំនេះមានការចូលរួមពីប្រធាន អនុប្រធាន មន្ត្រីពាក់ព័ន្ធ នៃមន្ទីរធនធានទឹក និងឧតុនិយមខេត្តបន្ទាយមានជ័យ លោកអភិបាលរងនៃគណៈអភិបាលខេត្តបន្ទាយមានជ័យ លោកអភិបាល អភិបាលរងនៃគណៈអភិបាលស្រុកព្រះនេត្រព្រះ និងស្រុកមង្គលបូរី និងលោកមេឃុំទាំងអស់ នៃស្រុកទាំងពីរនេះ។
ឯកឧត្តមរដ្ឋលេខាធិការបានមានប្រសាសន៍ឱ្យដឹងថា ការប្រជុំនេះគឺផ្តោតជាសំខាន់លើការរៀបចំ និងអនុវត្តន៍នូវយុទ្ធសាស្ត្រគ្រប់គ្រងវិស័យធនធានធានទឹក និងឧតុនិយម ដែលក្រសួងនឹងដាក់ចេញនាពេលដ៏ខ្លីខាងមុខឱ្យបានម៉ឺងម៉ាត់តាមចក្ខុវិស័យដែលបានកំណត់ក្នុងច្បាប់ស្តីពីការប្រព្រឹត្តទៅរបស់ក្រសួង ក្នុងការបញ្ជាទឹក និងប្រើប្រាស់ទឹកឱ្យបានត្រឹមត្រូវច្បាស់លាស់នៅក្នុងតំបន់បឹងទន្លេសាប។
ទន្ទឹមនឹងនេះ ឯកឧត្តមរដ្ឋលេខាធិការបានលើកឡើងថា អ្វីដែលសំខាន់គឺធ្វើយ៉ាងណាឱ្យបឹងដ៏ធំមួយនេះបម្រើនិងបំពេញឱ្យបាននូវសុវត្ថិភាពនិងសន្តិសុខទឹកសម្រាប់បំពេញសេចក្តីត្រូវការជាប្រចាំរបស់បងប្អូនប្រជាពលរដ្ឋក្នុងការបង្កើនទំនើបកម្មប្រពលវប្បកម្មលើគ្រប់ផលិតកម្ម ក្នុងបរិបទដែលកំពុងប្រឈមនឹងការប្រែប្រួលអាកាសធាតុ ឱ្យនៅតែមាននិរន្តរភាព ព្រមទាំងជំរុញជាវិជ្ជមានដល់កំណើនសេដ្ឋកិច្ចនៃប្រទេសកម្ពុជា។
កិច្ចការនេះក៏នឹងជួយបង្កើននូវអេកូទសចរណ៍របស់ប្រទេសបានច្រើន បង្កើនបរិស្ថានស្រស់បំព្រងជាមួយនឹងការអភិរក្សសត្វនិងរុក្ខជាតិគ្រប់ប្រភេទ និងការពារឱ្យបានលើគ្រប់ការបំពានទន្ទ្រានខុសច្បាប់លើតំបន់ដីសើមរបស់បឹងទន្លេសាប។
ឯកឧត្តមរដ្ឋលេខាធិការបញ្ជាក់ថា ក្រសួងធនធានទឹក និងឧតុនិយមនឹងធ្វើការសាងសង់នូវសណ្តភ្លឺសងខាងប្រឡាយព្រំ ដើម្បីធ្វើជាព្រំឱ្យបានច្បាស់លាស់រវាងតំបន់២ និងតំបន់៣ សម្រាប់ធ្វើការផ្គត់ផ្គង់ទឹក គ្រប់គ្រងទឹក និងបញ្ជាទឹកជូនបងប្អូនប្រជាពលរដ្ឋក្នុងតំបន់២ ដែលកំពុងអាស្រ័យផលឱ្យមានទឹកគ្រប់គ្រាន់សម្រាប់បម្រើឱ្យជីវភាពរស់នៅប្រចាំថ្ងៃ និងជាផ្លូវគមនាគមន៍តាមផ្លូវទឹកដ៏មានប្រសិទ្ធភាព៕
