សាខាកាកបាទក្រហមកម្ពុជាខេត្តសៀមរាប ទទួលស្វាគមន៍ដំណើរទស្សនកិច្ចផ្លាស់ប្តូរបទពិសោធន៍ របស់ប្រតិភូកាកបាទក្រហមកូរ៉េសាខាឆុងជឺ
លោកជំទាវ ទុយ ជិ អនុប្រធានគណៈកម្មាធិការសាខាកាកក្រហមកម្ពុជាខេត្តសៀមរាប នាព្រឹកថ្ងៃទី២៥ ខែមករា ឆ្នាំ២០២៤នេះ បានទទួលស្វាគមន៍ដំណើរទស្សនកិច្ចផ្លាស់ប្តូរបទពិសោធន៍របស់គណៈប្រតិភូកាកបាទក្រហមសាធារណរដ្ឋកូរ៉េសាខាឆុងជឺ ចំនួនប្រមាណ ៣០រូប ដឹកនាំដោយលោកស្រី គឹម ស៊ូអ៊ីយ៉ុន នៅទីស្នាក់ការសាខាកាកបាទក្រហមកម្ពុជាខេត្តសៀមរាប ។
លោកជំទាវ ទុយ ជិត បានឲ្យដឹងថា កាកបាទក្រហមកម្ពុជា ចាប់បដិសន្ធិនៅថ្ងៃទី១៨ ខែកុម្ភៈ ឆ្នាំ១៩៥៥ ដែលបច្ចុប្បន្នមានសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ គង់ប្រថាប់ជាព្រះប្រធានកិត្តិយ ។
លោកជំទាវ ទុយ ជិត បន្តថាក្រោមការដឹកនាំប្រកបដោយគតិបណ្ឌិតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បាននឹងកំពុងអនុវត្តបន្តនូវយុទ្ធសាស្ត្រ ២០២១-២០៣០ និង បានធ្វើឲ្យកាកបាទក្រហមកម្ពុជា ជាស្ថាប័ននាំមុខគេនៅកម្ពុជា ហើយបានក្លាយជាសមាគមជាតិ ដែលមានភាពម្ចាស់ការខ្ពស់ អនុវត្តនូវបេសកកម្ម ប្រមូលផ្ដុំកម្លាំងមនុស្សធម៌ ដើម្បីចូលរួមលើកកម្ពស់ជីវភាពជនងាយរងគ្រោះបំផុត និងជនរងគ្រោះ ដោយយកចិត្តទុកដាក់សំខាន់លើវិស័យអាទិភាពទាំង៤ គឺ៖ ១-ការគ្រប់គ្រងគ្រោះមហន្តរាយ វិបត្តិភ័យ និងការប្រែប្រួលអាកាសធាតុ , ២- សុខភាព និងការថែទាំសុខភាពសហគមន៍ , ៣-ការលើកកម្ពស់គោលការណ៍គ្រឹះ និងតម្លៃមនុស្សធម៌ និង ៤-ការអភិវឌ្ឍស្ថាប័ន ។
មានប្រសាសន៍ក្នុងឱកាសនោះ លោកស្រី គឹម ស៊ូអ៊ីយ៉ុន ប្រធានប្រតិភូកាកបាទក្រហមសាធារណរដ្ឋកូរ៉េសាខាឆុងជឺ បានថ្លែងអំណរគុណយ៉ាងជ្រាលជ្រៅចំពោះការធ្វើបទបង្ហាញរបស់សាខាកាកបាទក្រហមកម្ពុជាខេត្តសៀមរាប ដែលឆ្លុះបញ្ចាំងពីសកម្មភាពមនុស្សធម៌ មានលក្ខណៈស្រដៀងគ្នាទៅនឹងការងាររបស់កាកបាទក្រហមសាធារណរដ្ឋកូរ៉េផងដែរ។
សូមបញ្ជាក់ថា ការធ្វើដំណើរទស្សនកិច្ចផ្លាស់ប្តូរបទពិសោធន៍របស់គណៈប្រតិភូកាកបាទក្រហមសាធារណរដ្ឋកូរ៉េសាខាឆុងជឺមកខេត្តសៀមរាប មានរយៈពេល៣ថ្ងៃ គឺចាប់ពីថ្ងៃ២៣ដល់ថ្ងៃទី២៥ ខែមករាឆ្នាំ២០២៤ ។
ឱកាសនោះដែរលោកជំទាវ ទុយ ជិ និងគណៈប្រតិភូកាកបាទក្រហមសាធារណរដ្ឋកូរ៉េសាខាឆុងជឺ ក៍បានដាំកូនឈើទាលនៅក្នុងបរិវេណសាខាកាកបាទក្រហមកម្ពុជាខេត្តដើម្បីទុកជាអនុស្សាវរីយ៍ ៕
