ឧត្តមសេនីយ៍ត្រី សេង មហា ផ្ដាំផ្ញើដល់មេបញ្ជាការកងរាជអាវុធហត្ថស្រុកគិរីវង់ ដែលទើបតែងតាំងថ្មី ត្រូវដឹកនាំមន្រ្តីរបស់ខ្លួនបង្រ្កាបបទល្មើសផ្សេងៗ ដើម្បីរក្សាសន្តិសុខ សុវត្ថិភាពជូនប្រជាពលរដ្ឋ
ភ្នំពេញ៖ នារសៀលថ្ងៃសុក្រ ទី១៩ ខែមករា ឆ្នាំ២០២៤ លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ បានអញ្ជើញចូលរួមប្រកាសចូលកាន់មុខតំណែង លោកវរសេនីយ៍ត្រី ឈុន ប៊ុននឿន ជា មេបញ្ជាការមូលដ្ឋានកងរាជអាវុធហត្ថស្រុកគិរីវង់ថ្មី ជំនួស លោកវរសេនីយ៍ត្រី ម៉ាន់ សារី ដែលត្រូវទទលភារកិច្ចថ្មី នៅបញ្ជាការដ្ឋានកងរាជអាវុធហត្ថខេត្ត។
ពិធីនេះក៏មានការអញ្ជើញចូលរួមដោយ តំណាងលោកប្រធានក្រុមប្រឹក្សាស្រុក លោក សរ ឧត្តម អភិបាលរងស្រុកគិរីវង់ លោកវរសេនីយ៍ឯក ជា សុផល អធិការនគរបាលស្រុក លោកមេបញ្ជាការផ្នែកសឹករងស្រុក លោកមេឃុំ លោកមេប៉ុស្ដិ៍នគរបាល និងមន្រ្តីរាជការចំណុះរដ្ឋបាលស្រុកជាច្រើនចូលរួមផងដែរ។
ថ្លែងក្នុងឱកាសនោះ លោកឧត្តមសេនីយ៍ត្រី សេង មហា បានលើកឡើង ក្នុងនាមមេបញ្ជាការកងរាជអាវុធហត្ថខេត្ត សូមអបអរសាទរ និងកោតសរសើរវាយតម្លៃខ្ពស់ ចំពោះស្នាដៃដែល នាយទាហាន នាយទាហានរង នៃកងរាជអាវុធហត្ថខេត្តទាំងអស់ ក្នុងការបំពេញតួនាទី ភារកិច្ចបេសកម្ម ប្រកបដោយស្មារតីទទួលខុសត្រូវខ្ពស់ និងសម្រេចបានជោគជ័យជាទីមោទនៈកន្លងមក។
លោកមេបញ្ជាការ បានបន្ថែមថា ការប្រកាសផ្លាស់ប្តូរមុខតំណែងនាពេលនេះ បានបង្ហាញពីការយកចិត្តទុកដាក់ខ្ពស់ និងមានទំនុកចិត្តពី អគ្គមេបញ្ជាការ នៃកងយោធពលខេមរភូមិន្ទ និងនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស ចំពោះនាយអាវុធហត្ថ ដែលបានខិតខំបំពេញតួនាទី ភារកិច្ច មិនខ្លាចនឿយហត់ ហ៊ានធ្វើពលីកម្មគ្រប់បែបយ៉ាង ក្នុងការចូលរួមចំណែកការពារសន្តិសុខ និងរក្សាសណ្តាប់ធ្នាប់សាធារណៈ ដើម្បីបម្រើសេចក្តីសុខជូនប្រជាពលរដ្ឋ និងសង្គមជាតិ។
ក្នុងឱកាសនោះ លោកឧត្ដមសេនីយ៍ត្រី សេង មហា ក៏បានផ្ដាំផ្ញើដល់ លោកមេបញ្ជាការ ដែលទើបតែងតាំងថ្មី ត្រូវខិតខំប្រឹងប្រែងធ្វើការបន្តទៀតដើម្បី ដឹកនាំមន្រ្តីរបស់ខ្លួនបង្រ្កាបបទល្មើសផ្សេងៗ ក្នុងដែនដីរបស់ខ្លួន ដើម្បីរក្សាសន្តិសុខ សុវត្ថិភាពជូនប្រជាពលរដ្ឋ និងត្រូវគោរពអនុវត្តបទបញ្ជាធានាឱ្យបានការ បង្ក្រាបបទល្មើសធនធានធម្មជាតិ តាមទិសស្លោករបស់ កងរាជអាវុធហត្ថ ដែលដាក់ចេញដោយ នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស គឺ៖
ទី១.ចំពោះប្រទេសជាតិត្រូវតែបម្រើ
ទី២.ចំពោះប្រជាត្រូវតែការពារ
ទី៣.ច្បាប់ត្រូវតែគោរព
ទី៤.បទល្មើសត្រូវតែបង្ក្រាប។
លោកមេបញ្ជាការ បន្តថាក្នុងជាមន្ត្រីនគរបាលយុត្តិធម៌អាវុធហត្ថត្រូវតែក្ដោបព័ត៌មានឱ្យច្បាស់លាស់ មិនថាផ្នែកណាក៏ដោយ ដើម្បីបង្រ្កាបបទល្មើសផ្សេងៗ និងទប់ស្កាត់បានទាន់ពេលវេលា ៕
