ដាវ៉ូស៖ នាយករដ្ឋមន្ត្រីចិនលោក Li Qiang បានប្រាប់ក្រុមឥស្សរជននយោបាយ និងធុរកិច្ចរបស់ពិភពលោកនៅទីក្រុង Davos កាលពីថ្ងៃអង្គារ ទី១៦ ខែមករា ថា របាំងពាណិជ្ជកម្ម “រើសអើង” គឺជាការគំរាមកំហែងដល់សេដ្ឋកិច្ចពិភពលោក ប៉ុន្តែសហរដ្ឋអាមេរិកបានការពារការរឹតបន្តឹងរបស់ខ្លួនលើមីក្រូឈីបជាវិធានការសន្តិសុខជាតិ។
ការកត់សម្គាល់របស់លោក Li បានកើតឡើងនៅពេលដែលសន្និសីទប្រចាំឆ្នាំលើកទី ៥៤ របស់វេទិកាសេដ្ឋកិច្ចពិភពលោកត្រូវបានជាប់គាំងជាមួយនឹងហានិភ័យជាសកលមួយចំនួន រួមទាំងសង្រ្គាមនៅអ៊ុយក្រែន និងហ្គាហ្សា ការប្រែប្រួលអាកាសធាតុ និងការកើនឡើងយ៉ាងឆាប់រហ័សនៃបញ្ញាសិប្បនិម្មិត។
លោក Li បានចែករំលែកការយកចិត្តទុកដាក់ជាមួយប្រធានាធិបតីអ៊ុយក្រែន Volodymyr Zelenskyy ដែលបានចូលរួមវេទិកាដោយផ្ទាល់ជាលើកដំបូងដើម្បីរក្សាការគាំទ្រផ្នែកយោធាពីសម្ព័ន្ធមិត្តរបស់ទីក្រុង Kyiv បន្ទាប់ពីសង្រ្គាមជិតពីរឆ្នាំជាមួយរុស្ស៊ី។
លោក Li បានឲ្យដឹងប៉ុន្មានថ្ងៃបន្ទាប់ពីការបោះឆ្នោតប្រធានាធិបតីដ៏តានតឹងមួយនៅតៃវ៉ាន់ ដែលជាកោះប្រជាធិបតេយ្យដែលទីក្រុងប៉េកាំងទាមទារថាជាផ្នែកមួយនៃប្រទេសចិន។
ប៉ុន្តែមន្ត្រីចិនជាន់ខ្ពស់បំផុតដែលមកចូលរួមវេទិកានេះតាំងពីឆ្នាំ ២០១៧ មក មិនបានបញ្ជាក់ពីការបោះឆ្នោតទេ ហើយផ្ទុយទៅវិញផ្តោតលើពាណិជ្ជកម្ម សេដ្ឋកិច្ចរបស់ប្រទេសគាត់ និង AI ។
លោកបានមានប្រសាសន៍ថា វិធានការរើសអើងពាណិជ្ជកម្ម និងការវិនិយោគថ្មី បានលេចឡើងជារៀងរាល់ឆ្នាំ ដោយលោកបានបន្ថែមថា ឧបសគ្គ ឬការរំខានណាមួយអាចបន្ថយល្បឿន ឬរារាំងលំហូរនៃចរន្តឈាមនៃសេដ្ឋកិច្ចពិភពលោក។
លោក Li មិនបានបញ្ចេញឈ្មោះប្រទេសណាមួយទេ ប៉ុន្តែទីក្រុងប៉េកាំងបានឈ្លោះជាមួយសហរដ្ឋអាមេរិក និងសហភាពអឺរ៉ុបជុំវិញពាណិជ្ជកម្មក្នុងប៉ុន្មានឆ្នាំថ្មីៗនេះ ជាពិសេសលើបច្ចេកវិទ្យាខ្ពស់ និងថាមពលស្អាត។
ប្រភព៖ CNA
ប្រែសម្រួលដោយ៖ ហៃ ឆៃមុីនាង
