សមាគមអាជីវកម្មទឹកស្អាតក្រៅប្រទេស ក្រុង KITAKYUSHU បញ្ជាក់ការប្តេជ្ញាចិត្ត ក្នុងការគាំទ្រការអភិវឌ្ឍវិស័យទឹកស្អាតនៅកម្ពុជា
ភ្នំពេញ៖ នៅក្នុងជំនួបសំដែងការគួរសមជាមួយឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅថ្ងៃទី១៥ ខែមករា ឆ្នាំ២០២៤ គណៈប្រតិភូមកពីសមាគមអាជីវកម្មទឹកស្អាតក្រៅប្រទេស ក្រុង KITAKYUSHU ប្រទេសជប៉ុន ដឹកនាំដោយលោក Kaneo Akitoshi អគ្គនាយករដ្ឋាករទឹក និងអនាម័យ ក្រុង Kitakyushu បានបញ្ជាក់ការប្តេជ្ញាចិត្តជាថ្មីក្នុងការគាំទ្រការអភិវឌ្ឍវិស័យទឹកស្អាតរបស់កម្ពុជា។
លោក Akitoshi បានលើកឡើងពីចំណងមិត្តភាពដ៏យូរអង្វែងរវាងកម្ពុជា និងក្រុង KITAKYUSHU ចាប់ពីឆ្នាំ១៩៩៩មក។ ការបន្តការគាំទ្ររបស់ក្រុង KITAKYUSHU រួមទាំងការបញ្ជូនអ្នកបច្ចេកទេសមកធ្វើការងារក្នុងវិស័យទឹកស្អាតនៅកម្ពុជា និងការចងសម្ព័ន្ធមេត្រីភាពរវាងទីក្រុង KITAKYUSHU និងទីក្រុងភ្នំពេញក្នុងឆ្នាំ២០១៦ បញ្ជាក់ ពីមូលដ្ឋានគ្រឹះដ៏រឹងមាំនៃទំនាក់ទំនងរវាងភាគីទាំងពីរ។
ជាមួយនឹងការឈានដល់ដំណាក់កាលថ្មីនៃការអភិវឌ្ឍវិស័យទឹកស្អាតនៅប្រទេសកម្ពុជា ក្រោយការអនុម័តច្បាប់ស្តីពីការគ្រប់គ្រងទឹកស្អាត ឆ្នាំ២០២៣ សមាគមអាជីវកម្មទឹកស្អាតក្រៅប្រទេស ក្រុង KITAKYUSHU បានបង្ហាញការប្តេជ្ញាចិត្តរបស់ខ្លួនក្នុងការសហការជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដោយផ្តោតលើការជួយដល់វិស័យទឹកស្អាតរបស់កម្ពុជា ទាំងនៅក្នុងរាជធានីភ្នំពេញ និងតាមបណ្តាខេត្ត។
ឯកឧត្តមរដ្ឋមន្ត្រីបានទទួលស្គាល់តួនាទីដ៏សំខាន់របស់មិត្តជប៉ុន ជាពិសេសក្នុងវិស័យទឹកស្អាត។ ឯកឧត្តមបានបញ្ជាក់ជូនពីការប្ដេជ្ញាចិត្តរបស់រាជរដ្ឋាភិបាលអាណត្តិទី៧ ដែលផ្តល់អាទិភាពខ្ពស់ដល់វិស័យទឹកស្អាត ដូចបានកំណត់ក្នុងយុទ្ធសាស្ត្របញ្ចកោណ ដំណាក់កាលទី១។ ឯកឧត្តមបានបន្ថែមថា គោលដៅរបស់ក្រសួងគឺមិនត្រឹមតែផ្តត់ផ្គង់ទឹកស្អាតសម្រាប់ការប្រើប្រាស់ក្នុងគ្រួសារប៉ុណ្ណោះទេ តែជាធាតុចូលសំខាន់មួយសម្រាប់ការអភិវឌ្ឍសេដ្ឋកិច្ច ជាពិសេសនៅតំបន់ជនបទ។
ឆ្លើយទៅកាន់គណៈប្រតិភូជប៉ុនដែលមានសមាជិកប្រមាណ៣០រូប ឯកឧត្តមរដ្ឋមន្ត្រីបានសង្កត់ធ្ងន់លើភាពចាំបាច់នៃអភិក្រមគ្រប់ជ្រុងជ្រោយ រួមទាំងការរៀបចំផែនការយុទ្ធសាស្រ្ត និងផែនការវិនិយោគដែលដឹកនាំដោយរដ្ឋ និងបានគូសបញ្ជាក់ពីសារៈសំខាន់នៃដំណោះស្រាយឈ្នះ-ឈ្នះ សម្រាប់ទាំងប្រតិបត្តិករទឹកស្អាតឯកជន រដ្ឋាករទឹក និងប្រជាពលរដ្ឋ ដោយនឹងអាចតម្រូវឱ្យមានការរួមកម្លាំង មធ្យោបាយ និងធនធានដើម្បីធ្វើឱ្យមានការផ្លាស់ប្តូរជាដុំកំភួនក្នុងវិស័យនេះ។
ឯកឧត្តមរដ្ឋមន្ត្រីបានជម្រាបជូនពីផែនការរបស់ក្រសួងសម្រាប់វិស័យទឹកស្អាត រួមទាំងការរៀបចំផែនការមេ និង យុទ្ធសាស្ត្រវិនិយោគ និងបានស្នើឱ្យសមាគមបន្តការគាំទ្ររបស់ខ្លួន ដើម្បីសម្រេចបាននូវគោលដៅទាំងនេះ ដែលរួមបញ្ចូលទាំងការអភិវឌ្ឍសមត្ថភាពធនធានមនុស្សក្នុងវិស័យទឹកស្អាតផងដែរ។
