ឯកឧត្តម កែ គឹមយ៉ាន ណែនាំដល់ក្រុមការងារគណបក្សទាំងអស់ត្រូវបម្រើប្រជាពលរដ្ឋឲ្យបានល្អ ឲ្យបានលឿន និងឆាប់រហ័ស

ភ្នំពេញ៖ នាព្រឹកថ្ងៃទី០៦ ខែមករា ឆ្នាំ២០២៤ ឯកឧត្តម កែ គឹមយ៉ាន សមាជិកគណៈអចិន្ត្រៃយ៍ គណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តបន្ទាយមានជ័យ បានអញ្ជើញជាអធិបតីដ៏ខ្ពង់ខ្ពស់ក្នុងកិច្ចប្រជុំផ្សព្វផ្សាយលទ្ធផលស្មារតី នៃអង្គមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា និងប្រកាសក្រុមការងារគណបក្សចុះមូលដ្ឋានខេត្តបន្ទាយមានជ័យ។

ក្នុងឱកាសនេះ ឯកឧត្តម កែ គឹមយ៉ាន បានពាំនាំការផ្ដាំផ្ញើសួរសុខទុក្ខ និងជូនពរជ័យមហាប្រសើរពី សម្ដេចអគ្គមហាសេនាបតីតេជោ ហ៊ុន សែន ប្រធានគណបក្ស សម្ដេចអគ្គមហាពញាចក្រី ហេង សំរិន ប្រធានកិត្តិយសគណបក្ស សម្ដេចក្រឡាហោម ស ខេង សម្ដេចវិបុលសេនាភក្តី សាយ ឈុំ សម្តេចពិជ័យសេនា ទៀ បាញ់ សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សសម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជានាយករដ្ឋមន្រ្តី ជូនចំពោះសមាជិក សមាជិកាគណបក្ស និងបងប្អូនជនរួមជាតិទាំងអស់នៅក្នុងខេត្តបន្ទាយមានជ័យ សូមប្រកបតែនឹងពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

ឯកឧត្តម កែ គឹមយ៉ាន ក៏បានអបអរសាទរ និងស្វាគមន៍ចំពោះឯកឧត្តម ឌិត ទីណា ដែលត្រូវបានគណៈអចិន្ត្រៃយ៍គណៈកម្មាធិការកណ្តាលចាត់តាំងជា អនុប្រធានទី១ ក្រុមការងារគណបក្សចុះមូលដ្ឋានខេត្តបន្ទាយមានជ័យ រួមនិងសមាជិក សមាជិកាក្រុមការងារគណបក្សទាំងអស់ដែលទើបទទួលការចាត់តាំង ដើម្បីបន្តរួមគ្នាបម្រើប្រជាពលរដ្ឋ និងអភិវឌ្ឍមូលដ្ឋានខេត្តបន្ទាយមានជ័យ។

ក្នុងនាមគណបក្សប្រជាជនកម្ពុជា ឯកឧត្តម កែ គឹមយ៉ាន បានសម្តែងនូវការគោរពដឹងគុណ និងសេចក្តីស្រឡាញ់ដ៍ជ្រាលជ្រៅបំផុត ចំពោះ ឯកឧត្តម លោកជំទាវ លោក លោកស្រី ក្រុមការងារគណបក្សចុះមូលដ្ឋានខេត្ត សមាជិក សមាជិកាគណបក្ស ដែលបានលះបង់នូវធនធាន និងកម្លាំងកាយចិត្តក្នុងការចុះមូលដ្ឋាននាពេលកន្លងមក។

ឯកឧត្តម កែ គឹមយ៉ាន បានលើកឡើងថា
កិច្ចប្រជុំផ្សព្វផ្សាយលទ្ធផលស្មារតីនៃអង្គមហាសន្និបាតវិសាមញ្ញតំណាងទូទាំងប្រទេសរបស់គណបក្ស នាព្រឹកនេះ មានសារៈសំខាន់ណាស់ដើម្បីផ្សព្វផ្សាយជូនសមាជិក សមាជិកាគណបក្សឱ្យបានកាន់តែជ្រួតជ្រាបបន្ថែមទៀតអំពីសេចក្តីសម្រចចិត្តនៃមហាសន្និបាតវិសាមញ្ញតំណាងទូទាំងប្រទេស កាលពីថ្ងៃទី០៩-១០ ខែធ្នូ ឆ្នាំ២០២៣ និងសមិទ្ធផលជាច្រើនដែលគណបក្សសម្រេចបាន ព្រមទាំងទិសដៅការងារគណបក្សឆ្នាំ២០២៤។

ឯកឧត្តម កែ គឹមយ៉ាន បានណែនាំឱ្យការពារដាច់ខាតសុខសន្តិភាព ស្ថិរភាពនយោបាយ សណ្តាប់ធ្នាប់សង្គម និងណែនាំដល់ក្រុមការងារគណបក្សទាំងអស់ត្រូវបម្រើប្រជាពលរដ្ឋឲ្យបានល្អ ឲ្យបានលឿន និងឆាប់រហ័ស ប្រយុទ្ធប្រឆាំងគ្រឿងញៀន និងបន្តចូលរួមអនុវត្តគោលនយោបាយភូមិ ឃុំ មានសុវត្ថិភាព របស់រាជរដ្ឋាភិបាល។

មុននឹងបិទកម្មវិធី ឯកឧត្តម កែ គឹមយ៉ាន ថ្លែងអំណរគុណជាថ្មីចំពោះវត្តមានរបស់ ឯកឧត្តម លោកជំទាវ លោក លោកស្រី លោកគ្រូ អ្នកគ្រូ បងប្អូន ក្មួយៗនិស្សិត យុវជន និងអង្គពិធីទាំងមូល ហើយក្នុងឱកាសឆ្នាំថ្មី ឆ្នាំសកល២០២៤នេះ សូមជូនពរមានសុខភាពល្អបរិបូរណ៌ និងសូមប្រកបនឹងពរទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕