សម្តេចធិបតី៖ វិមានឈ្នះ-ឈ្នះ មិនមែនសម្រាប់លើកតម្កើងអ្នកណា ឬក្រុមណាទេ ប៉ុន្តែសម្រាប់កត់ត្រាទុកជាសក្ខីភាព ជាតឹកតាងសម្រាប់កូនខ្មែរ និងភ្ញៀវទេសចរ បានឃើញនូវដំណើរប្រវត្តិសាស្ត្ររបស់កម្ពុជា
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា វិមានឈ្នះ-ឈ្នះ សាសងសង់ឡើងមិនមែនសម្រាប់លើកតម្កើងអ្នកណា ឬក្រុមណាទេ ប៉ុន្តែជាទីកត់ត្រាទុកនូវកម្រងព្រឹត្តិការណ៍ប្រវត្តិសាស្ត្រកម្ពុជា សម្រាប់ឱ្យកូនខ្មែរជំនាន់ក្រោយ បានយល់ដឹងពីដំណើររបស់ជាតិ ដែលបានឆ្លងកាត់ភ្លើងសង្គ្រាម ។
ក្នុងពិធីអបអរសាទរខួប២៥ឆ្នាំ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយជោគជ័យនយោបាយឈ្នះ-ឈ្នះ និងខួប៥ឆ្នាំ នៃការកសាងវិមានឈ្នះ-ឈ្នះ នាថ្ងៃទី២៩ ខែធ្នូ ឆ្នាំ២០២៣ សម្តេចធិបតី ហ៊ុន ម៉ាណែត មានប្រសាសន៍ថា ប្រសិនបើប្រជាជនមិនចងចាំប្រវត្តិសាស្ត្រទេ ប្រទេសជាតិវិវឌ្ឍទៅមុខមិនល្អនោះទេ ពោលគឺត្រូវមានអត្តសញ្ញាណប្រវត្តិសាស្ត្រមួយដែលច្បាស់លាស់។ ម្យ៉ាងទៀត ការសាងសង់ដោយអ្នកដែលដឹងផ្ទាល់ អ្នកដែលប្រឡូកផ្ទាល់ អ្នកចូលរួមផ្ទាល់ គឺជាកិច្ចការសំខាន់សម្រាប់ឱ្យកូនខ្មែរជំនាន់ក្រោយបានដឹងរឿងពិតប្រាកដ។
សម្ដេចធិបតីបញ្ជាក់ថា «វិមានឈ្នះ-ឈ្នះនេះមិនមែនសម្រាប់លើកតម្កើងអ្នកណា ឬក្រុមណានោះទេ ប៉ុន្តែសម្រាប់កត់ត្រាទុកជាសក្ខីភាព ជាតឹកតាងសម្រាប់កូនខ្មែរទាំងអស់ និងភ្ញៀវជាតិ-អន្តរជាតិទាំងអស់បានឃើញនូវដំណើរប្រវត្តិសាស្ត្ររបស់កម្ពុជា»
សម្ដេចធិបតី ក៏បានណែនាំឱ្យក្រុមការងារនៅវិមានឈ្នះ-ឈ្នះ សូមបន្តឆ្លាក់រូបភាពដែលបង្ហាញពីសមិទ្ធផលថ្មីៗនៅលើជញ្ជាំងវិមានឈ្នះ-ឈ្នះបន្ថែមទៀត ពីព្រោះនៅលើជញ្ជាំងនេះ ដើរតួនាទីជាតឹកតាងបង្ហាញនូវ សមិទ្ធផលវិជ្ជមានជាច្រើន ពោលគឺមិនមែនចប់នៅត្រឹមថ្ងៃទី២៩ ខែធ្នូ ឆ្នាំ១៩៩៨នោះទេ គឺនៅមានសមិទ្ធផលដែលកម្ពុជាសម្រេចបានក្នុងព្រឹត្តិការណ៍ស៊ីហ្គេម ការចូលចតរបស់នាវាទេសចរណ៍វេស្ទើដាមនាឆ្នាំ២០២០ ដែលពិភពលោកចាត់ទុកកម្ពុជាតូចតែបេះដូងធំ។ ទាំងនេះហើយគឺសមិទ្ធផលសម្រាប់ជាតិ សម្រាប់កូនចៅរបស់កម្ពុជាបន្តមោទនភាព និងបន្តលើកទឹកចិត្តឱ្យពួកគេសម្រេចសមិទ្ធផលបន្តទៅមុខទៀត ៕
