សម្តេចធិបតី៖ ធនាគារដើរតួរនាទីសំខាន់ណាស់ ក្នុងការបង្វិល ការប្រមូលផ្ដុំធន ក្នុងការគាំទ្រដំណើរការសេដ្ឋកិច្ចជាតិ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងថា ធនាគារដើរតួរនាទីសំខាន់ណាស់ នៅក្នុងការបង្វិល ការប្រមូលផ្ដុំធន ក្នុងការគាំទ្រដំណើរការសេដ្ឋកិច្ចជាតិ ។

ក្នុងឱកាសអញ្ជើញសម្ពោធដាក់ឲ្យ​ប្រើប្រាស់ជាផ្លូវការ នូវអគារធនាគារវីងថៅវើ ដែលជាសំណង់ស្ថាបត្យកម្មដ៏ល្អឯក និងជានិមិត្តរូប នៃភាពប៉ិនប្រសព្វក្នុង​ការច្នៃ​ប្រឌិត នាថ្ងៃទី២០ ខែធ្នូ ឆ្នាំ២០២៣នេះ សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «ធនាគារដើរតួរនាទីសំខាន់ណាស់ នៅក្នុងការបង្វិល ការប្រមូលផ្ដុំធន ក្នុងការគាំទ្រដំណើរការសេដ្ឋកិច្ច ចឹងប្រសិទ្ធភាព នៃដំណើរការប្រព័ន្ធធនាគារយើង គឺធានានូវសុខភាព របស់សេដ្ឋកិច្ចរបស់យើង ។ ធនាគារដូចបេះដូង ប្រមូលឈាមបញ្ចេញឈាមទៅវិញ ចិញ្ចឹមសរីរាង្គ បើបេះដូងដើរមិនល្អ សុខភាពក៏មិនល្អ»។

ទន្ទឹមគ្នានេះ សម្តេចធិបតីបន្តថា ការសម្រេចនៅក្នុងការវិនិយោគ សាងសងអគារដ៏ខ្ពស់ទំនើបទាន់សម័យ របស់ធនាគារវីង បានឆ្លុះបញ្ចាំងពីសារសំខាន់ នៃកត្ដាសុខសន្ដិភាព ដែលជាមូលដ្ឋានគ្រឹះ សម្រាប់ការអភិវឌ្ឍន៍ និងនាំមក​នូវវិបុលភាពសម្រាប់សង្គមជាតិ។

សម្ដេចថ្លែងថា លើសពីនោះទៀត ព្រមទាំងបានបង្ហាញអំពីទំនុកទុកចិត្ដ និងការជឿជាក់របស់វិនិយោគិនឯកជន និងក្រុមប្រឹក្សាធនាគារមកលើបរិកាសធុរកិច្ចរបស់កម្ពុជា និយាយជារួម និងភាពរឹងមាំ និងភាពធន់ ក្នុងវិស័យធនាគារ និងហិរញ្ញវត្ថុរបស់កម្ពុជា និយាយដោយឡែក។

សម្តេចធិបតី ក៏ចូលរួមអបអរសាទរចំពោះការរីកចម្រើនរបស់ធនាគារវីង ហើយការរីកចម្រើននេះ បានចូលរួមសម្រួលប្រតិបត្តិការជាច្រើន ផ្នែកហិរញ្ញវត្ថុរបស់ប្រជាពលរដ្ឋ ៕