កម្លាំងតំបន់ប្រតិបត្តិការសឹករងកែប ធ្វើលំហាត់យុទ្ធដំណើរទ័ព លើចម្ងាយផ្លូវប្រវែង ៣៥គីឡូម៉ែត្រ

ភ្នំពេញ៖ អនុវត្តតាមបទបញ្ជារបស់យោធភូមិភាគទី៣ មេបញ្ជាការរង នាយសេនាធិការ តំបន់ប្រតិបត្តិការសឹករងកែប ប្រធានគ្រប់គ្រងវគ្គហ្វឹកហ្វឺនពង្រឹងសមត្ថភាព ថ្នាក់កងអនុសេនាធំបានដឹកនាំធ្វើលំហាត់យុទ្ធដំណើរទ័ព ដើម្បីពង្រឹងសមត្ថភាពដល់សិក្ខាកាម រយៈពេលពីរថ្ងៃ ចាប់ពីថ្ងៃទី ១៣-១៤ ខែធ្នូ ឆ្នាំ ២០២៣ ដោយប្រើប្រាស់ចម្ងាយផ្លូវប្រវែង ៣៥ គីឡូម៉ែត្រ ដែលឆ្លងកាត់ ភូមិអន្ទង់ស ភូមិចំការចេក ភូមិចំការ បី ឃុំពងទឹក ស្រុកដំណាក់ចង្អើល ខេត្តកែប។

ធ្វើដំណើរដោយថ្មើរជើង ឆ្លងកាត់ឧបសគ្គមួយចំនួនដោយធម្មជាតិ មានលក្ខណៈអាកាសធាតុប្រែប្រួលមិនអំណោយផលធ្វើ ឱ្យមានផលប៉ះពាល់ដល់សុខភាពសិក្ខាកាមបន្តិចបន្តួចក្នុងលំហាត់យុទ្ធដំណើរទ័ព សម្រាប់ត្រៀមបិទវគ្គនាពេលខាងមុខឆាប់ៗ របស់តំបន់ប្រតិបត្តិការរងកែប។

នាព្រឹកវេលាម៉ោង១១.៣០នាទីថ្ងៃបញ្ចប់លំហាត់យុទ្ធដំណើរទ័ព ឧត្តមសេនីយ៍ទោ ឈឹម ខ្មៅ មេបញ្ជាការតំបន់ប្រតិបត្តិការសឹករងកែប បានលើកឡើងថាស្របពេលប្រទេសជាតិមានសុខសន្តិភាព សេដ្ឋកិច្ចស្ថិរភាពនយោបាយ នេះជាឱកាសសម្រាប់កងទ័ពហ្វឹកហាត់ពង្រឹងសមត្ថភាព គុណភាពនាយទាហាន នាយទាហានរង ពលទាហាន ក្នុងការបំពេញភារកិច្ច និងកាតព្វកិច្ច ដើម្បីទទួលអនុវត្តបទបញ្ជាដែលថ្នាក់លើប្រគល់ឲ្យ ក្នុងការគ្រប់គ្រងដឹកនាំបញ្ជា ក្នុងភារកិច្ចការពារបូរណភាពភាពទឹកដី នៃកងយោធពលខេមរភូមិន្ទ។