លោកជំទាវ លឹម រស្មី អញ្ជើញចូលរួមក្នុងកិច្ចប្រជុំក្រុមការងារខមមីតថ្នាក់តំបន់ (RTF) និងកិច្ចប្រជុំមន្រ្តីជាន់ខ្ពស់ខមមីតលើកទី១៥ (SOM15)

ភ្នំពេញ៖ នៅថ្ងៃទី ២៣ ដល់ថ្ងៃទី២៤ ខែវិច្ឆិកា ឆ្នាំ២០២៣ លោកជំទាវ លឹម រស្មី អគ្គនាយករងអត្តសញ្ញាណកម្ម និងលោក សំអុល មន្ត្រីជំនាញបានចូលរួមក្នុងកិច្ចប្រជុំក្រុមការងារខមមីតថ្នាក់តំបន់ (RTF) និងកិច្ចប្រជុំមន្រ្តីជាន់ខ្ពស់ខមមីតលើកទី១៥ (SOM15) ក្រោមអធិបតីភាព លោកជំទាវ កិត្តិបណ្ឌិត អុឹង កន្ថាផាវី រដ្ឋមន្រ្តីក្រសួងកិច្ចការនារី តាមប្រព័ន្ធវីដេអូ (Zoom)។

ពិធីនេះបានប្រព្រឹត្តិទៅរយៈពេល ០២ថ្ងៃ នៅសណ្ឋាគារពូលូវ៉ៃ រាជធានីភ្នំពេញ ដោយមាន ០៦ប្រទេសចូលរួមគឺៈ ប្រទេសថៃ ប្រទេសឡាវ ប្រទេសចិន ប្រទេសមីយ៉ាន់ម៉ា និងប្រទេសវៀតណាម ដែលប្រទេសកម្ពុជាយើងជាម្ចាស់ផ្ទះ។

ក្នុងនេះក៏មានការអញ្ជើញចូលរួមពីសំណាក់ ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ឯកឧត្តម លោកជំទាវ លោក លោកស្រី តំណាង អគ្គនាយកដ្ឋាននានាចំណុះក្រសួងមហាផ្ទៃ និងក្រសួង ស្ថាប័ន អង្គការក្នុង និងក្រៅរដ្ឋាភិបាលជំនាញពាក់ព័ន្ធជាច្រើនផងដែរ។

កិច្ចប្រជុំទាំងពីរនេះ មានគោលបំណងពិនិត្យពីបញ្ហាប្រឈម និងបទពិសោធន៍ នៃការអនុវត្តផែនការសកម្មភាពខមមីតលើកទី៤ (SPA-IV) ដើម្បីរៀបចំកសាងផែនការសកម្មភាពខមមីតលើកទី៥ (SPA-V) ក៏ដូចជាកំណត់សកម្មភាពជាគន្លឹះក្នុងការរៀបចំបង្កើតយន្តការបញ្ជូនឆ្លងដែន (TRM) និងពង្រឹងកិច្ចសហប្រតិបត្តិការពហុភាគីដើម្បីការពារសិទ្ធរបស់ជនរងគ្រោះដោយអំពើជួញដូរមនុស្ស រួមទាំងដំណោះស្រាយក្នុងការឆ្លើយតបទៅនឹងទម្រង់ថ្មីៗ នៃអំពើជួញដូរមនុស្សតាមប្រព័ន្ធបច្ចេកវិទ្យាក្នុងចំណោម
ប្រទេសទាំង០៦នៅមហាអនុតំបន់មេគង្គ៕