រដ្ឋមន្ត្រីការងារ ក្រើនរំឮកដល់អង្គភាពក្រោមឱវាទត្រូវបំពេញការងារឱ្យទាន់ពេលវេលា ដោយប្រើប្រាស់ប្រាជ្ញា និងស្មារតី
ភ្នំពេញ៖ នាល្ងាចថ្ងៃសុក្រ ទី២៤ ខែវិច្ឆិកា ឆ្នាំ២០២៣ ថ្នាក់ដឹកនាំ និងមន្ត្រីរាជការនៃក្រសួងការងារ និងបណ្តុះបណ្តាលវិជ្ជាជីវៈ បានបន្តចូលរួមគោរពទង់ជាតិនៃព្រះរាជាណាចក្រកម្ពុជា ដោយច្រៀងចម្រៀងបទ «នគររាជ» និងច្រៀងបទពង្សាវតាខ្មែរដោយផ្ទាល់រួមគ្នា ដែលបង្កប់នូវអត្ថន័យយ៉ាងជ្រាលជ្រៅជាទីបំផុត ទៅក្នុងក្រអៅដួងចិត្ដកុលបុត្រ កុលធីតាខ្មែរគ្រប់ៗរូប។
ថ្លែងនៅក្នុងឱកាសនោះ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានថ្លែងក្រើនរំឮកដល់អង្គភាពក្រោមឱវាទត្រូវបំពេញការងារឱ្យទាន់ពេលវេលា ដោយប្រើប្រាស់ប្រាជ្ញា និងស្មារតី ហើយខិតខំប្រឹងប្រែងដុសខាត់ អភិវឌ្ឍន៍សមត្ថភាពបន្តជានិច្ច ដើម្បីបំពេញការងារបម្រើសេវាជូនប្រជាពលរដ្ឋប្រកបដោយឆន្ទៈនិងចេញពីបេះដូងពិតប្រាកដ។
ឯកឧត្តមរដ្ឋមន្ត្រី ក៏បានណែនាំដល់អង្គភាពសំខាន់ៗមួយចំនួននៃក្រសួងការងារ និងបណ្តុះបណ្តាលវិជ្ជាជីវៈ ឱ្យរៀបចំវេនប្រចាំការក្នុងកំឡុងពិធីបុណ្យអុំទូក បណ្តែតប្រទីប និងសំពះព្រះខែ អកអំបុក រយៈពេល ៣ថ្ងៃនេះ ក្នុងគោលបំណងដើម្បីត្រៀមបម្រុងកម្លាំងផ្តល់សេវា និងដោះស្រាយបញ្ហា ដែលអាចកើតមានឡើងជាយថាហេតុ។
ជាចុងបញ្ចប់ ឯកឧត្តមរដ្ឋមន្ត្រីជូនពរដល់ថ្នាក់ដឹកនាំ និងមន្ត្រីរាជការនៃក្រសួងទាំងអស់ឱ្យប្រកបដោយសុខភាពល្អ សុខសុភមង្គល និងធ្វើដំណើរប្រកបដោយសុខសុវត្ថិភាពគ្រប់ពេលវេលា។
គួរបញ្ជាក់ថា ជារៀងរាល់សប្តាហ៍ ក្រសួងការងារ និងបណ្តុះបណ្តាលវិជ្ជាជីវៈ តែងតែរៀបចំការគោរពទង់ជាតិចំនួន២លើក ពោលគឺពេលព្រឹកថ្ងៃចន្ទ និងពេលល្ងាចថ្ងៃសុក្រ ៕
