រាជរដ្ឋាភិបាល ដឹកនាំដោយបក្សប្រជាជន ធ្វើឲ្យកម្ពុជា សម្រេច និងរក្សាបាននូវចីរភាព នៃសុខសន្តិភាពពេញលេញ ស្ថិរភាពនយោបាយ និងការអភិវឌ្ឍលើគ្រប់វិស័យ

ភ្នំពេញ៖ ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាវិជ្ជាជីវៈ បានថ្លែងថា ក្រោមការដឹកនាំរបស់រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា, ប្រទេសកម្ពុជា សម្រេច និង រក្សាបាននូវចីរភាពនៃសុខសន្តិភាពពេញលេញ ស្ថិរភាពនយោបាយ និងការអភិវឌ្ឍលើគ្រប់ វិស័យទាំងសង្គម -សេដ្ឋកិច្ចគួរជាទីមោទនៈ។

តាមរយៈសុន្ទរកថានាថ្ងៃទី២១ វិច្ឆិកានេះ ថ្លែងក្នុងពិធីជួបសំណេះសំណាលជាមួយបងប្អូនកម្មករ និយោជិត នៅតាមបណ្តារោងចក្រ សហគ្រាស ដែលមានមូលដ្ឋានក្នុងខណ្ឌកំបូល រាជធានីភ្នំពេញ ក្រោមអធិបតីភាពសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ឯកឧត្ដមរដ្ឋមន្ត្រី ហេង សួរ ថ្ងៃនេះជាកម្មវិធីលើកទី១០ និងជាជំនួបចុងក្រោយក្នុងឆ្នាំ២០២៣នេះ ដែលសម្តេចធិបតី បានជួបសំណេះសំណាលជាមួយបងប្អូនកម្មករនិយោជិតក្នុងនាមជា នាយករដ្ឋមន្រ្តី នៃព្រះរាជាណាចក្រកម្ពុជា ក្នុងខណៈពេលដែលអាណត្តិកន្លងទៅ សម្តេចធិបតី ក៏ធ្លាប់បានអញ្ជើញជួបសំណេះ សំណាលជាមួយបងប្អូនប្រធានរដ្ឋបាល ប្រធាន ផ្នែក និងកម្មករនិយោជិតនៅតាមរាជធានី-ខេត្ត ជាច្រើន លើករួចមកហើយដែរ។ នេះជាការបញ្ជាក់ឱ្យឃើញយ៉ាងច្បាស់អំពីការយកចិត្តទុកដាក់បំផុត របស់ សម្តេចធិបតី ចំពោះ សុខទុក្ខបងប្អូនកម្មក រ និយោជិតយើង។

ឆ្លៀតក្នុងឱកាសនេះ ឯកឧត្ដមរដ្ឋមន្ត្រី បាទថ្លែងអំណរគុណដល់រដ្ឋបាលរាជធានីភ្នំពេញ ស្ថាប័នពាក់ព័ន្ធ និង អាជ្ញាធរ គ្រប់លំដាប់ថ្នាក់ ដែលបានសហការយ៉ាងល្អ រៀបចំពិធីនាពេលនេះ ហើយក៏សូមអរគុណចំពោះ លោកជំទាវ ខូវ លីគាង ដែលបានផ្តល់ទីតាំងសម្រាប់រៀបចំពិធី និងម្ចាស់រោងចក្រ សហគ្រាសទាំងអស់ដែលបានអនុញ្ញាតឱ្យបងប្អូន កម្មករនិយោជិត បានចូលរួម ក្នុងកម្មវិធីនាព្រឹកនេះ និងបានឈប់ សម្រាក ១ថ្ងៃដោយមានប្រាក់ឈ្នួល។

ឯកឧត្ដមរដ្ឋមន្ត្រី ហេង សួរ មានប្រសាសន៍ថា តាមរយៈគោលនយោបាយរបស់រាជរដ្ឋាភិបាលក្នុងការជំរុញការកសាង រោងចក្រ សហគ្រាស នៅទូទាំងរាជធានី ខេត្ត បានបង្កើតការងារ និងមុខរបរ ជូនប្រជាពលរដ្ឋឱ្យ នៅកៀក នឹង មូលដ្ឋានរស់នៅ របស់បងប្អូន រោងចក្រ-សហគ្រាសជាច្រើន ត្រូវបានពង្រាយ ទៅតាម បណ្តា ខេត្ត ផ្សេងៗទៀត ស្ទើរទូទាំង ប្រទេស ដែលចំនួនសរុប បាន កើន ឡើងពីចំនួន ៦៤រោងចក្រ និងមានកម្មករនិយោជិតត្រឹមប្រមាណ ៨ម៉ឺននាក់ នៅឆ្នាំ១៩៩៧ ដល់ចំនួន ១៧ ៦៨៤ រោងចក្រ សហគ្រាស និងមានកម្មករនិយោជិតសរុបប្រមាណ ១,៥លាននាក់ គិតត្រឹមខែតុលា ឆ្នាំ២០២៣នេះ ក្នុងនោះ វិស័យវាយនភណ្ឌ, កាត់ដេរ, ផលិត ស្បែកជើង និងផលិតផល ធ្វើដំណើរនិងកាបូប មានចំនួន ១ ៣៤៣ រោងចក្រ និងមានកម្មករនិយោជិតសរុបចំនួន ៨៩៦ ៩៣២ នាក់ ដោយបានប្រាក់ឈ្នួលប្រចាំឆ្នាំប្រមាណ ២,៧ពាន់លានដុល្លារ។

ឯកឧត្ដមរដ្ឋមន្ត្រីបញ្ជាក់ថា «ក្រោមការដឹកនាំរបស់រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា, ប្រទេសកម្ពុជា សម្រេច និង រក្សាបាននូវចីរភាពនៃសុខសន្តិភាពពេញលេញ ស្ថិរភាពនយោបាយ និងការអភិវឌ្ឍលើគ្រប់ វិស័យទាំងសង្គម -សេដ្ឋកិច្ចគួរជាទីមោទនៈ។ កំណើនសេដ្ឋកិច្ចកម្ពុជាបានកើនឡើងជាមធ្យម ក្នុងអត្រា ៧% ជាង ២ទសវត្សរ៍មុន ការ រីក រាល ដាលជាសកល នៃ ជំងឺកូវីដ-១៩ និងសង្គ្រាមរុស្ស៊ី និងអ៊ុយក្រែន»។

ឯកឧត្ដមបន្ថែមថា លក្ខខណ្ឌការងារ និងជីវភាពរស់នៅរបស់បងប្អូនកម្មករនិយោជិត ត្រូវបានគិតគូរនិងលើកកម្ពស់កាន់តែប្រសើរឡើង ជាក់ស្តែង ប្រាក់ឈ្នួលអប្បបរមាបានកើនពី ៤០ដុល្លារ នៅឆ្នាំ១៩៩៧ ដល់ ២០០ដុល្លារ នៅឆ្នាំ២០២៣ និងកើនដល់ ២០៤ដុល្លារ នៅឆ្នាំ២០២៤ បើបូកបន្ថែមប្រាក់អត្ថប្រយោជន៍ជាកាតព្វកិច្ចផ្សេងៗទៀត កម្មករនិយោជិតទទួលបានប្រាក់ឈ្នួលជាមធ្យម ២២១ ដុល្លារ ដល់ ២៣២ ដុល្លារ ដោយមិនទាន់គិតពីអត្ថប្រយោជន៍ពី ប.ស.ស. ។

លើសពីនេះរដ្ឋមន្ត្រីការងារ លើកឡើងថា បើប្រៀបធៀបប្រាក់ឈ្នួលអប្បបរមានៅកម្ពុជាក្នុងឆ្នាំ២០២៣ មានប្រទេសមួយចំនួនក្នុងតំបន់មានប្រាក់ឈ្នួលអប្បបរមាទាបជាងកម្ពុជា ដូចជាប្រទេសវៀតណាមមានចំនួនចន្លោះពី ១៣៧ដុល្លារ ទៅ ១៩៨ដុល្លារ, ប្រទេសស្រីលង្ការ ៤០ដុល្លារ, ប្រទេសបង់ក្លាដែស ១១៦ដុល្លា (ចាប់ពីខែធ្នូ ឆ្នាំ២០២៣), ប្រទេសមីយ៉ាន់ម៉ា ៨៣ដុល្លារ និងប្រទេសឡាវ ៩០ដុល្លារ ប៉ុណ្ណោះ ៕