លោក Netanyahu បានថ្លែងប្រាប់សន្និសីទសារព័ត៌មានថាមិនទាន់មានកិច្ចព្រមព្រៀងណាមួយសម្រេចបានទេលើការដោះលែងចំណាប់ខ្មាំងដែលបានឃុំខ្លួននៅហ្កាណាស្ទ្រីប
ហ្សេរុយសាឡឹម៖នាយករដ្ឋមន្ត្រីអ៊ីស្រាអែល លោក Benjamin Netanyahu បានប្រាប់សន្និសីទសារព័ត៌មានមួយកាលពីយប់ថ្ងៃសៅរ៍ថា មិនទាន់មានកិច្ចព្រមព្រៀងណាមួយ សម្រេចបាននៅឡើយទេ លើការដោះលែងចំណាប់ខ្មាំងអ៊ីស្រាអែល ដែលឃុំខ្លួននៅតំបន់ហ្គាហ្សាស្ទ្រីប។
លោក Netanyahu បានបដិសេធ “របាយការណ៍មិនត្រឹមត្រូវ” អំពីកិច្ចព្រមព្រៀងមួយនៃការដោះលែងចំណាប់ខ្មាំងប្រហែល ២៤០ នាក់ដែលត្រូវបានឃុំខ្លួននៅហ្គាហ្សាកំពុងខិតជិតមកដល់ ដោយបន្ថែមថាសាធារណៈជនអ៊ីស្រាអែលនឹងត្រូវបានធ្វើបច្ចុប្បន្នភាពប្រសិនបើកិច្ចព្រមព្រៀងបែបនេះត្រូវបានសម្រេច។លោក Netanyahu បានប្រាប់ក្រុមគ្រួសារចំណាប់ខ្មាំង ខណៈដែលពួកគេខ្លះទើបតែបញ្ចប់ការហែក្បួនរយៈពេលប្រាំថ្ងៃពីទីក្រុង Tel Aviv ទៅកាន់ទីក្រុង Jerusalem ដោយជំរុញឱ្យរដ្ឋាភិបាលធ្វើបន្ថែមទៀតដើម្បីធានាការដោះលែងចំណាប់ខ្មាំងថា “ប្រជាជនអ៊ីស្រាអែលទាំងអស់កំពុងដើរជាមួយអ្នក” ។
លោក Netanyahu បានថ្លែងថា លោកបានអញ្ជើញអ្នកតំណាងនៃក្រុមគ្រួសារមកជួបគណៈរដ្ឋមន្ត្រីរបស់លោកនៅប៉ុន្មានថ្ងៃខាងមុខនេះ “ដើម្បីបញ្ជាក់ថាតើបញ្ហានេះគឺមានសារៈសំខាន់សម្រាប់មនុស្សគ្រប់គ្នា”។លោកក៏បានប្តេជ្ញាថា អ៊ីស្រាអែលនឹង “បន្តប្រយុទ្ធរហូតដល់ក្រុមហាម៉ាសត្រូវបានបំផ្លាញ” ទោះបីជាមានការកើនឡើងសម្ពាធពីអន្តរជាតិដើម្បីបញ្ឈប់សង្គ្រាមក៏ដោយ។
កងទ័ពអ៊ីស្រាអែលបាននិងកំពុងធ្វើការវាយប្រហារលើតំបន់ហ្គាហ្សាក្នុងរយៈពេលប៉ុន្មានសប្តាហ៍កន្លងមកនេះ ដើម្បីសងសឹកនឹងការវាយប្រហារដ៏គួរឱ្យភ្ញាក់ផ្អើលរបស់ក្រុមហាម៉ាសលើភាគខាងត្បូងអ៊ីស្រាអែលកាលពីថ្ងៃទី ៧ ខែតុលា ក្នុងអំឡុងពេលដែលក្រុមសកម្មប្រយុទ្ធហាម៉ាសបានសម្លាប់មនុស្សប្រហែល ១,២០០ នាក់ និងចាប់ចំណាប់ខ្មាំងជាង ២០០ នាក់។ជម្លោះដែលកំពុងកើតមានក៏បានសម្លាប់ប្រជាជនប៉ាឡេស្ទីនជាង១២.០០០នាក់ផងដែរនេះបើយោងតាមការិយាល័យប្រព័ន្ធផ្សព្វផ្សាយរដ្ឋាភិបាលហ្គាហ្សា។
