ឯកឧត្តម ជិន ម៉ាលីន ដឹកនាំកិច្ចប្រជុំពិនិត្យ និងពិភាក្សាលេីសេចក្តីព្រាង “ប្រកាសស្តីពីការទទួលស្គាល់អ្នកបកប្រែ និងក្រុមហ៊ុនបកប្រែក្នុងវិស័យច្បាប់ និងយុត្តិធម៌ “

ភ្នំពេញ៖ នារសៀលថ្ងៃព្រហស្បតិ៍ ៤កេីត ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៦ ខែវិច្ឆិកា ឆ្នាំ២០២៣ ឯកឧត្តម ជិន ម៉ាលីន រដ្ឋលេខាធិការក្រសួងយុត្តិធម៌ បានធ្វើការដឹកនាំកិច្ចប្រជុំដែលមានសមាសភាពអញ្ជើញចូលរួមមានឯកឧត្តម ប៉ូច សោភ័ណ អនុរដ្ឋលេខាធិការក្រសួងយុត្តិធម៌, ឯកឧត្តម ឃ្លោក ដារ៉ា ប្រតិភូរាជរដ្ឋាភិបាល និងជាអគ្គនាយកកិច្ចការអន្តរជាតិ និងអភិវឌ្ឍន៍វិស័យយុត្តិធម៌, លោក បែន វិស្នូ អគ្គនាយករងនៃអគ្គនាយកកិច្ចការអន្តរជាតិ និងអភិវឌ្ឍន៍វិស័យយុត្តិធម៌, ប្រធាននាយកដ្ឋាន អនុប្រធាននាយកដ្ឋាន, ប្រធានការិយាល័យ និងមន្រ្ដី នៃនាយកដ្ឋានអ្នកបកប្រែ និងអ្នកជំនាញក្នុងវិស័យច្បាប់ និងយុត្តិធម៌។

កិច្ចប្រជុំដើម្បីពិនិត្យ ពិភាក្សាលើសេចក្តីព្រាង “ប្រកាសស្តីពីការទទួលស្គាល់អ្នកបកប្រែ និងក្រុមហ៊ុនបកប្រែ ក្នុងវិស័យច្បាប់ និងយុត្តិធម៌“ ដែលនាយកដ្ឋានអ្នកបកប្រែ និងអ្នកជំនាញក្នុងវិស័យច្បាប់ និងយុត្តិធម៌ បានរៀបចំហើយបានពិនិត្យពិភាក្សាចប់ក្នុងកម្រិតអគ្គនាយកដ្ឋាន។

របៀបវារៈនៃកិច្ចប្រជុំ មានដូចខាងក្រោម៖
-ពិនិត្យ ពិភាក្សាតាមជំពូកនីមួយៗ
-ពិនិត្យ ពិភាក្សាខ្លឹមសារក្នុងប្រការនីមួយៗ
-ការជជែកពិភាក្សាលើបទពិសោធន៍នៃការអនុវត្តនានាក្នុងប្រទេស និងក្រៅប្រទេស
-ការងារអាទិភាពសម្រាប់ដំណើរការរៀបចំសេចក្តីព្រាងនេះបន្ត ៕