សម្ដេចធិបតី ហ៊ុន ម៉ាណែត៖ ការអភិវឌ្ឍកោះនរា ជាការអភិវឌ្ឍពិតប្រាកដ ហើយជាគឺការចែកផលលាភទៅដល់ប្រជាពលរដ្ឋ
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានថ្លែងថា ការអភិវឌ្ឍនៅតំបន់កោះនរា គឺដើម្បីបែងចែកនូវផលសេដ្ឋកិច្ចដល់ប្រជាពលរដ្ឋទូទៅទាំងអស់ ។
ក្នុងឱកាសអញ្ជើញសម្ពោធដាក់ឲ្យប្រើប្រាស់ស្ពានកោះនរា នៅរសៀលថ្ងៃទី១៥ ខែវិច្ឆិកា ឆ្នាំ២០២៣នេះ សម្ដេចធិបតី ហ៊ុន ម៉ាណែត បញ្ជាក់ថា «ការប្រែក្លាយទីនេះ (កោះនរា) ទៅជាតំបន់សេដ្ឋកិច្ច ឧស្សាហកម្ម ដែលមានគ្រោងដូចជា ផ្សារ កន្លែងធ្វើការ សួនកម្សាន្ដ សម្រាប់ប្រជាពលរដ្ឋ។ អ្វីដែលលិបពីក្នុងទឹកស្ដារឲ្យឡើងពីលើទឹក ហើយរីកចម្រើនបន្ដទៀត។ ការអភិវឌ្ឍដែលមានន័យបំផុត គឺការអភិវឌ្ឍដែលផ្ដល់ផលប្រយោជន៍ ទៅដល់ប្រជាពលរដ្ឋទូទៅ មិនមែនផ្ដល់តែសម្រាប់ OCIC ទេ មិនមែនអ្នកឧកញ៉ា ពុង ឃាវសែ ធ្វើផ្ទះហើយហាមគេចូលទេ ប៉ុន្ដែផ្ដល់ផលឲ្យប្រជាពលរដ្ឋទូទៅ នេះហើយជាការអភិវឌ្ឍពិតប្រាកដ គឺការចែកផលលាភទៅដល់ប្រជាពលរដ្ឋ»។
សម្ដេចធិបតី បានចាត់ទុកការអភិវឌ្ឍន៍កោះនរា គឺជាការស្រង់ស្ថានភាពកោះ ដែលពីមុនត្រូវបានបាកចូលទន្លេ ហើយការអភិវឌ្ឍន៍នេះ បានក្លាយទៅជាកន្លែងមានសក្តានុពលផ្នែកសេដ្ឋកិច្ចខ្ពស់តំបន់កោះនរា ខណៈកាលមុនចិញ្ចឹមប្រជាជនមិនច្រើនប្រកបរបរកសិកម្ម តែឥលូវនឹងប្រែក្លាយទៅជាតំបន់ពហុសកម្មភាពសេដ្ឋកិច្ច ដែលនឹងមានការអភិវឌ្ឍផ្សេងៗ។
សម្ដេចធិបតី បង្ហាញក្តីសង្ឃឹមថា ក្រុមហ៊ុនអ្នកឧកញ៉ា ពុង ឃាវសែ នឹងបន្តយកចិត្តទុកដាក់ក្នុងការអភិវឌ្ឍន៍តំបន់កោះនរាទៅតាមផែនការគ្រោងទុក ៕
