ឧបនាយករដ្ឋមន្ត្រី សាយ សំអាល់ អញ្ជើញបើកវគ្គបណ្ដុះបណ្ដាលស្ដីពីគោលការណ៍ច្បាប់ និងនីតិវិធីនានាពាក់ព័ន្ធនឹងវិស័យរៀបចំដែនដី នគរូបនីយកម្ម និងសំណង់

ភ្នំពេញ៖ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ នៅថ្ងៃសៅរ៍ ទី១១ ខែវិច្ឆិកា ឆ្នាំ២០២៣ បានអញ្ជើញជាអធិបតីក្នុងពិធីបើកវគ្គបណ្ដុះបណ្ដាលស្ដីពីគោលការណ៍ច្បាប់ និងនីតិវិធីនានាពាក់ព័ន្ធនឹងវិស័យរៀបចំដែនដី នគរូបនីយកម្ម និងសំណង់ ជូនមេធាវី និស្សិត ជំនួយការនិងអ្នកហាត់ការចំនួន ៣០៣នាក់។

ជាកិច្ចចាប់ផ្តើម ឯកឧត្តមឧបនាយករដ្ឋមន្ត្រី សាយ សំអាល់ បានកោតសរសើរចំពោះសិក្ខាកាមទាំងអស់ ដែលមានឆន្ទៈស្ម័គ្រចិត្តលះបង់ពេលវេលាជួយការងាររបស់ក្រសួង និងចូលរួមទទួលយកចំណេះដឹងបទពិសោធន៍នានាពាក់ព័ន្ធនឹងវិស័យជំនាញរបស់ក្រសួង មានដូចជា ច្បាប់ភូមិបាល ការចុះបញ្ជីអចលនវត្ថុ ការងាររៀបចំដែនដីនិងនគរូបនីយកម្ម ការរៀបចំផែនទីប្រើប្រាស់ដី និងការត្រួតពិនិត្យតាមដាននិងវាយតម្លៃការងារលើផែនការប្រើប្រាស់ដី គោលការណ៍និងទស្សនៈទូទៅនៃការរៀបចំដែនដីនិងនគរូបនីយកម្ម នីតិវិធីលម្អិតនៃការកសាងប្លង់គោលនិងផែនការប្រើប្រាស់ដីក្រុង ស្រុក ខណ្ឌ ច្បាប់ស្ដីពីសំណង់ លិខិតបទដ្ឋានគតិយុត្តិក្នុងវិស័យសំណង់ អាជ្ញាប័ណ្ណត្រួតពិនិត្យនិងបញ្ជាក់សំណង់ និងវិញ្ញាបនបត្រប្រើប្រាស់សំណង់ លិខិតអនុញ្ញាតសាងសង់ ការគ្រប់គ្រងសំណង់ដែលមានសភាពគ្រោះថ្នាក់ និងការដោះស្រាយវិវាទដីធ្លី។

ឯកឧត្តមឧបនាយករដ្ឋមន្ត្រី ក៏បានលើកឡើងអំពីគោលការណ៍គ្រឹះនៃលទ្ធិប្រជាធិបតេយ្យ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដោយដាក់ចេញនូវចំណុចអាទិភាពចំនួន៦ ក្នុងនោះមានការធ្វើកំណែទម្រង់មុខងារសាធារណៈដែលផ្ដោតសំខាន់លើការពង្រឹងគុណភាពមនុស្ស គុណភាពស្ថាប័ន និងការបន្តបណ្ដុះបណ្ដាល។ ដូច្នេះការរៀបចំវគ្គបណ្ដុះបណ្ដាលនាពេលនេះគឺសមស្របតាមពេលវេលា និងឆ្លើយតបទៅនឹងគោលនយោបាយរបស់រាជរដ្ឋាភិបាលក្នុងអាណត្តិទី៧នេះ ៕