នាយឧត្តមសេនីយ៍ វង្ស ពិសេន៖ មានជំនឿថា នាយទាហានដែលទើបទទួលបានការតំឡើងឋានន្តរសក្តិ នឹងបន្តភក្តីភាពឥតងាករេចំពោះជាតិ
ភ្នំពេញ៖ ឯកឧត្តម នាយឧត្ដមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ នាព្រឹកថ្ងៃទី៨ ខែវិច្ឆិកា ឆ្នាំ២០២៣ បានអញ្ជើញបំពាក់ឋានន្តរសក្តិនាយទាហានបីរូប ដែលកំពុងបំពេញការងារនៅបញ្ជាការដ្ឋានជាតិកម្លាំងពិសេសប្រឆាំងភេរវកម្ម បញ្ជាការដ្ឋានទ័ពពិសេស។
ថ្លែងក្នុងឱកាសនោះ ឯកឧត្តម នាយឧត្ដមសេនីយ៍ វង្ស ពិសេន បានកោតសរសើរចំពោះបញ្ជាការដ្ឋានជាតិកម្លាំងពិសេសប្រឆាំងភេរវកម្ម បញ្ជាការដ្ឋានទ័ពពិសេស ដែលកន្លងមកបានខិតខំបំពេញភារកិច្ច និងសម្រេចស្នាដៃធំៗជូនជាតិ និងប្រជាជន រួមចំណែកក្នុងកិច្ចការពារបូរណភាពទឹកដី ការពារសន្តិភាព ស្ថិរភាពសង្គម និងសុវត្ថិភាពជូនថ្នាក់ដឹកនាំជាតិ និងអន្តរជាតិ។
ឯកឧត្តម នាយឧត្តមសេនីយ៍ អគ្គមេបញ្ជាការ បានបន្តថា ឆ្លើយតបនឹងគុណូបការៈថ្លៃថ្លានេះ រាជរដ្ឋាភិបាល ក្រសួងការពារជាតិ និងអគ្គបញ្ជាការ បានយកចិត្តទុកដាក់រៀបចំដំឡើងឋានន្តរសក្តិដល់មេបញ្ជាការ បញ្ជាការដ្ឋានជាតិកម្លាំងពិសេសប្រឆាំងភេរវកម្ម មេបញ្ជាការ បញ្ជាការដ្ឋានទ័ពពិសេស និងនាយការិយាល័យទី៣កងទ័ពជើងគោក ដោយអនុវត្តតាមផែនការកែទម្រង់ចាំបាច់និងយូរអង្វែងរបស់កងយោធពលខេមរភូមិន្ទ។
ឯកឧត្តម នាយឧត្តមសេនីយ៍ អគ្គមេបញ្ជាការ មានជំនឿយ៉ាងមុតមាំថា«នាយទាហានដែលទើបទទួលបានការតំឡើងឋានន្តរសក្តិ នឹងបន្តភក្តីភាពឥតងាករេចំពោះជាតិ ពិសេសចំពោះរាជរដ្ឋាភិបាល ដឹកនាំដោយសម្តេចធិបតី ហ៊ុន ម៉ាណែត ក្នុងការបន្តខិតខំដោយស្មារតីទទួលខុសត្រូវខ្ពស់ បំពេញភារកិច្ចដឹកនាំអង្គភាព រួមចំណែកអភិវឌ្ឍន៍កងយោធពលខេមរភូមិន្ទ ឱ្យកាន់តែរីកចម្រើន»។
ឯកឧត្តម នាយឧត្តមសេនីយ៍ អគ្គមេបញ្ជាការ បានផ្តាំផ្ញើដល់ថ្នាក់ដឹកនាំ នាយទាហាន បញ្ជាការដ្ឋានជាតិកម្លាំងពិសេសប្រឆាំងភេរវកម្ម បន្តពង្រឹងប្រព័ន្ធដឹកនាំបញ្ជា រក្សាការសម្ងាត់កងទ័ពឲ្យបានល្អ ក្នុងនោះចាត់តាំងប្រចាំបញ្ជា ពង្រឹងសមត្ថភាព កាយសម្បទាឱ្យបានរឹងមាំ និងគោរពវិន័យឱ្យបានម៉ឹងម៉ាត់បំផុត ដើម្បីក្លាយជាកម្លាំងពិសេសប្រកបដោយថាមពលមុតស្រួច ៕
