ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា អាជ្ញាធរថ្នាក់ក្រោមជាតិ ត្រូវការជួយលើការងារចំនួន ៣ គឺ១. ការប្រគល់សិទ្ធិ, ២. ការផ្តល់លទ្ធភាព និង ៣.ការជួយគាំទ្រ ការពង្រឹងមន្ត្រី និងពង្រឹងស្ថាប័ន ។
ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារថ្មី នៃទីស្តីការក្រសួងមហាផ្ទៃ នាថ្ងៃទី៦ វិច្ឆិកា ២០២៣សម្តេចធិបតី បានដាក់ចេញអនុសាសន៍សំខាន់គន្លឹះចំនួន ៥ សម្រាប់ថ្នាក់ដឹកនាំរាជធានី-ខេត្ត ថ្នាក់ក្រោមជាតិ ដើម្បីយកទៅអនុវត្ត៖ ១. ត្រូវពង្រឹងខ្លួន រៀបចំកែសម្រួលយន្តការនានា គោលការណ៍ស្តង់ដារ ពង្រឹងភាពស្អាតស្អំ, ២. ពង្រឹងការត្រួតពិនិត្យ ការតាមដាននិងគាំទ្រដល់មូលដ្ឋានលើគម្រោងនៃការអនុវត្តឱ្យបានប្រសិទ្ធភាព, ៣. ពង្រឹងយន្តការច្រកចេញចូលតែមួយឱ្យមានប្រសិទ្ធភាព, ៤. ការគ្រប់គ្រងហិរញ្ញវត្ថុ និងប្រើប្រាស់ទ្រព្យសម្បត្តិឱ្យបានល្អ ហើយត្រូវម្ចាស់ការដោះស្រាយបញ្ហា ដោយក្តាប់ឱ្យជាប់បញ្ហាដែលកើតមាននៅមូលដ្ឋានរបស់ខ្លួន និង៥. ខិតខំអភិវឌ្ឍរាជធានី-ខេត្ត និងទាក់ទាញវិនិយោគ និងដៃគូ ដើម្បីបង្កើតភាពទាក់ទាញផ្សេងៗ ។
សម្តេចធិបតីលើកឡើងថា ជាក់ស្តែងនៅជំនាន់កូវីដ១៩ យើងឃើញហើយ រូបមន្តនៅភ្នំពេញមួយទៅ រូបមន្តនៅតាមខេត្តជាប់ព្រំដែនមួយទៅ រូបមន្តនៅតាមខេត្តមួយចំនួន ដែលកន្លែងណាមានពេទ្យច្រើនគ្រប់ យើងធ្វើរូបមន្តដោះស្រាយមួយទៅ កន្លែងណាដែលខ្វះ យើងច្នៃប្រឌិតបែបម៉េច ទីបំផុតយើងសម្រេចបានភារកិច្ចជោគជ័យ ទាន់ពេលវេលា ការពារប្រជាពលរដ្ឋយើង គ្រោះទឹកជំនន់ប៉ុន្មានខែនេះ ឃើញគណៈអភិបាលខេត្ត-រាជធានី បានធ្វើការងារនេះ ដោះស្រាយបានទាន់ពេល ហើយទៅមុខទៀត បញ្ហាជាច្រើនទៀត មិនមែនតែទឹកជំនន់ គ្រោះមហន្តរាយនោះទេ សេវាសាធារណៈ និងការដោះស្រាយផ្សេងៗ ការទប់ស្កាត់ជាមួយនឹងល្បែងស៊ីសង បទល្មើសផ្សេងៗ នៅក្នុងមូលដ្ឋាន ក៏បានត្រូវធ្វើ ចឹងការធ្វើប្រតិភូកម្ម និងការផ្ទេសិទ្ធិនេះ គឺត្រូវបន្ត ។
សម្តេចបញ្ជាក់ថា ការជួយផ្តល់លទ្ធភាព តាមរយៈការផ្តល់ថវិកា ពីថ្នាក់ជាតិទៅក្រោមជាតិ ជាបន្តបន្ទាប់ និងការផ្តល់ការគាំទ្រ ការពង្រឹងមន្ត្រី សមត្ថភាពមន្ត្រី ក៏ដូចជាការជួយពង្រឹងស្ថាប័នថ្នាក់ក្រោមជាតិ គ្រប់ថ្នាក់ទាំងអស់នេះ ពេលខ្លះត្រូវការ ការជំនួយបច្ចេកទេសដំបូង ពីថ្នាក់កណ្តាល ដើម្បីជួយ ហើយកិច្ចការងារនេះ គឺក្រសួងស្ថាប័នជាច្រើន បានធ្វើការហើយ ហើយត្រូវបន្តទៅទៀត ៕
