រដ្ឋបាលខេត្តស្ទឹងត្រែង បំភ្លឺជុំវិញករណីការចាត់វិធានការ លើភាពមិនប្រក្រតីនៃការអនុវត្តគម្រោង សាងសង់ផ្លូវនៅឃុំសេកុង និងឃុំស្រែសំបូរ ស្រុកសៀមប៉ាង
ភ្នំពេញ៖ រដ្ឋបាលខេត្តស្ទឹងត្រែង នៅថ្ងៃទី២៦ ខែតុលា ឆ្នាំ២០២៣ បានចេញសេចក្ដីបំភ្លឺ ស្ដីពីការចាត់វិធានការ លើភាពមិនប្រក្រតីនៃការអនុវត្តគម្រោង សាងសង់ផ្លូវនៅ ឃុំសេកុង និងឃុំស្រែសំបូរ ក្នុងស្រុកសៀមប៉ាង ។
ការបំភ្លឺរបស់រដ្ឋបាលខេត្តស្ទឹងត្រែង ធ្វើឡើងបន្ទាប់ពីបានទទួលព័ត៌មានពីភាពមិនប្រក្រតី នៃការអនុវត្តគម្រោងមូលនិធិឃុំសេកុង និងឃុំស្រែសំបូរ ក្នុងស្រុកសៀមប៉ាង រួចមក រដ្ឋបាលខេត្តស្ទឹងត្រែង បានចាត់តាំងក្រុមការងារខេត្តចុះត្រួតពិនិត្យស្រាវជ្រាវករណីអនុវត្តគម្រោងសាងសង់ផ្លូវនៅឃុំសេកុង និងឃុំស្រែសំបូរ ស្រុកសៀមប៉ាង ដោយមានការចូលរួមពីក្រុមការងារនៃអគារធិការដ្ឋាន ក្រសួងមហាផ្ទៃ ។
ជាលទ្ធផលឃើញថា ឃុំទាំងពីរមានកំហុសឆ្គងផ្នែកនីតិវិធីមួយចំនួនពាក់ព័ន្ធការបង្កើនតម្លៃឯកត្តានៃការបន្ថែមចំនួនលទ្ធផលកិច្ចសន្យាដែលឃុំ មិន បានអនុលោមទៅតាមសៀវភៅណែនាំស្តីពីការអនុវត្តគម្រោងមូលនិធិឃុំ សង្កាត់ (PIM) ដើម្បីដោះស្រាយករណីនេះ រដ្ឋបាលខេត្តបានជូនដំណឹងទៅរតនាគារខេត្តដើម្បីបង្កកសាច់ប្រាក់មិនឱ្យទូទាត់សម្រាប់លទ្ធផលនៃការអនុវត្តកិច្ចសន្យា គម្រោងនៅក្នុងឃុំទាំងពីរឡើយ ដើម្បីធ្វើការត្រួតពិនិត្យឡើងវិញផ្នែកនីតិវិធីបច្ចេកទេស។ ទន្ទឹមនេះ រដ្ឋបាលខេត្ត បានចេញ លិខិតលេខ៣១៨/២៣ ស.ជ.ណ ចុះថ្ងៃទី២១ ខែកញ្ញា ឆ្នាំ២០២៣ ដោយតម្រូវឱ្យរដ្ឋបាលឃុំទាំងពីរខាងលើ ធ្វើការក តម្រូវកិច្ចសន្យានៃការអនុវត្តគម្រោងរបស់ខ្លួនឱ្យស្របតាមនីតិវិធីដេញថ្លៃដូចមានក្នុងសៀវភៅPIM គឺត្រូវយកតម្លៃឯកត្តាដែល ដេញថ្លៃឈ្នះរបស់ក្រុមហ៊ុនសុធីរាជឃិនស្ត្រាក់សិន ជាមូលដ្ឋានសម្រាប់តម្លៃឯកត្តានៃការបន្ថែមចំនួនលទ្ធផលកិច្ចសន្យា។
តម្លៃកិច្ចសន្យាគម្រោងនៃឃុំទាំងពីរមានទឹកប្រាក់សរុប ៧៨៣.៥១០.០០០រៀល
( ប្រាំពីររយប៉ែតសិបបីលានប្រាំរយដប់ពាន់រៀលគត់ ) ក្នុងនោះ គម្រោងសាងសង់ផ្លូវដីស ក្នុងឃុំសេកុង មានចំនួន ៤៤១.០០០.០០០ រៀល ( បួនរយសែសិបមួយលានរៀលគត់ ) ដោយតម្លៃឯកត្ដាដេញថ្លៃឈ្នះ ៨.៥០០.០០០ រៀល ( ប្រាំបីលានប្រាំរយពាន់រៀលគត់ ) ក្នុងមួយគីឡូម៉ែត្រ និងគម្រោង សាងសង់ផ្លូវដីក្រួសក្រហម ក្នុងឃុំស្រែសំបូរ មានចំនួន ៣៤២.៥១០.០០០ រៀល ( បីរយសែសិបពីរលានប្រាំរយដប់ពាន់រៀលគត់ ) ដោយតម្លៃឯកត្ដាដេញថ្លៃឈ្នះ ១៤.០០០.000 រៀល (ដប់បួនលានរៀលគត់) ក្នុងមួយគីឡូម៉ែត្រ ។ ការអនុវត្តគម្រោងសាងសង់ផ្លូវដីស របស់ឃុំសេកុង សម្រេចបាន ៧៥% នៃកិច្ចសន្យាប្រវែង ១៥គីឡូម៉ែត្រ តែត្រូវបានរដ្ឋបាលខេត្តបង្កកសាច់ប្រាក់នៅរតនាគារខេត្ត ( មិនអោយទូទាត់១០០% ) ។
ចំណែកការសាងសង់ផ្លូវគ្រួសក្រហមរបស់ ឃុំស្រែសំបូ សម្រេចបាន ១០០% នៃកិច្ចសន្យាគម្រោងប្រវែង ១០គីឡូម៉ែត្រ និងបានទូទាត់ ( មុនពេលបង្កកសាច់ប្រាក់ ) បាន ៤០% នៃតម្លៃគម្រោងសរុប ស្មើនឹង ១៣៧.០០០.០០០ រៀល (មួយរយសាបសិបប្រាំពីរលានរៀលគត់ ) និងនៅសល់ ៦០% ស្មើនឹង ២០៥.៥៦០.០០០ រៀល (ពីររយប្រាំលានប្រាំរយហុកសិបពាន់រៀលគត់ )។ ដូច្នេះ ថវិកាគម្រោងសាងសង់ផ្លូវក្នុងឃុំទាំងពីរ ដែលនៅសល់មិនទាន់បានទូទាត់ និងបានបង្កកនៅរតនាគារខេត្ត មានចំនួនសរុប ៦៤៦.៥១០.០០០រៀល ( ប្រាំមួយរយសែសិបប្រាំមួយលានប្រាំរយដប់ពាន់រៀលគត់ ) ។ សូមបញ្ចាក់ថា៖ ករណីនេះមិនបង្កឱ្យមានការបាត់បង់ថវិការដ្ឋដោយការកិបកេង ឬឃុបឃិតដើម្បីប្រយោជន៍បុគ្គលណាមួយ ដូចការចុះផ្សាយកន្លងមករបស់បណ្ដាញសារព័ត៌មានមួយចំនួនតូចថាបានបាត់បង់ថវិកាឃុំរហូត ដល់ ៦០០.០០០.០០០ រៀល ( ប្រាំមួយរយលានរៀល ) នោះឡើយ ។
ជាមួយគ្នានេះ ឯកឧត្តមអភិបាលខេត្ត បានណែនាំដល់មន្ត្រីពាក់ព័ន្ធឱ្យអនុវត្តម៉ឺងម៉ាត់ នីតិវិធីបច្ចេកទេសនៃការអនុវត្តគម្រោងមូលនិធិឃុំ សង្កាត់ និងទទួលយកនូវរាល់យោបល់ស្ថាបនា ឬការផ្ដល់ព័ត៌មានផ្សេងៗ របស់សាធារណៈជន អ្នកសារព័ត៌មាននានាក្នុងករណីមានភាពមិនប្រក្រតីណាមួយកើតឡើង។ ទន្ទឹមនឹងនេះ រដ្ឋបាលខេត្តនឹងបន្តចាត់វិធានការចំពោះមន្ត្រី ក៏ដូចជាក្រុមហ៊ុនពាក់ព័ន្ធដែលមានការធ្វេសប្រហែសបង្កនូវកំហុសឆ្គង និងនាំឱ្យមានភាពមិនប្រក្រតីនេះកើតឡើង តាមច្បាប់ជាធរមាន ៕
