សម្តេចតេជោ ហ៊ុន សែន៖ បក្សប្រជាជនចងសម្ព័ន្ធភាព ជាមួយបក្សនយោបាយ ២៧ទៀត មិនមែនជាបញ្ហាកញ្ឆក់កណ្តៀត ដូចសម្ព័ន្ធភាពខ្លះ

ភ្នំពេញ៖ សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បញ្ជាក់ថា ការចងសម្ព័ន្ធភាពរវាងគណបក្សប្រជាជនកម្ពុជា ជាមួយបណ្ដាគណបក្សនយោបាយចំនួន២៧ផ្សេងទៀត មិនមែនជាបញ្ហាកញ្ឆក់កណ្តៀត ដូចសម្ព័ន្ធភាពរបស់គណបក្សនយោបាយខ្លះ ។

ក្នុងឱកាសអញ្ជើញចុះហត្ថលេខាលើកិច្ចព្រមព្រៀងចងសម្ព័ន្ធភាពរវាង គណបក្សប្រជាជនកម្ពុជា ជាមួយបណ្ដាគណបក្សនយោបាយនៅកម្ពុជា ចំនួន២៧ផ្សេងទៀត នៅវិមាន៧មករា ទីស្នាក់ការកណ្ដាលរបស់គណបក្សប្រជាជនកម្ពុជា នាថ្ងៃទី២៥ ខែតុលា សម្ដេចតេជោ ហ៊ុន សែន​ បញ្ជាក់ថា «អ្វីដែលសំខាន់ គោលការណ៍រួមទាំងឡាយ ត្រូវបានឯកភាពគ្នា ដោយដាក់បញ្ចូលទៅក្នុងកិច្ចព្រមព្រៀង សហប្រតិបត្ដិការរបស់យើង មិនមែនជាបញ្ហាកញ្ឆក់កណ្តៀត ដូចសម្ព័ន្ធភាពខ្លះ សំដៅដោះស្រាយបញ្ហាចំពោះមុខ ទៅលើបញ្ហាការបោះឆ្នោតអសកល នៃព្រឹទ្ធសភា ឬប្រឹក្សាក្នុងខែកុម្ភៈ និងខែឧសភា នោះទេ»។

សម្តេចតេជោ ហ៊ុន សែន បានលើកឡើងថា សម្ព័ន្ធភាពរវាងបក្សនយោបាយ២៨ គឺមានគោលដៅយូរអង្វែង សម្រាប់ប្រទេសកម្ពុជា។ សម្តេចថា ការចងសម្ព័ន្ធនេះ ជាការឆ្លុះបញ្ចាំងអំពីសាមគ្គីភាព នៃការថែរក្សាសន្តិភាព និងការអភិវឌ្ឍរបស់កម្ពុជា។

សម្តេចតេជោ ហ៊ុន សែន បានគូសបញ្ជាក់ថា ទោះបីជាយើងខុសគ្នា ត្រង់ចំណុចនេះចំណុចនោះ ប៉ុន្តែយើងស្របគ្នានូវចំណុចធំ សម្រាប់ប្រទេសយើង បើសិនដូចគ្នាទាំងស្រុង វាមិនចាំបាច់មានគណបក្សផ្សេងនោះទេ៕