ក្រសួងមហាផ្ទៃ ត្រៀមខ្លួនរួចជាស្រេច ក្នុងការធ្វើបរិវត្តកម្មឌីជីថល ធ្វើយ៉ាងណាឲ្យការផ្តល់សេវាសាធារណៈ ទៅដល់ពលរដ្ឋកាន់តែមានប្រសិទ្ធភាព និងឆាប់រហ័ស
ភ្នំពេញ៖ ឯកឧត្តម នាយឧត្តមសេនីយ៍ ប៉ោ ភក្តិ រដ្ឋលេខាធិការ ក្រសួងមហាផ្ទៃ បានមានប្រសាសន៍ថា ក្រសួងមហាផ្ទៃ បានត្រៀមខ្លួនរួចជាស្រេច ក្នុងការធ្វើបរិវត្តកម្មឌីជីថល ដើម្បីធ្វើយ៉ាងណាអោយការផ្តល់សេវាសាធារណៈទៅដល់ប្រជាពលរដ្ឋកាន់តែមានប្រសិទ្ធភាព និងឆាប់រហ័ស ដោយក្រសួងមហាផ្ទៃ បានរៀបចំផែនការសកម្មភាពធំៗចំនួន១៤ចំនុច ដែលទាក់ទងទៅនឹងការងារបច្ចេកវិទ្យាឌីជីថលនេះ។
ឯកឧត្តម នាយឧត្តមសេនីយ៍ រដ្ឋលេខាធិការ បានមានប្រសាសន៍បែបនេះ ក្នុងឱកាសអញ្ជើញជាវាគ្និនក្នុងសន្និសីទ ស្តីពីការជំរុញអភិបាលកិច្ច និងបច្ចេកវិទ្យាឌីជីចល ហៅកាត់ថា GovTech ក្រោមប្រធានបទ ស្ថានភាពបច្ចុប្បន្ន និងគោលដៅអនាគត នៃបរិវត្តកម្មរដ្ឋាភិបាលឌីជីថល នាព្រឹកថ្ងៃអង្គារ ទី២៤ ខែតុលា ឆ្នាំ២០២៣ ដែលប្រព្រឹត្តិទៅនៅមជ្ឈមណ្ឌលនវានុវត្តន៍ឌីជីថលនៃបណ្ឌិត្យសភាបច្ចេកវិទ្យាឌីជីថលកម្ពុជា។
ឯកឧត្តម នាយឧត្តមសេនីយ៍ បានមានប្រសាសន៍បន្ថែមថា តាមរយៈការសិក្សាបន្ថែមលើចំនុចគោលទាំង១៤នេះ ក្រសួងមហាផ្ទៃ បានកសាងនូវផែនការយុទ្ធសាស្រ្តឌីជីថលនេះសម្រាប់រយៈពេល៥ឆ្នាំ (២០២៣-២០២៧) ដោយក្នុងនោះក្រសួងមហាផ្ទៃ បានកំណត់នូវគោលដៅសំខាន់ចំនួន៤ គឺការងាររដ្ឋបាលនៅសេវាសាធារណៈ, ជំនាញបច្ចេកទេស, សុវត្ថិភាពសាយប័រ, និងការងារស្រាវជ្រាវ នវានុវត្តន៍ ឌីជីថលនិងការបណ្តុះបណ្តាល។ ឯកឧត្តមរដ្ឋលេខាធិការបានបន្តទៀតថា ដើម្បីគាំទ្រចំពោះគោលដៅខាងលើ គឺមានយុទ្ធសាស្រ្តចំនូន៦ រួមមាន៖ ការបណ្តុះបណ្តាលធនធានមនុស្ស, ការបញ្ជ្រាបចំណេះដឹង, ការកសាងហេដ្ឋារចនាសម្ព័ន្ធ និងបច្ចេកវិទ្យាឌីជីថល, ការពង្រឹងសន្តិសុខ ទប់ស្កាត់បទល្មើសបច្ចេកវិទ្យា, ការស្រាវជ្រាវអភិវឌ្ឈន៍ និងនវានុវត្តន៍បច្ចេកវិទ្យា, ការពង្រឹងនូវគុណភាពការងារសេវាសាធារណៈ, និងអភិបាលកិច្ចបច្ចេកវិទ្យា។
ឯកឧត្តមបានបន្ថែមថា ក៏នៅមានយន្តការ និងចង្កោមសកម្មភាពជាច្រើនទៀត ដើម្បីគាំទ្រ និងធ្វើយ៉ាងណាសម្រេចនូវចក្ខុវិស័យ និងបេសកម្មរយៈពេល៥ឆ្នាំ របស់ក្រសួងមហាផ្ទៃ លើការងារឌីជីថលនេះផងដែរ។ ឯកឧត្តម នាយឧត្តមសេនីយ៍ រដ្ឋលេខាធិការ ក៏បានគូសបញ្ជាក់បន្ថែមដែរថា បច្ចុប្បន្នអគារថ្មីទីស្តីការក្រសួងមហាផ្ទៃគឺមានប្រព័ន្ធឌីជីថល ដើម្បីប្រើប្រាស់សម្រាប់ដំណើការប្រចាំថ្ងៃរហូត២០ប្រព័ន្ធ ដែលអាចបង្កលក្ខណងាយស្រួលដល់ថ្នាក់ដឹកនាំ ក៏ដូចជាមន្រ្តីរាជការទាំងអស់ក្នុងការបំពេញកិច្ចការងារ រួមទាំងត្រួតពិនិត្យគ្រប់ទីតាំងទាំងអស់នៅក្នុងក្រសួងនៅគ្រប់ពេលដែលពួកគាត់បានបំពេញការងារ។
ជាមួយគ្នានោះដែរ លោក ឧត្តមសេនីយ៍ទោ គឹម សេរីវុឌ្ឍ អនុប្រធាននាយកដ្ឋាន នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានមានប្រសាសន៍ផងដែរថា អគ្គនាយកបច្ចេកវិទ្យាឌីជីថល និងផ្សព្វផ្សាយអប់រំ មានតួនាទីជាសេនាធិការជូនក្រសួងមហាផ្ទៃ ក្នុងការរៀបចំ និងគ្រប់គ្រងផែនការយុទ្ធសាស្រ្តបច្ចេកវិទ្យាឌីជីថលរបស់ក្រសួង ដោយក្នុងនោះគឺមានគ្រប់សេវាសាធារណៈទាំងអស់។ លោកបានបន្តថា សម្រាប់ការងារជម្រុញអោយមានការប្រើប្រាស់បច្ចេកវិទ្យាឌីជីថល ប្រកបដោយប្រសិទ្ធភាព និងសុវត្ថិភាព អគ្គនាយកដ្ឋាន បានធ្វើការជម្រុញការផ្សព្វផ្សាយ និងបណ្តុះបណ្តាលធនធានមនុស្សផ្ទៃក្នុងរបស់អគ្គនាយកដ្ឋាន ព្រមជាមួយការជម្រុញការយល់ដឹងទៅដល់ប្រជាពលរដ្ឋតាមរយៈការផលិតជាវិដេអូអប់រំខ្លីៗទាក់ទងនឹងចំណេះដឹងបច្ចេកវិទ្យា រួមជាមួយករណីថ្មីៗដែលបានកើតឡើងផងដែរ។
សូមបញ្ជាក់ផងដែរថា សន្និសីទស្ដីពី “ការជំរុញអភិបាលកិច្ច និងបច្ចេកវិទ្យាឌីជីថល” ហៅកាត់ថាសន្និសីទ GovTech គឺជាសន្និសីទលើកដំបូងសម្រាប់កម្ពុជា ដែលធ្វើឡើងដើម្បី ជាវេទិកាប្រមូលផ្ដុំសម្រាប់មន្ត្រីបច្ចេកទេសឌីជីថលពីបណ្តាក្រសួង ស្ថាប័ន អ្នកតំណាងខាងវិស័យឯកជន និងអ្នកតំណាងដៃគូអភិវឌ្ឍន៍ ចែករំលែកបទពិសោធ ឧត្តមានុវត្ត និងករណីសិក្សាពាក់ព័ន្ធនឹងអភិបាលកិច្ច និងបច្ចេកវិទ្យាឌីជីថល និងបង្កើនភាពស្និទស្នាល បង្កើតដៃគូសហការ និងពិភាក្សាផ្លាស់ប្ដូរបទពិសោធន៍អំពីបច្ចេកវិទ្យាឌីជីថលចុងក្រោយ កាលានុវត្តភាព និងបញ្ហាប្រឈមនានានៅក្នុងបច្ចេកវិទ្យារដ្ឋាភិបាលឌីជីថល៕
