អគ្គស្នងការនគរបាលជាតិ ត្រៀមកម្លាំងអន្តរាគមន៍ ២៤ម៉ោងលើ ២៤ម៉ោង ដើម្បីសង្គ្រោះអគ្គីភ័យ ឬហេតុការណ៍គ្រោះថ្នាក់ផ្សេងៗ ក្នុងពិធីបុណ្យភ្ជុំបិណ្ឌ

ភ្នំពេញ៖ អគ្គស្នងការដ្ឋាននគរបាលជាតិ បានត្រៀមកម្លាំងអន្តរាគមន៍ ២៤ម៉ោងលើ ២៤ម៉ោង ដើម្បីសង្គ្រោះអគ្គិភ័យ ឬហេតុការណ៍គ្រោះថ្នាក់ផ្សេងៗ ដើម្បីជួយសង្គ្រោះប្រជាពលរដ្ឋ នៅពេលមានគ្រោះមហន្តរាយ ជាយថាហេតុ នៅក្នុងពិធីកាន់បិណ្ឌ និងភ្ជុំបិណ្ឌ ដែលនឹងប្រព្រឹត្តទៅ ពីថ្ងៃទី ១៣ ដល់ថ្ងៃទី ១៥ ខែតុលា ឆ្នាំ២០២៣។

ឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យ អគ្គស្នងការ ដ្ឋាននគរបាលជាតិ បានមានប្រសាសន៍ថា ពាក់ព័ន្ធនឹងកិច្ចការពារសន្តិសុខ សណ្តាប់ធ្នាប់ របៀបរៀបរយ និងសុវត្ថិភាពជាទូទៅ ក្នុងឱកាសបុណ្យភ្ជុំបិណ្ឌ កាន់បិណ្ឌ ប្រពៃណីជាតិ ដែលចាប់ផ្តើមពីថ្ងៃទី ១ រហូតដល់ថ្ងៃទី ១៥ ខែតុលា ឆ្នាំ២០២៣ អគ្គស្នងការដ្ឋាននគរបាលជាតិ បានចេញសេចក្តីណែនាំ ស្តីពីវិធានការការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម សម្រាប់ឱកាសបុណ្យកាន់បិណ្ឌ និងបុណ្យភ្ជុំបិណ្ឌ ប្រពៃណីជាតិ ដែលក្នុងនោះ បានណែនាំដល់ស្នងការនគរបាល រាជធានី ខេត្ត និងនាយកដ្ឋានអង្គភាពជំនាញទាំងអស់ ដែលពាក់ព័ន្ធជាមួយសមត្ថកិច្ច ក្នុងកិច្ចការពារសន្តិសុខនេះ ឲ្យយកចិត្តទុកដាក់ ពង្រឹងការក្តាប់សភាពការណ៍សន្តិសុខ សណ្តាប់ធ្នាប់ ជាពិសេសបង្ការនូវសកម្មភាពផ្សេងៗ ដែលអាចបង្កចលាចលសង្គម ឬភេវរកម្ម និងត្រៀមម្ចាស់ ការចាត់វិធានការទប់ស្កាត់ និងបង្ក្រាប។ ជាពិសេសជម្រុញ ការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព ដោយគ្រប់គ្រងឲ្យបាន នូវតម្រុយមុខសញ្ញានានា នៅតាមមូលដ្ឋាន។ ហើយប្រើប្រាស់វិធានការជំនាញ ដើម្បីគ្រប់គ្រងពួកគាត់ មិនឱ្យធ្វើសកម្មភាពផ្តេសផ្តាស ដែលបង្កឲ្យមានអសន្តិសុខ ឬគ្រោះថ្នាក់ដល់អាយុជីវិតប្រជាពលរដ្ឋ ឬក៏អន្តរាយ ដល់ទ្រពសម្បត្តិជាដើម។

អគ្គស្នងការដ្ឋាននគរបាលជាតិ បានបន្តថា សំខាន់បង្កើនវិធានការសន្តិសុខ សណ្តាប់ធ្នាប់ របៀបរៀបរយ និងចរាចរណ៍ នៅតាមគោលដៅ នៃការប្រារព្ធពិធីបុណ្យ ហើយនិងការពារគ្រប់ព្រះរាជដំណើរ របស់អង្គព្រះមហាក្សត្រ ថ្នាក់ដឹកនាំកំពូលៗ និងឥស្សរជនផ្សេងៗ អញ្ជើញទៅកាន់បិណ្ឌ និងបុណ្យភ្ជុំបិណ្ឌ។ អ្វីដែលយើងយកចិត្ត ទុកដាក់បន្ថែម គឺការកំណត់ឲ្យមានផែនការ ក្នុងការល្បាតយាមកាម នៅតាមមូលដ្ឋាន។

ឧត្តមសេនីយ៍ឯក ឆាយ គឹមខឿន បានបញ្ជាក់ថា ក្រៅពីនេះ ក៏នៅតែរឹតបន្តឹង ការអនុវត្តច្បាប់ចរាចរណ៍ ដោយមានផែនការរៀបចំសម្រួលចរាចរណ៍ នៅតាមដង ផ្លូវជាតិ ច្រកចេញចូលរាជធានី ខេត្ត ទីប្រជុំជន គោលដៅផ្សេងៗ ជាពិសេសគោលដៅ ទីវត្តអារាម រមណីយដ្ឋាន ដើម្បីបញ្ចៀសការកកស្ទះចរាចរណ៍ មានលំហូរចរាចរណ៍ និងរៀបចំសណ្តាប់ធ្នាប់ចរាចរណ៍ផងដែរ។

អ្នកនាំពាក្យ បានបញ្ជាក់ថា អគ្គស្នងការដ្ឋាននគរបាលជាតិ បានត្រៀមកម្លាំងអន្តរាគមន៍ ២៤ម៉ោងលើ ២៤ម៉ោង ដើម្បីសង្គ្រោះអគ្គិភ័យ ឬហេតុការណ៍គ្រោះថ្នាក់ផ្សេងៗ ដើម្បីជួយសង្គ្រោះប្រជាពលរដ្ឋ នៅពេលមានគ្រោះមហន្តរាយ ជាយថាហេតុ។

ជាមួយគ្នានេះ អ្នកនាំពាក្យអគ្គស្នងការដ្ឋាននគរបាលជាតិ ក៏បានអំពាវនាវដល់ ប្រជាពលរដ្ឋ សូមប្រុងប្រយ័ត្ន ចំពោះភ្លើងធូប ទៀន ជាពិសេសនៅពេលចាកចេញ ចោលផ្ទះ ពន្លត់ភ្លើងចង្ក្រាន ភ្លើងធូប ទៀន និងពិនិត្យមើលគ្រឿងឧបករណ៍ប្រើប្រាស់ និងចរន្តអគ្គិសនីនៅក្នុងផ្ទះ ជៀសវាងនៅពេលដែលយើងអត់នៅ និងអត់បានពន្លត់វា អាចបង្កឲ្យមានអគ្គិភ័យដែរ៕