ខេត្តបន្ទាយមានជ័យ បើកអង្គសិក្ខាសាលាស្តីពី ការផ្សព្វផ្សាយច្បាប់ស្តីពីសវនកម្ម និងស្តង់ដារសវនកម្មសាធារណៈ នៃកម្ពុជា
ភ្នំពេញ៖ ឯកឧត្តមបណ្ឌិត សួន សីទ្ធី អគ្គសវនកររងនៃអាជ្ញាធរសវនកម្មជាតិ បានអញ្ជើញជាអធិបតីភាពបើក អង្គសិក្ខាសាលាស្តីពី ការផ្សព្វផ្សាយច្បាប់ស្តីពីសវនកម្ម និងស្តង់ដារសវនកម្មសាធារណៈ នៃព្រះរាជាណាចក្រកម្ពុជា ជូនដល់លោក-លោកស្រី មន្ទីរ/អង្គភាពនានាជុំវិញខេត្ត អភិបាលស្រុក ក្រុង មេឃុំ-ចៅសង្កាត់ សិក្ខាកាម នៅខេត្តបន្ទាយមានជ័យ ប្រារព្ធធ្វើឡើងនៅសាលប្រជុំ ធំ សាលាខេត្តបន្ទាយមានជ័យ។
មានមតិចូលរួម ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ជម្រុញដល់សិក្ខាកាម ទាំងអស់ត្រូវយកចិត្តទុកដាក់ស្តាប់នូវបទបង្ហាញ ពីព្រោះសិក្ខាសាសានេះពិតជាមានសារសំខាន់ណាស់ ការធ្វើសវនកម្ម គឺជាកញ្ចក់ឆ្លុះជូនប្រមុខរាជរដ្ឋាភិបាល ឲ្យមើលឃើញនូវរាល់បញ្ហាខ្វះខាតនានា ដែលជាការគ្រប់គ្រងហិរញ្ញវត្ថុពុំទាន់បានល្អគ្រប់ជ្រុងជ្រោយ វិធីរង្វាស់បាននូវគុណតម្លៃនៃប្រតិបត្តិការហិរញ្ញវត្ថុ ជួយផ្ដល់នូវសុវត្ថិភាពនៃកិច្ចប្រតិបត្តិការហិរញ្ញវត្ថុសាធារណៈ ជួយពង្រឹងគណនេយ្យភាពលើយន្តការគ្រប់គ្រងមូលនិធិនិងទ្រព្យសម្បត្តិសាធារណៈ ជួយជំរុញឲ្យ មានតម្លាភាពលើការគ្រប់គ្រងហិរញ្ញវត្ថុ ជាពិសេសគឺពង្រឹងសមត្ថភាពស្ថាប័នឲ្យក្លាយជា ស្ថាប័ន ដែលមានទំនុកចិត្តពីមហាជន។
ឯកឧត្តមបណ្ឌិត សួន សីទ្ធី មានប្រសាសន៍ឱ្យដឹងថា ៖ ស្ដង់ដារសវនកម្មសាធារណៈនៃព្រះរាជាណាចក្រកម្ពុជា គឺជាផ្នែកមួយនៃនីតិវិធីសម្រាប់ ឱ្យសវនករអនុវត្តការងារ និងជារង្វាស់សម្រាប់វាស់វែងគុណតម្លៃនៃកិច្ចប្រតិបត្តិការងារសវនកម្ម ប្រកបដោយការទទួលខុសត្រូវខ្ពស់ ដើម្បីធានាបាននូវលទ្ធផលសវនកម្មដែលមានគុណភាព ស្របតាមទស្សន: វិស័យនៃអាជ្ញាធរសវនកម្មជាតិដែលបានកំណត់ថា “អាជា្ញធរសវនកម្មជាតិ ជួយរាជរដ្ឋាភិបាល ដើម្បីគ្រប់គ្រងធនធានសាធារណៈ ដោយហ្មត់ចត់ និងជួយលើការ ទទួលខុសត្រូវផ្នែកសាធារណៈ តាមរយៈការធ្វើសវនកម្មប្រកបដោយគុណភាព ទាន់ពេលវេលា និងជឿទុកចិត្ត”។ ឯកឧត្តម បន្តថា ស្តង់ដារសវនកម្មសាធារណៈ ក៏ជាឧបករណ៍គតិយុត្តសម្រាប់ឱ្យអង្គភាពរងសវនកម្មចាំបាច់ត្រូវស្វែងយល់ ដើម្បីងាយស្រួលក្នុងការសហការ និងសម្របសម្រួល លើកិច្ចការងារសវនកម្មជាមួយអាជ្ញាធរសវនកម្មជាតិ។
អគ្គសវនកររងនៃអាជ្ញាធរសវនកម្មជាតិ បញ្ជាក់ថា៖ គោលការណ៍គ្រឹះនៃស្តង់ដារសវនកម្ម-សាធារណៈ សង្កត់ធ្ងន់ទៅលើគោលការណ៍ឯករាជ្យភាព សមត្ថភាព ការប្រកាន់ភ្ជាប់នូវវិជ្ជាជីវៈ ការរៀបចំផែនការសវនកម្ម ការពិនិត្យតាមដានការអនុវត្ត និងភស្តុតាងពាក់ព័ន្ធ ដែលជឿទុកចិត្ត ដើម្បីគាំទ្រសេចក្តីសន្និដ្ឋាន និងរបាយការណ៍សវនកម្ម។ ក្រៅអំពីស្តង់ដារសវនកម្មសាធារណៈ នៃព្រះរាជាណាចក្រកម្ពុជា អាជ្ញាធរសវនកម្មជាតិ នឹងរៀបចំជាគោលការណ៍ណែនាំលម្អិតស្តីពី “ស្តង់ដារសវនកម្មសាធារណៈ” សម្រាប់សម្រួលដល់ដំណើរការការអនុវត្តមុខងារសវនកម្ម៕
