បណ្ឌិត ហ៊ុន ម៉ាណែត៖ ការដាក់ផែនការ មិនអាចជោគជ័យឡើយ បើគ្មានយន្តការតាមដាន ត្រួតពិនិត្យជាប្រចាំ

ភ្នំពេញ៖ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា ការដាក់ផែនការទាំងឡាយណា នឹងមិនអាចជោគជ័យបានឡើយ ប្រសិនបើគ្មានយន្តការតាមដាន ត្រួតពិនិត្យទេនោះ ព្រោះនៅក្នុងការអនុវត្ត ផែនការសកម្មភាព គឺមានបញ្ហាដែលត្រូវរកដំណោះស្រាយជាប់ជាប្រចាំ។

ក្នុងឱកាសជួបសំណេះសំណាល ជាមួយកម្មករ កម្មការនីជិត២ម៉ឺននាក់នៅតំបន់ព្រៃស្តឺ នាថ្ងៃទី២៩ ខែសីហាឯកឧត្តមកិត្តិទេសាភិបាលបណ្ឌិត បញ្ជាក់ថា «ខ្ញុំជឿថា ស្អីក៏ដោយត្រូវតែធានាប្រសិទ្ធិភាព តាមរយៈការមានយន្តការតាមដានត្រួតពិនិត្យជាប់ជាប្រចាំ បើអត់ទេ យើងនឹងមិនជោគជ័យប៉ុន្មានទេ។ ៦ខែបូកសរុប វាយតម្លៃហើយ ធ្វើរបាយការណ៍ហើយចប់ តែបើតាមដាន គឺដោះស្រាយជាប្រចាំ» ។

កិត្តិទេសាភិបាលបណ្ឌិត ហ៊ុន ម៉ាណែត លើកឡើងថា នៅក្នុងរាជរដ្ឋាភិបាលយើងក៏បង្កើត និងពង្រឹងយន្តការតាមដាន យើងមានយន្តការតាមដានក្នុងក្របខណ្ឌសម្របសម្រួល អនុវត្តគោលនយោបាយបញ្ចកោណ ដោយទីស្តីការគណៈរដ្ឋមន្ត្រី។ ហើយមានក្របខណ្ឌគោលនយោបាយ ដោយគណៈកម្មការគោលនយោបាយដែលមានយន្តការតាមដានត្រួតពិនិត្យការអនុវត្តកម្មវិធី សកម្មភាពជាសំខាន់ មិនមែនដាក់ចោល និយាយឱ្យតែពិរោះ ហើយគ្មានអីតាមដាននោះទេ ៕