រដ្ឋដូមីនីកែន÷កាកបាទក្រហម Dominican បាននិយាយនៅក្នុងសេចក្តីថ្លែងការណ៍មួយថា មនុស្សយ៉ាងហោចណាស់ ១២ នាក់បានស្លាប់ និង ៦៥ នាក់ទៀតបានរងរបួសនៅក្នុងការផ្ទុះមួយនៅក្នុងសាធារណរដ្ឋដូមីនីកែន។
យោងតាមសេចក្តីថ្លែងការណ៍កាលពីថ្ងៃអង្គារបានឱ្យដឹងថា មនុស្សចំនួន ៥៥ នាក់ក៏កំពុងបាត់ខ្លួនផងដែរបន្ទាប់ពីឧប្បត្តិហេតុកាលពីថ្ងៃចន្ទដែលបានកើតឡើងនៅក្នុង Villa Valdez ខេត្ត San Cristobal ។កាកបាទក្រហមបានបន្ថែមថា សំណង់ចំនួនបីបានដួលរលំទាំងស្រុងបន្ទាប់ពីការផ្ទុះនៅជិតមជ្ឈមណ្ឌលផ្សារទំនើបមួយ។
នៅក្នុងការកត់សម្គាល់ពីវិមានជាតិកាលពីថ្ងៃចន្ទ ប្រធានាធិបតី Luis Abinader បានសម្តែងការព្រួយបារម្ភរបស់គាត់ចំពោះស្ថានភាពនេះ ហើយបាននិយាយថាគាត់កំពុងតាមដានយ៉ាងដិតដល់នូវព្រឹត្តិការណ៍នានា នេះបើតាមការផ្សាយរបស់ស្ថានីយ៍ទូរទស្សន៍រដ្ឋ RTVD Central ៤ Noticias បានរាយការណ៍។
សេវាសង្គ្រោះបន្ទាន់បានអោយដឹងថា Abinader បានបញ្ជាឱ្យចល័តសេវាសង្គ្រោះបន្ទាន់ រួមទាំងរថយន្តសង្គ្រោះ ២០ គ្រឿង និងរថយន្តពន្លត់អគ្គីភ័យ ១៤ គ្រឿង ដើម្បីឆ្លើយតបទៅនឹងឧបទ្ទវហេតុនេះ។
ប្រភពព័ត៌មាន: CNN NEWS
ប្រែសំរួលដោយ: យ៉េន សុវណ្ណារ៉ា
