បង្រ្កាបករណីជួញដូរគ្រឿងញៀនជាង ៣០គីឡូក្រាម ឃាត់ខ្លួនជនសង្ស័យជាជាងម៉ូតូម្នាក់ នៅកណ្ដាលក្រុងបាត់ដំបង

ភ្នំពេញ៖ កម្លាំងកងរាជអាវុធហត្ថខេត្តបាត់ដំបង បានធ្វើការស្រាវជ្រាវបង្រ្កាបគ្រឿងញៀន ទ្រង់ទ្រាយធំមួយករណីនៅកណ្តាលក្រុងបាត់ដំបង ដោយរឹបអូសបានគ្រឿងញឿន ប្រភេទមេតំហ្វេតាមីន (ICE) ជាង៣០គីឡូក្រាម និងឃាត់ខ្លួនជនសង្ស័យបានម្នាក់ កាលពីម៉ោង១និង៣០នាទី ថ្ងៃទី១៩ ខែមិថុនា ឆ្នាំ២០២៣ ។

ឧត្តមសេនីយ ហែម វុទ្ធី មេបញ្ជាការកងរាជអាវុធហត្ថខេត្តបាត់ដំបងមានប្រសាសន៍ថាតាមព័ត៌មានបឋម កម្លាំងអាវុធហត្ថខេត្តរឹបអូសបានថ្នាំញៀន៣១គីឡី៣ខាំ និង ឃាត់ខ្លួនជនសង្ស័យម្នាក់កំពុងត្រៀម រៀបចំសំណុំ រឿងទៅកាន់តុលាការ និង បន្តស្រាវជ្រាវអ្នកពាក់ព័ន្ធផ្សេងទៀត ។

តាមរបាយការណ៍របស់សមត្ថកិច្ចអោយដឹងថា ជនសង្ស័យដែលឃាត់ខ្លួនបាននេះឈ្មោះ ថោង សូស៊ីវិន ភេទប្រុស អាយុ២៣ឆ្នាំ មុខរបរជាងម៉ូតូ រស់នៅភូមិបោះពោធិ ឃុំអូរដំបង១ ស្រុកសង្កែ ខេត្តបាត់ដំបង ។

ជនសង្ស័យនេះត្រូវបានឃាត់ខ្លួននៅភូមិកាប់គោថ្មី សង្កាត់អូរចារក្រុងបាត់ដំបង ដកហូតវត្ថុតាង លើកទីមួយ បានគ្រឿងញៀនប្រភេទមេតំហ្វេតាមីន ចំនួន៦កញ្ចប់ ទម្ងន់(1338,84ក្រាម) ជញ្ជីងថ្លឹងមួយ ទូរស័ព្ទពីរគ្រឿង ម៉ូតូមួយគ្រឿង -លុយបាត 1200 បាត , លុយដុល្លារ 100 ដុល្លារ , ប្រាក់រៀល 4,000,000 រៀល ,អត្តសញ្ញាណប័ណ្ណខ្មែរ 01 សន្លឹក និង ផ្លាកលេខម៉ូតូ ចំនួន 02 សន្លឹក។

របាយការណ៍មន្រ្តីអាវុធហត្ថខេត្តបន្ថែមថា ក្រោយពីឃាត់ខ្លួននិងធ្វើការសាកសួរជនសង្ស័យបានសារភាពថា ខ្លួនមានគ្រឿងញៀនមួយចំនួនទៀតដែលជារបស់មេក្លោងរបស់ខ្លួន ឲរក្សាទុកនៅក្នុងបន្ទប់ជួល ស្ថិតនៅភូមិចំការឬស្សី សង្កាត់ព្រែកព្រះស្តេច ក្រុងបាត់ដំបង។ នៅ ថ្ងៃខែឆ្នាំដ៏ដែល កម្លាំងជំនាញអាវុធហត្ថខេត្តបានចុះទៅដល់បន្ទប់ជួលខាងលើ ធ្វើការឆែកឆេរ រកឃើញ គ្រឿងញៀនប្រភេទមេតំហ្វេតាមីនម៉ាទឹកកក(ice)ចំនួន41កញ្ចប់ទម្ងន់ 30374,5 ក្រាម ដោយសរុបការដកហូតទាំងពីរលើក បានគ្រឿងញៀនមេតំហ្វេតាមីន ចំនួន 47 កញ្ចប់ ទម្ងន់ 31713,34 ក្រាម ស្មើនឹងជាង៣១គីឡូក្រាម ។

បច្ចុប្បន្ន ជនសង្ស័យ និងវត្ថុតាង កំពុងឃាត់ខ្លួននៅការិយាល័យជំនាញអនុវត្តតាមនីតិវិធី ៕