ឯកឧត្តម ជួប ប៉ារីស៍ នាំយកសម្ភារៈការិយាល័យ ទទួលបានពីគម្រោងរេដបូកដែនជម្រកសត្វព្រៃកែវសីមា នៃក្រសួងបរិស្ថាន និងអង្គការសមាគមអភិរក្សសត្វព្រៃកម្ពុជា ប្រគល់ជូនរដ្ឋបាលស្រុកស្នួល ខេត្តក្រចេះ

ភ្នំពេញ៖ ឯកឧត្តម ជួប ប៉ារីស៍ អនុរដ្ឋលេខាធិការក្រសួងបរិស្ថាន និងជាមន្រ្តីបង្គោលរេដបូកជាតិ បាននាំយកសម្ភារៈការិយាល័យ ទទួលបានពីគម្រោងរេដបូកដែនជម្រកសត្វព្រៃកែវសីមា នៃក្រសួងបរិស្ថាន និងអង្គការសមាគមអភិរក្សសត្វព្រៃកម្ពុជា (Wildlife Conservation Society -WCS)ប្រគល់ជូនដល់រដ្ឋបាលស្រុកស្នួល ខេត្តក្រចេះ នៅថ្ងៃទី១៦ ខែមិថុនា ឆ្នាំ២០២៣។

ក្នុងឱកាសនោះ ឯកឧត្តមអនុរដ្ឋលេខាធិការ បានថ្លែងអំណរគុណវត្តមាន ឯកឧត្តម ធន់ វឌ្ឍនា សាកលវិទ្យាធិការសាលាជាតិកសិកម្មព្រែកលៀប តំណាងអគ្គាធិកា អគ្គនាយក នៃក្រសួងបរិស្ថាន មន្ទីរបរិស្ថានខេត្ត អង្គការWCS អាជ្ញាធរដែនដី និងស្ថាប័នពាក់ព័ន្ធដែលបានចូលរួមសហការ ក្នុងការអភិរក្សធនធានធម្មជាតិក្នុងដែនជម្រកសត្វព្រៃកែវសីមា ដែលធ្វើឱ្យតំបន់នេះ អាចអនុវត្តន៍គម្រោងរេដបូកប្រកបដោយជគជ័យ និងធ្វើឱ្យដែនជម្រកសត្វព្រៃនេះ ក្លាយជាតំបន់ការពារធម្មជាតិមាននិរន្តភាពហិរញ្ញវត្ថុសម្រាប់ការងារអភិរក្ស និងការលើកកម្ពស់ជីវភាពរស់នៅរបស់សហគមន៍មូលដ្ឋាន។

សូមបញ្ជាក់ដែរថា កម្មវិធីនេះក៏មានការចូលរួមពីឯកឧត្តម កែនសេរីរដ្ឋា អគ្គនាយកចំណេះដឹងនិងព័ត៌មានបរិស្ថាន និងជាប្រធានលេខាធិការដ្ឋានរឹដបូកជាតិ លោក ឌួង ឆាយសាវុធ ប្រធានមន្ទីរបរិស្ថានខេត្តក្រចេះ និងជាតំណាងរដ្ឋបាលខេត្ត លោកអភិបាលស្រុកស្នួល តំណាងអង្គការ WCS លោក លោកស្រី រដ្ឋបាលស្រុក និងមន្រ្តីឧទ្យានុរក្ស ជាច្រើនរូបទៀត។ ដោយឡែក សម្ភារៈការិយាល័យដែលប្រគល់ជូនរ រួមមាន៖ ម៉ាស៊ីនថតចម្លង ចំនួន១គ្រឿង ម៉ាស៊ីនព្រីន ចំនួន២គ្រឿង កុំព្យូរទ័រយួរដៃ ចំនួន២គ្រឿង និងឧបករណ៍បញ្ចាំង (LCD) ចំនួន ១ឈុត៕