រដ្ឋមន្រ្តីក្រសួងអប់រំ៖ ក្រោមការដឹកនាំ របស់សម្តេចតេជោ បាននាំមកនូវសុខសន្តិភាព ហើយសន្តិភាពនេះពិតជាធ្វើឱ្យយើងមានលទ្ធភាពកសាងសមិទ្ធិផលជាច្រើននៅក្នុងមូលដ្ឋានរបស់យើង

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា និងលោកស្រី ស្តិបហ្វានី សែលឡេ នាយិកា អង្គការពិភពកុមារ និងអភិវឌ្ឍន៍ ប្រចាំនៅកម្ពុជា នៅថ្ងៃទី១៤ ខែមិថុនា ឆ្នាំ២០២៣ បានអញ្ជើញជាអធិបតីក្នុងពិធីសម្ពោធទារកដ្ឋាននៅសាលាបឋមសិក្សាហ៊ុន សែនកងតាណឹង និងសម្ពោធអគារសិក្សា ២ខ្នង នៅវិទ្យាល័យ ហ៊ុន សែន កងតាណឹង និងសមិទ្ធផលផ្សេងៗនៅក្នុងមូលដ្ឋានឃុំកងតាណឹង ស្រុកកងមាស ខេត្តកំពង់ចាម។ ដោយមានការចូលរួមពីឯកឧត្តម លោកជំទាវ លោក លោកស្រី ថ្នាក់ដឹកនាំក្រសួងអប់រំ យុវជន និងកីឡា អាជ្ញាធរដែនដី មាតាបិតា លោកគ្រូ អ្នកគ្រូ និងសិស្សានុសិស្ស នៅឃុំកងតាណឹងជាច្រើនរូបផងដែរ។

​ឯកឧត្តមបណ្ឌិតសភាចារ្យ ហង់ជួន ណារ៉ុន បានលើកឡើងថា ក្រោមការដឹកនាំដ៏ឈ្លាស់វៃ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បាននាំមកនូវសុខសន្តិភាព ហើយសន្តិភាពនេះពិតជាធ្វើឱ្យយើងមានលទ្ធភាពកសាងសមិទ្ធិផលជាច្រើននៅក្នុងមូលដ្ឋានរបស់យើង ដើម្បីជួយសម្រួលដល់ការរស់នៅរបស់ប្រជាពលរដ្ឋ។

ឯកឧត្តមបណ្ឌិតសភាចារ្យ បានបញ្ជាក់ថា ជាក់ស្តែងនៅក្នុងស្រុកកងមាសទាំងមូលបានទទួលសមិទ្ធិផលថ្មីៗជាច្រើនជាបន្តបន្ទាប់ ដូចជាផ្នូវថ្នល់ មណ្ឌលសុខភាព ជាពិសេសគឺសាលារៀន ក្រសួងអប់រំ បានសាងសង់និងជួសជុលអគារសិក្សាជាច្រើនដោយបានបំពាក់គ្រឿងបរិក្ខាគ្រប់គ្រាន់ បង្កលក្ខណងាយស្រួលដល់ការសិក្សារបស់សិក្សានុសិស្ស ដែលជាកូនចៅរបស់ប្រជាពលរដ្ឋនៅទីនេះជាច្រើនផងដែរ។ ជាក់ស្តែងនៅពេលនេះយើងទទួលបាននូវសមិទ្ធិផលថ្មីបន្ថែមទៀតដែលសម្ពោធដាក់ឱ្យប្រើប្រាស់នាពេលនេះ គឺអគារទារកដ្ឋាននៅសាលាបឋមសិក្សា ហ៊ុន សែន កងតាណឹង និងអគារសិក្សា ២ខ្នង និងសមិទ្ធផលនានានៅក្នុងវិទ្យាល័យ កងតាណឹង។

មុននឹងបញ្ចប់ ឯកឧត្តមរដ្ឋមន្ត្រី ក៏បានប្រគល់លិខិតថ្លែងអំណគុណដល់អង្គការពិភពកុមារ និងអភិវឌ្ឍន៍ ប្រចាំនៅកម្ពុជា ផងដែរ ៕