ទីក្រុងប៉េកាំង÷ទីប្រឹក្សារដ្ឋ និងជារដ្ឋមន្ត្រីការបរទេស Qin Gang បានចូលរួមពិធីសម្ពោធស្ថានទូតនៃសាធារណរដ្ឋហុងឌូរ៉ាស នៅទីក្រុងប៉េកាំង ជាមួយនឹងដំណើរទស្សនកិច្ចទៅកាន់រដ្ឋមន្ត្រីការបរទេសហុងឌូរ៉ាស់ លោក Enrique Reina កាលពីថ្ងៃអាទិត្យ។ដោយបានបន្តការអបអរសាទរយ៉ាងកក់ក្តៅចំពោះការបើកស្ថានទូតហុងឌូរ៉ាសនៅទីក្រុងប៉េកាំង លោក Qin បាននិយាយថា ការបង្កើតទំនាក់ទំនងការទូតដោយឈរលើមូលដ្ឋាននៃគោលការណ៍ចិនតែមួយបានបើកសករាជថ្មីនៃទំនាក់ទំនងចិន-ហុងឌូរ៉ាស។
ដោយកត់សម្គាល់ថាទំនាក់ទំនងទ្វេភាគីចាប់ផ្តើមរឹងមាំក្នុងរយៈពេលពីរខែកន្លងមកនេះ លោក Qin បាននិយាយថា ការអភិវឌ្ឍន៍យ៉ាងឆាប់រហ័សនៃទំនាក់ទំនងទ្វេភាគីបានបង្ហាញយ៉ាងពេញលេញថា ការប្រកាន់ខ្ជាប់នូវគោលការណ៍ចិនតែមួយត្រូវបានទទួលស្គាល់ដោយសហគមន៍អន្តរជាតិ ឆ្លុះបញ្ចាំងពីនិន្នាការនៃសម័យកាល និង សេចក្តីប្រាថ្នារបស់ប្រជាជន និងបម្រើផលប្រយោជន៍ជាមូលដ្ឋាននៃប្រទេសទាំងពីរ និងប្រជាជនទាំងពីរ។ដោយបានបន្ទរសុន្ទរកថារបស់ Qin លោក Reina បាននិយាយថា ការបង្កើតទំនាក់ទំនងការទូតជាមួយប្រទេសចិនបើកសករាជថ្មីក្នុងទំនាក់ទំនងរបស់ហុងឌូរ៉ាសជាមួយពិភពលោក ហើយផ្តល់ឱកាសឱ្យហុងឌូរ៉ាសក្លាយជាប្រទេសដ៏អស្ចារ្យ និងរីកចម្រើន។
លោកបានបន្ថែមថា ភាគីហុងឌូរ៉ាស់នឹងគោរពយ៉ាងម៉ឺងម៉ាត់នូវគោលការណ៍ចិនតែមួយ ហើយជឿជាក់ថាទំនាក់ទំនងទ្វេភាគីនឹងបន្តពង្រឹង និងផ្តល់លទ្ធផលជាផ្លែផ្កាសម្រាប់ផលប្រយោជន៍ប្រជាជនទាំងពីរ។
ប្រភពព័ត៌មានៈXinhua
ប្រែសំរួលដោយៈយ៉េន សុវណ្ណារ៉ា
