សម្ដេចតេជោ ជំរុញឲ្យអ្នកពាក់ព័ន្ធទាំងអស់ ខិតខំរក្សាវប្បធម៌ខ្មែរ ឲ្យត្រឹមត្រូវតាមក្បួនខ្នាត
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្ដល់អនុសាសន៍ជំរុញឱ្យក្រសួងវប្បធម៌និងវិចិត្រសិល្បៈ ក្រសួងធម្មការនិងសាសនា និងគ្រប់ផ្នែកពាក់ព័ន្ធត្រូវរួមគ្នារក្សាឱ្យបាននូវទម្រង់ដើមនៃវប្បធម៌ខ្មែរ រាល់ពេលកសាង ឬរៀបចំសិល្បៈណាមួយត្រូវធ្វើឱ្យបានត្រឹមត្រូវតាមក្បួនខ្នាត បញ្ជាក់ឱ្យបានច្បាស់លាស់នៃសម័យកាលសិល្បៈនីមួយៗ ដើម្បីជៀសវាងការនាំឱ្យមានការយល់ច្រឡំដល់អ្នកជំនាន់ក្រោយ។
ក្នុងពិធីសម្ពោធសាកលវិទ្យាល័យភូមិន្ទវិចិត្រសិល្បៈនៅទីតាំងថ្មី ព្រមទាំងចែកសញ្ញាបត្រដល់និស្សិត ដែលបានបញ្ចប់ការសិក្សា នាថ្ងៃទី២៤ ខែឧសភាសម្ដេចតេជោ ហ៊ុន សែន ថ្លែងថា «ប្រយ័ត្ន១០០ឆ្នាំក្រោយ ឬ៥០ឆ្នាំក្រោយ បែរជាអ្នកជាន់ក្រោយនោះដែលទទួលតំណពីយើងអត់ត្រូវតាមក្បួនខ្នាត ដែលខ្ញុំសូមស្នើឱ្យមានការប្រុងប្រយ័ត្ន ពិសេសបញ្ហាបដិមា រូបចម្លាក់ផ្សេងៗ»។
សម្ដេចតេជោ ហ៊ុន សែន បន្តថា «ការឈ្លានពានខាងវប្បធម៌ ខ្ញុំអត់ជឿទេ ខ្ញុំនៅតែអះអាងថា មិនមានការឈ្លានពានវប្បធម៌នោះទេ តែអ្វីដែលភ័យខ្លាចបំផុត គឺការទទួលយកដោយការស្ម័គ្រចិត្ត នេះទើបជារឿងដែលត្រូវប្រុងប្រយ័ត្ន»។
សម្ដេចតេជោ ហ៊ុន សែន ក៏បានហាមប្រាមចំពោះការវាយបំផ្លាញចោលនូវព្រះវិហារ កុដិ ឬសំណង់បុរាណដែលមានតម្លៃផ្នែកវប្បធម៌ ព្រោះនឹងនាំទៅដល់ការបាត់បង់កេរដំណែលដូនតា និងមរតកជំនាន់ដើម និងនាំឱ្យបាត់ស្លាកស្នាមនៃក្បួនខ្នាតដើមផងដែរ៕
