អភិបាលរងខេត្តរតនគិរី៖ ការងារចុះបញ្ជីដីធ្លីមានខណៈជាប្រព័ន្ធពិតជាមានសារៈសំខាន់ណាស់សម្រាប់ប្រជាពលរដ្ឋ

ភ្នំពេញ៖ លោក ខ័ណ្ឌ ចំណាន អភិបាលរងខេត្តរតនគិរី តំណាង ឯកឧត្តម ញ៉ែម សំអឿន អភិបាលខេត្ត និងជាប្រធានគណកម្មាធិការគ្រប់គ្រងដីរដ្ឋថ្នាក់ខេត្ត នាព្រឹកថ្ងៃទី១៦ ខែឧសភា ឆ្នាំ២០២៣ បានអញ្ជើញជាអធិបតីក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋភូមិប៉ាអរ ឃុំប៉ាតេ ស្រុកអូរយ៉ាដាវចំនួន ១៩៨វិញ្ញាបនបត្រ។ ពិធីនេះក៏មានការអញ្ជើញចូលរួមពីសំណាក់ប្រធាន អនុប្រធានមន្ទីរភាពជុំវិញខេត្ត ព្រមទាំងអាជ្ញាធរស្រុក ឃុំភូមិជាច្រើនរូបទៀតផងដែរ។

បើតាមរបាយការណ៍របស់ប្រធានមន្ទីររៀបចំដែនដីនគរូបនីយកម្ម និងសំណង់ ខេត្តរតនគិរី បានឲ្យដឹងថា កន្លងមកមន្ទីរបានចេញប័ណ្ណជូនប្រជាពលរដ្ឋចំនួន ២៣ភូមិ ស្មើនឹងចំនួន ១៦,៩១១វិញ្ញាបនបត្រ ក្នុងនោះក្រុងបានលុងចំនួន ១៥ភូមិ ស្រុកអូរយ៉ាដាវចំនួន ០៣ភូមិ និងស្រុកអូរជុំចំនួន ០៥ភូមិ។ ដោយឡែកនាឱកាសចែកប័ណ្ណចំនួន ០១ភូមិបន្ថែមទៀត គឺភូមិប៉ាអរ ឃុំប៉ាតេ ស្រុកអូរយ៉ាដាវចំនួន ១៩៨វិញ្ញា
បនបត្រ។

មានប្រសាសន៍សំណេះសំណាលជាមួយពុកម៉ែបងប្អូនប្រជាពលរដ្ឋនាឱកាសនេះ លោក ខ័ណ្ឌ ចំណាន អភិបាលខេត្តរងខេត្ត បានលើកឡើងថា ការងារចុះបញ្ជីដីធ្លីមានខណៈជាប្រព័ន្ធពិតជាមានសារៈសំខាន់ណាស់សម្រាប់ប្រជាពលរដ្ឋ ដែលជាម្ចាស់ដី ដើម្បីបាននូវសិទ្ធិស្របច្បាប់ និងលុបបំបាត់នូវ វិវាទកម្ម ភាពច្បាស់លាស់ក្នុងការកំណត់អំពីទំហំដី ព្រំ ប្រទល់ដី ជាពិសេសអាចប្រើប្រាស់ផ្សេងៗទៀតតាមការដែលអាចប្រើបាន។

លោកអភិបាលរងខេត្ត បានបន្តថា ការចុះបញ្ជីដីធ្លីកម្មសិទ្ធិនាពេលបច្ចុប្បន្ននេះ ក៏ដោយសារតែប្រទេស ជាតិមានសុខសន្តិភាព ទើបធ្វើឱ្យពុកម៉ែបងប្អូន មានសិទ្ធិអាចប្រកបមុខរបបផ្សេងៗហើយចេះរស់នៅប្រកបដោយសុខដុមនីយកម្ម ដោយមិនមានការភ័យខ្លាច។ ដូចនះសន្តិភាពជាមូលដ្ឋាន គ្រឹះនៃការអភិវឌ្ឍន៍ ទាំងនេះគឺជាការដឹកនាំក្រោមម្លប់សន្តិភាពដ៏ខ្ពង់ខ្ពស់ប្រកប
ដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានដឹកនាំប្រទេសឱ្យមានសុខសន្តិភាព មានការរីកចម្រើន និងអភិវឌ្ឈន៍លើគ្រប់វិស័យ។

លោកអភិបាលរងខេត្ត ក៏សូមកោតសរសើរចំពោះថ្នាក់ដឹកនាំ និងមន្រ្តីរាជការរបស់មន្ទីរ រៀបចំដែនដីនគរូបនីយកម្ម និងសំណង់ខេត្ត ដែលបានយកចិត្តទុកដាក់បំពេញ ការងារបានយ៉ាងល្អប្រសើរ។ ដូចគ្នាផងដែរ ក៏សូមថ្លែង អំណរគុណចំពោះបងប្អូនប្រជាពលរដ្ឋ ដែលបានយកចិត្តទុកដាក់ចូលរួមក្នុងការងាចុះបញ្ជីដីធ្លីឱ្យសម្រេចបាន នូវលទ្ធផលល្អប្រសើររហូតមកដល់ពេលនេះ ៕