អភិបាលខេត្តព្រះសីហនុ ថ្លែងអំណរគុណចំពោះគណៈកម្មាធិការជាតិ អន្តរជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ដែលបានខិតខំ ក្នុងការដោះស្រាយនូវរាល់បញ្ហាប្រឈមនានា
ភ្នំពេញ៖ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ បានធ្វើការកោតសរសើរ និងថ្លែងអំណរគុណចំពោះគណៈកម្មាធិការជាតិ អន្តរជាតិរៀបចំការប្រកួតកីឡាអាស៊ីអាគ្នេយ៍ (SEA GAME) លើកទី៣២ និងសហព័ន្ធកីឡាទូកក្តោង និងគណៈប្រតិភូកីឡាដែលបានខិតខំយកអស់កម្លាំងកាយ កម្លាំងចិត្ត ប្រាជ្ញាស្មារតី និងបច្ចេកទេស ក្នុងការដោះស្រាយនូវរាល់បញ្ហាប្រឈមនានាធ្វើឱ្យដំណើរការ នៃការប្រកួតកីឡាទូកក្តោងប្រព្រឹត្តទៅកាន់តែមានសុក្រឹតភាព និងទទួលបាននូវលទ្ធផលជាវិជ្ជមាន។
ក្នុងពិធីប្រគល់មេដាយជូនកីឡាករ កីឡាការិនី ជ័យលាភីក្នុងព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ ប្រភេទកីឡាទូកក្តោង នៅពយតាមូង (ទីលានតេជោ) ស្ថិតនៅសង្កាត់លេខ៣ ក្រុងព្រះសីហនុ នារសៀលថ្ងៃទី០៨ ខែឧសភា ឆ្នាំ២០២៣។
ឯកឧត្តម គួច ចំរើន អភិបាលខេត្ត តាងនាមឱ្យរដ្ឋបាលខេត្ត ចូលរួមអបអរសាទរ កីឡាករ កីឡាការិនីជ័យលាភី ក្នុងការប្រកួតព្រឹត្តិការណ៍កីឡាអាស៊ីអាគ្នេយ៍លើកទី៣២ (32 SEA GAME) ឆ្នាំ២០២៣ ប្រភេទកីឡាទូកក្តោង នាឱកាសដ៏វិសេសវិសាលនេះ។
ព្រឹត្តិការណ៍ប្រកួតរយៈពេល ៧ថ្ងៃ ដោយគិតចាប់ពីថ្ងៃទី០២ ដល់ថ្ងៃទី០៨ ខែឧសភា ឆ្នាំ២០២៣ ដោយមានការចូលរួមប្រកួតពីកីឡាករ កីឡាការិនីចំនួន ៥៣រូប មកពីប្រទេសចំនួន៦ ក្នុងតំបន់អាស៊ានមានដូចជា កម្ពុជា, ម៉ាឡេស៊ី, សឹង្ហបុរី, ហ្វីលីពីន, ថៃ និងវៀតណាម។
ដោយបែងចែកជា ៩ប្រភេទវិញ្ញាសារួមមាន៖
១-វិញ្ញាសា Windsurfing RS:One មាន ៥ប្រទេស (កម្ពុជា, ថៃ, សឹង្ហបុរី, ម៉ាឡេស៊ី និងហ្វីលីពីន)
២-វិញ្ញាសា windsurfing RS:X មាន ៤ប្រទេស (កម្ពុជា, ថៃ, សឹង្ហហបុរី និងម៉ាឡេស៊ី)
៣-វិញ្ញាសា WindFoil IQ:Foil Open មាន ៤ប្រទេស (កម្ពុជា, ថៃ និងហ្វីលីពីន)
៤-វិញ្ញាសា WindFoil IQ:Foil Youth មាន ៣ប្រទេស (កម្ពុជា, ថៃ និងហ្វីលីពីន)
៥-វិញ្ញាសា ILCA7 មាន ៦ប្រទេស (កម្ពុជា, ថៃ,សឹង្ហបុរី,ម៉ាឡេស៊ី, វៀតណាម និងហ្វីលីពីន)
៦-វិញ្ញាសា ILCA6 មាន ៥ប្រទេស (កម្ពុជា, ថៃ,សឹង្ហបុរី, ម៉ាឡេស៊ី និងវៀតណាម)
៧-វិញ្ញាសា ILCA4 មាន ៦ប្រទេស (កម្ពុជា, ថៃ,សឹង្ហបុរី, ម៉ាឡេស៊ី, វៀតណាម និងហ្វីលីពីន)
៨-វិញ្ញាសា Optimist Mix មាន ៥ប្រទេស (កម្ពុជា, ថៃ,សឹង្ហបុរី, ម៉ាឡេស៊ី និងហ្វីលីពីន)
៩-វិញ្ញាសា 29er Open មាន ៥ប្រទេស (កម្ពុជា, ថៃ, សឹង្ហបុរី, ម៉ាឡេស៊ី និងវៀតណាម)។
ឯកឧត្តមអភិបាលខេត្ត បញ្ជាក់ថា សម្តេចតេជោបានសម្រេចមិនយកថ្លៃហូបចុក ការស្នាក់នៅ ចំពោះប្រតិភូកីឡា និងមិនយកថ្លៃសំបុត្រចូលទស្សនាដែលជារឿងមិនធ្លាប់មានក្នុងប្រវត្តិសាស្រ្តកីឡាស៊ីហ្គេម។ ទាំងនេះបានបង្ហាញថា «កម្ពុជាប្រទេសតូច ប្រទេសក្រ ក៏ប៉ុន្តែបេះដូងធំទូលាយជាងមហាសមុទ្រទៅទៀត» ជាពិសេសដែលត្រូវបានគណៈកម្មាធិការអូឡាំពិកអន្តរជាតិ (IOC) ផ្តល់ជូននូវមេដាយមរតកអូឡាំពិកអន្តរជាតិ ៕
