សម្ដេចតេជោ៖ ជប៉ុនជាប្រទេសមួយនាំមុខគេ ក្នុងផ្តល់ជំនួយឥតសំណង និងកម្ចីសម្រាប់ការអភិវឌ្ឍន៍នៅកម្ពុជា
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ថា ជប៉ុន គឺជាប្រទេសមួយនាំមុខគេ ក្នុងការផ្តល់ជំនួយឥតសំណងដល់កម្ពុជា ហើយបន្ទាប់ពីកម្ពុជាដោះស្រាយបំណុលមរតក ដែលបន្សល់ទុកពីរបបមុនៗរួច ទើបជប៉ុនសម្រេចផ្តល់ហិរញ្ញប្បទាន (កម្ចីមានការប្រាក់ទាប) ដើម្បីធ្វើការអភិវឌ្ឍប្រទេស។
ក្នុងពិធីបើកការដ្ឋានសាងសង់ចំណតផែកុងតឺន័រ នៅខេត្តព្រះសីហនុ នាថ្ងៃទី១ ឧសភានេះ សម្តេចតេជោ ហ៊ុន សែន បានថ្លែងថា «ជប៉ុនបានចូលរួមចំណែក ក្នុងការស្វែងរកសន្តិភាពនៅកម្ពុជា បន្ទាប់ទៅជប៉ុនបានដើរតួនាទីយ៉ាងសំខាន់ ក្នុងការនាំមុខលើការអភិវឌ្ឍកម្ពុជា ក្នុងការផ្តល់ជំនួយឥតសំណង។ ខ្ញុំបញ្ជាក់មកដល់ឆ្នាំ១៩៩៩ បានជប៉ុនផ្តល់ឲ្យយើងខ្ចីលុយ តើមូលហេតុអ្វីបានជាបែបនេះ ? ជប៉ុនផ្តល់ជំនួយច្រើនជាងគេ ប៉ុន្តែរឿងឲ្យប្រាក់កម្ចី គឺអត់។ មូលហេតុ គឺរបបមុនៗបានជំពាក់លុយជប៉ុន ជាពិសេសរបប លន់ នល់ អីចឹងជប៉ុនគិតទាំងការ ទាំងដើម និងប្រាក់ពិន័យ ដែលជាក្រឹត្យក្រមធម្មតា បើយើងមិនទាន់សងលុយគេទេ មិនអាចខ្ចីលុយគេថែមបានទេ ប៉ុន្តែសុំអរគុណជប៉ុន ដែលមានវិធីដោះបំណុល រឿងនេះជាបទពិសោធន៍មួយ ដែលប្រទេសនានាអាចរៀនសូត្រ ពីជប៉ុន ត្រង់ថាជប៉ុនដឹងថាយើងអត់មានលុយ ជប៉ុនផ្តល់ទំនិញឲ្យមកកម្ពុជា យកមកលក់ ដល់លក់បានហើយ គាត់អត់យកលុយទៅជប៉ុនទេ គាត់យកលុយទៅដាក់រតនាគារ ដល់តែបានលុយគ្រប់យើងយកលុយជប៉ុនសងជប៉ុនវិញ» ៕
