មន្ត្រីជាន់ខ្ពស់ក្រសួងសង្គមកិច្ច៖ ការផ្តល់សេវាហិរញ្ញវត្ថុបានជួយលើកកម្ពស់ជីវិភាពដល់ជនមានពិការភាព
ភ្នំពេញ៖ ឯកឧត្តម ឯម ច័ន្ទមករា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា បញ្ចាក់ថា ការផ្តល់ឱកាសដល់ជនមានពិការភាពដែលជួបប្រទះក្នុងការស្វែងរកសេវាហិរញ្ញវត្ថុ គឺជាការធ្វើវិនិយោគមួយ ដែលអាចចូលរួមដោះស្រាយបានសម្រាប់ការលើកកម្ពស់ជីវភាពរស់នៅ និងឧបសគ្គនានាដែលជនមានពិការភាពកំពុងជួបប្រទេះ។
ឯកឧត្តម បានលើកឡើងបែបនេះក្នុងពិធីបើកសិក្ខាសាលាផ្សព្វផ្សាយស្ដីពី «បរិយាបន្នពិការភាពសម្រាប់គ្រឹះស្ថានធនាគារ និងហិរញ្ញវត្ថុ» នៅថ្ងៃទី៣១ ខែមីនា ឆ្នាំ២០២៣។
ឯកឧត្តមបានឱ្យដឹងថា ដើម្បីធានាដល់សន្តិសុខសេដ្ឋកិច្ចនិងស្វ័យភាពរបស់ជនមានពិការភាព ពួកគេចាំបាច់ត្រូវការលទ្ធភាពទទួលបានដើមទុនកម្ចីដើម្បីវិនិយោគក្នុងសកម្មភាពអាជីវកម្ម និងផលិតផលហិរញ្ញវត្ថុផ្សេងទៀត ដូចជាប្រាក់បញ្ញើ ការទូទាត់ និងការធានារ៉ាប់រងជាដើម។
ឯកឧត្តម ឯម ច័ន្ទមករា គូសបញ្ជាក់ថា ការផ្តល់ឱកាសដល់ជនមានពិការភាពដែលជួបប្រទះក្នុងការស្វែងរកសេវាហិរញ្ញវត្ថុ គឺជាការធ្វើវិនិយោគមួយ ដែលស្ថាប័នសាធារណៈវិស័យឯកជន និងសង្គមស៊ីវិលនានា អាចចូលរួមដោះស្រាយបានសម្រាប់ការលើកកម្ពស់ជីវភាពរស់នៅ ពិសេសដោះស្រាយនូវឧបសគ្គនានាដែលជនមានពិការភាពកំពុងជួបប្រទះ។
ជាមួយគ្នានេះដែរ ឯកឧត្តម លើកឡើងថា ការរៀបចំសិក្ខាសាលានាពេលនេះ គឺជាឱកាសដ៏ល្អមួយសម្រាប់ការចែករំលែកនូវបទពិសោធន៍និងករណីសិក្សាជាក់ស្តែងនៃការផ្តល់សេវាហិរញ្ញវត្ថុដល់ជនមានពិការភាព ដែលជាមូលដ្ឋានគំនិតសម្រាប់គ្រឹះស្ថានធនាគារ និងហិរញ្ញវត្ថុនានាពិចារណាដាក់បញ្ចូលជាអាទិភាពសម្រាប់ការផ្តល់សេវាហិរញ្ញវត្ថុដល់ជនមានពិការភាពដែលផ្នែកមួយការនៃធ្វើបរិយាបន្នសម្រាប់គ្រប់វិស័យ។
ក្នុងឱកាសនោះ រដ្ឋលេខាធិការក្រសួងសង្គមកិច្ចរូបនេះ លើកទឹកចិត្តដល់សិក្ខាកាមទាំងអស់ចាប់យកឱកាស ដើម្បីកសាងនូវទំនាក់ទំនងល្អរវាងវិស័យពិការភាពនិងសេវាហិរញ្ញវត្ថុ ព្រោះតាមរយៈកិច្ចសហការរួមគ្នាបែបនេះ គឺអាចធ្វើការឆ្ពោះទៅរកគោលដៅនៃការទទួលផ្តល់សេវាហិរញ្ញវត្ថុស្របច្បាប់ដ៏ទូលំទូលាយ និងសមធម៌សម្រាប់ជនមានពិការភាពនៅកម្ពុជា៕
