អគ្គនាយករដ្ឋាករទឹក៖ ការពង្រីកសមត្ថភាពផ្គត់ផ្គង់ទឹកស្អាត ជំរុញឱ្យតម្លៃភាគហ៊ុន របស់រដ្ឋាករទឹកក្រុងភ្នំពេញ កើនឡើង
ភ្នំពេញ៖ ឯកឧត្ដម ឡុង ណារ៉ូ អគ្គនាយករដ្ឋាករទឹកស្វយ័តក្រុងភ្នំពេញ បានបង្ហាញសុទិដ្ឋិនិយមថា តម្លៃភាគរបស់រដ្ឋាករទឹកស្វយ័តក្រុងភ្នំពេញ ដែលជាអង្គភាពរបស់រដ្ឋចុះបញ្ជីក្នុងផ្សារភាគហ៊ុន នឹងកើនឡើងបន្ថែមទៀតលើតម្លៃបច្ចុប្បន្ន ខណៈរដ្ឋាករទឹកបានខិតខំពង្រីកជាបន្តបន្ទាប់ នូវប្រព័ន្ធផលិតកម្ម និងការផ្គត់ផ្គង់ទឹកស្អាត នៅក្នុងរាជធានីភ្នំពេញ។
ឯកឧត្ដមបន្ថែមថា បច្ចុប្បន្ននេះសមត្ថភាពផលិត និងអាជីវកម្មក៏ដូចជាការផ្គត់ផ្គង់ទឹក របស់រដ្ឋាករទឹកស្វយ័តក្រុងភ្នំពេញបានកើនឡើងបានឡើងគួរឱ្យកត់សម្គាល់ ដែលអាចទាក់ទាញនូវវិនិយោគិន ក្នុងផ្សារភាគហ៊ុនសំឡឹងទិញភាគហ៊ុននេះ។
ឯកឧត្ដមបានគូសបញ្ជាក់យ៉ាងដូច្នេះថា «អ្នកដែលគេលេងនៅក្នុងផ្សារភាគហ៊ុន គេនឹងមើលការគ្រប់គ្រងនូវវិស័យទឹកស្អាត តាមដែលខ្ញុំតាមដានមើល គឺកើនឡើងបណ្តើរៗហើយ ដោយឥលូវនេះកើនដល់ ៨០០០រៀលក្នុងប៉ុន្មានអាទិត្យនេះ ហើយខ្ញុំជឿថានៅខែមេសា នឹងឡើងថែមទៀត ក្រោយពីរដ្ឋាករទឹក នឹងប្រកាសនូវរបាយការណ៍ប្រាក់ចំណូល និងប្រាក់ចំណេញ ដែលទទួលស្គាល់ដោយសវនកម្មខាងក្រៅ។ ហេតុនេះខ្ញុំជឿថា នៅដើមខែមេសានេះ តម្លៃហ៊ុននឹងកើនឡើងថែមទៀត»។
ឯកឧត្ដមបញ្ជាក់បន្ថែមថា បើទោះជាយ៉ាងតម្លៃហ៊ុនមានទំនោរកើនឡើងក្តី ប៉ុន្តែរដ្ឋាករទឹកស្វយ័តក្រុងភ្នំពេញ មិនទាន់មានគម្រោងក្នុងការបោះផ្សាយភាគហ៊ុនលក់បន្ថែមនោះទេ ដោយករណីនេះស្ថិតក្រោម សម្រេចរបស់ក្រសួងសេដ្ឋកិច្ច និងហិរញ្ញវត្ថុ។
បើតាមឯកឧត្ដម ឡុង ណារ៉ូ ទឹកប្រាក់ដែលរដ្ឋាករទឹកស្វយ័តក្រុងភ្នំពេញ ទទួលបានពីទីផ្សារភាគហ៊ុននាពេលកន្លងមក បានទៅសងធនាគារពិភពលោករួចហើយ ក្នុងចំនួនប្រមាណជិត ៣០លានដុល្លារអាមេរិក។
ឯកឧត្ដម ហុង សុហួរ ប្រតិភូរាជរដ្ឋាភិបាលទទួលបន្ទុក ជាអគ្គនាយកក្រុមហ៊ុនផ្សារមូលបត្រកម្ពុជា (CSX) បានប្រាប់បណ្តាញព័ត៌មាន Fresh News ថា តម្លៃភាគហ៊ុនរដ្ឋាករទឹកស្វយ័តក្រុងភ្នំពេញ បានប្រែប្រួលឡើងចុះជាប្រចាំ តែក្នុងទំនោរកើនឡើងក្នុងរយៈពេល៥ឆ្នាំចុងក្រោយនេះ បន្ទាប់ពីមានទំនោរធ្លាក់ចុះខ្លាំងកាលពីឆ្នាំ២០១៧ ដោយមកដល់បច្ចុប្បន្ននេះ បានកើនឡើងមួយទ្វេជាបី ឬក្នុងកម្រិត២.៧ដង។
ឯកឧត្ដមបានឱ្យដឹងថា បច្ចុប្បន្ននេះ តម្លៃហ៊ុនរដ្ឋាករទឹកស្វយ័តក្រុងភ្នំពេញ បានកើនឡើងក្នុងរង្វង់ ៨០០០រៀលក្នុងមួយហ៊ុន ខណៈកាលពីឆ្នាំ២០១៧ បានធ្លាក់ចុះរហូតដល់ក្រោម ៣០០០រៀលក្នុងមួយហ៊ុន។
ឯកឧត្ដមលើកឡើងថា ការកើនឡើងនេះ បានឆ្លុះបញ្ចាំងពីវាយតម្លៃជាថ្មីរបស់វិនិយោគិនទៅលើភាគហ៊ុនមួយនេះ ក៏ដូចជាទំនោរកើនឡើងនៃទីផ្សារ ដែលចាប់ផ្តើមមានភាគហ៊ុនកាន់តែច្រើន និងមានវិនិយោគិនជាច្រើននៅក្នុងទីផ្សារ។
ឯកឧត្ដមបន្តថា «ពិតមែនតែវាមានការឡើងចុះៗប្រចាំថ្ងៃ ប្រចាំសប្តាហ៍ ប្រចាំខែ តែក្នុងទំនោរកើនឡើង។ ក្នុងទំនោរខាងមុខ ជាធម្មតាទេ នៅពេលដែលទីផ្សាររបស់យើងកាន់តែសកម្ម មានវិនិយោគិនកាន់តែច្រើន ហេតុនេះតម្លៃទីផ្សារក៏មានទំនោរកើនឡើងទៅតាមនោះដែរ នេះបើតាមបទពិសោធន៍កន្លងមក។ បើសិនជាសកម្មភាពអាជីវកម្មរបស់ក្រុមហ៊ុន មានសមត្ថភាពផលិតកម្ម និងសមត្ថភាពលក់កើនឡើង អ៊ីចឹងចំណូលក៏កើនឡើង តម្លៃភាគហ៊ុនក៏គួរតែឆ្លុះបញ្ចាំងនៃប្រាក់ចំណូល និងចំណេញផងដែរ ព្រោះសម្រាប់ថ្លៃហ៊ុន ដែលសំខាន់ជាងគេ ក្នុងការកំណត់នូវការសម្រេចចិត្តទិញលក់ គឺអាស្រ័យទៅលើកំណើននៃអាជីវកម្មនេះឯង»។
សូមជម្រាបថា រដ្ឋាករទឹកស្វយ័តក្រុងភ្នំពេញ គឺជាអង្គភាពរបស់រដ្ឋដែល បានចុះបញ្ជីក្នុងផ្សារមូលបត្រកម្ពុជាមុនដំបូងគេ តាំងពីខែមេសា ឆ្នាំ២០១២ ក្នុងទំហំប្រមាណ២០លានដុល្លារអាមេរិក ។
នៅឆ្នាំ២០២៣នេះ រដ្ឋាករទឹកស្វយ័តក្រុងភ្នំពេញ មានសមត្ថភាពផលិតទឹកស្អាត ប្រមាណ ៦៦០ពាន់ ម៉ែត្រគូបក្នុងមួយថ្ងៃ ទៅដល់អតិថិជនចំនួន៤៥ម៉ឺនគ្រួសារ។ នៅខែឧសភា ឆ្នាំ២០២៣នេះ រោងចក្រផលិតទឹកស្អាតបាក់ខែងជំហ៊ាន១ នឹងដាក់ឱ្យដំណើរការ ដើម្បីពង្រីកការផ្គត់ផ្គង់ទឹកនៅប៉ែកខាងលិច និងខាងត្បូងរាជធានីភ្នំពេញ។ ដោយឡែកគម្រោងរោងចក្រផលិតទឹកស្អាតបាក់ខែងជំហានទី២ នឹងបញ្ចប់ការសាងសង់នៅចុងឆ្នាំ២០២៣ ឬដើមឆ្នាំ២០២៤ ខណៈរដ្ឋាភិបាលក៏កំពុងគិតគូរក្នុងការពង្រីករោងចក្រផលិតទឹកស្អាតបាក់ខែងជំហានទី៣បន្ថែមទៀតផងដែរ៕
