ឧត្តមសេនីយ៍ទោ សម្បត្តិ សុធារដ្ឋ ដឹកនាំប្រជុំត្រួតពិនិត្យលទ្ធផលការងារប្រចាំខែកុម្ភ: និងលើកទិសដៅការងារខែបន្ត ឆ្នាំ២០២៣
ភ្នំពេញ៖ លោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្តកែប នារសៀលថ្ងៃទី២៨ ខែកុម្ភៈ ឆ្នាំ២០២៣ បានអញ្ជើញដឹកនាំកិច្ចប្រជុំត្រួតពិនិត្យលទ្ធផលការងារប្រចាំខែកុម្ភៈ និងលើកទិសដៅ ខែមីនា ឆ្នាំ២០២៣ នៅសាលប្រជុំធំជាន់ទី១ ស្នងការដ្ឋាននគរបាលខេត្ត។
កិច្ចប្រជុំនេះក៏មានការចូលរួមពីលោក លោកស្រីស្នងការរង នាយ នាយរងការិយាល័យ អធិការ អធិការរងនគរបាលក្រុង ស្រុក ប្រធានក្រុមចំរុះនគរបាលខេត្តគ្រប់ក្រុម ប្រធានក្រុមអន្តរាគមន៍ទាំង៣ក្រុម និងនាយប៉ុស្តិ៍នគរបាលរដ្ឋបាលទាំង៥ ឃុំ សង្កាត់ សរុបចំនួន ១៤៥នាក់ ។
បន្ទាប់ពីបានស្តាប់របាយការណ៍បូកសរុបស្តីពីលទ្ធផលការងារប្រចាំខែកុម្ភ: ឆ្នាំ២០២៣ ដែលអានដោយលោកវរសេនីយ៍ឯក អ៊ូច កុម្ភៈ នាយការិយាល័យសរុបផែនការ និងការចូលរួមយោបល់ពីសមាជិកអង្គប្រជុំរួចមក។
មានប្រសាសន៍ទៅកាន់អង្គប្រជុំ លោកឧត្តមសេនីយ៍ទោ ស្នងការ បានសំដែងនូវអំណរសាទរ និងកោតសរសើរ ចំពោះសមិទ្ធផលការងារដែលសម្រេចបានលទ្ធផលល្អកន្លងមក និងបានដាក់ចេញនូវគោលការ ផែនការសំខាន់ៗដល់គ្រប់ផែន ពាក់ព័ន្ធការងារសន្តិសុខ ការបង្ការទប់ស្កាត់បទល្មើសព្រហ្មទណ្ឌ បទល្មើសគ្រឿងញៀន ការងារចរាចរណ៍ សណ្តាប់ធ្នាប់ ការងារជួញដូរមនុស្ស និងការពារអនីតិជន ការគ្រប់គ្រងអាវុធជាតិផ្ទុះ និងអគ្គិភ័យ ការផ្តល់អត្តសញ្ញាណប័ណ្ណសញ្ជាតិខ្មែរ និងណែនាំដល់គ្រប់ប្រធានវេនប្រចាំការគ្រប់អង្គភាព ត្រូវពង្រឹងកម្លាំងក្នុងវេនប្រចាំបញ្ជា ដើម្បីទ្រោលសភាពការណ៍ធានាបានម្ចាស់ការគ្រប់កាលៈទេសៈ ក្នុងការគ្រប់គ្រងរក្សាសន្តិសុខ សណ្តាប់ធ្នាប់ក្នុងខេត្តទាំងមូល ឱ្យមានសុវត្ថិភាពគ្រប់ពេលវេលា ៕
