រដ្ឋបាលខេត្តបន្ទាយមានជ័យ ប្រជុំបូកសរុបលទ្ធផលការងារគ្រប់គ្រងគ្រោះមហន្តរាយ ឆ្នាំ២០២២ និងទិសដៅឆ្នាំ២០២៣
បន្ទាយមានជ័យ៖ ឯកឧត្តម ឡាំ ហេងហួត រដ្ឋមន្ត្រីប្រតិភូ អមនាយករដ្ឋមន្ត្រី និងជាអនុប្រធានគណៈកម្មាធិការជាតិគ្រប់គ្រងគ្រោះមហន្តរាយ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស ជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និងឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ។
កិច្ចប្រជុំនេះមានការចូលរួមកិច្ចប្រជុំបូកសរុបលទ្ធផលការងារគ្រប់គ្រងគ្រោះមហន្តរាយ របស់រដ្ឋបាលខេត្តឆ្នាំ២០២២ និងទិសដៅឆ្នាំ២០២៣ ដោយមានការចូលរួម ពីក្រុមការងារគ្រប់គ្រងគ្រោះមហន្តរាយថ្នាក់ខេត្ត ក្រុង-ស្រុក កងកម្លាំងទាំង៣ប្រភេទ អភិបាលក្រុង-ស្រុក មេឃុំ-ចៅសង្កាត់ អ្នកពាក់ពាក់ព័ន្ធ ដែលធ្វើឡើងនៅសាលប្រជុំ ក្រុមប្រឹក្សាខេត្ត ថ្ងៃទី១៧ ខែកុម្ភៈ ឆ្នាំ២០២៣។
ឯកឧត្តម អ៊ុំ រាត្រី អភិបាលខេត្ត បានធ្វើសេចក្តីរាយការណ៍ថា គ្រោះមហន្តរាយដែលបានកើតមានឡើងក្នុងឆ្នាំ២០២២កន្លងទៅ ទឹកជំនន់ប៉ះពាល់ចំនួន៨ក្រុង-ស្រុក ៤៦ឃុំ-សង្កាត់ ៣១៥ភូមិ ក្នុងនោះគ្រួសាររងផលប៉ះពាល់ សរុបចំនួន១៧,០៥៥គ្រួសារ, ជម្លៀសទៅកាន់ទីទួលសុវត្ថិភាព១,៣៨៩គ្រួសារ, លង់ទឹកស្លាប់៤នាក់, ពស់ចឹកចំនួន១១៤ ករណី/ ស្ត្រី៣២(ពុំមានស្លាប់), ប៉ះពាល់ដំណាំស្រូវ៣៩,៤០២ ហិកតា ខូចខាតស្រូវ២២,៧៦១ហិកតា ដំឡូងមី២,៨៩៩ ហិកតា ដំណាំរួមផ្សំ១៤១ហិកតា សត្វពាហនៈ២,៨៦៧ក្បាល សាលារៀន៩០កន្លែង(ផ្អាកសិក្សាចំនួន៥៨) វត្ត៣៨, មណ្ឌលសុខភាព១២ និងផ្លូវដែលគ្រប់គ្រងដោយមន្ទីរសាធារណការ និងដឹកជញ្ជូនខេត្ត មានប្រវែង២៤,២៥០ ម៉ែត្រ និងមន្ទីរអភិវឌ្ឍន៍ជនបទមានប្រវែង១៣៥,២៥០ម៉ែត្រ។
ឯកឧត្តមអភិបាលខេត្តបន្តថា ចំពោះបាតុភូតធម្មជាតិខ្យល់កន្ត្រាក់ ប៉ះពាល់លើ ០៩ក្រុង ស្រុក បណ្តាលឱ្យប៉ះពាល់ និងខូចខាតផ្ទះប្រជាពលរដ្ឋចំនួន ៦៧០ខ្នង (ធ្ងន់ធ្ងរ៨៨ខ្នង) សាលារៀនចំនួន០៦ខ្នង បង្គោលភ្លើង០៧ដើម និងរបួស០៦នាក់(ស្រី០១នាក់)។ រន្ទះបាញ់ កើតមានឡើងចំនួន៣លើកស្លាប់មនុស្ស០៣នាក់។ អគ្គីភ័យ ប៉ះពាល់ និងឆេះផ្ទះចំនួន៣០ខ្នង ខូចខាតទាំងស្រុង២៧ខ្នង ហេីយកាលពីចុងឆ្នាំ២០២២២ មានករណីឆេះកាស៊ីណូ ទាំងស្រុងចំនួន០៣ ស្លាប់ចំនួន២៧នាក់ និងរបួសធ្ងន់-ស្រាលចំនួន៥៧នាក់។
ថ្លែងនាឱកាសនោះឯកឧត្តម ឡាំ ហេងហួត បានជំរុញណែនាំដល់អាជ្ញាធរពាក់ព័ន្ធគ្រប់ជាន់ថ្នាក់ ត្រូវបន្តយកចិត្តទុកដាក់តាមដានស្ថានភាពការប្រែប្រួលអាកាសធាតុ បាតុភូតធម្មជាតិដែលតែងតែកើតមានជារៀងរាល់ឆ្នាំ ជាក់ស្តែងថ្មីៗនេះនៅក្នុងស្រុកមួយចំនួន នៅក្នុងខេត្តបន្ទាយមានជ័យ ទទួលរងគ្រោះដោយសារខ្យល់កន្ត្រាក់ ធ្វើផ្ទះបងប្អូនប្រជាពលរដ្ឋប្រមាណ៣០ខ្នងផ្ទះ រងការខូចខាតរបើកដំបូលជាដើម។
ក្នុងនាមអាជ្ញាធរជាតិគ្រប់គ្រងគ្រោះមហន្តរាយ ឯកឧត្តម ដាក់ផែនការឱ្យអភិបាលក្រុង-ស្រុក អាជ្ញាធរពាក់ព័ន្ធកងកម្លាំងសមត្ថកិច្ចពាក់ព័ន្ធ ត្រូវបន្តខិតខំជួយដោះស្រាយជូនប្រជាពលរដ្ឋ ដែលទទួលរងគ្រោះដោយសារគ្រោះធម្មជាតិផ្សេងៗឱ្យបានទាន់ពេលវេលា៕
