លោកជំទាវ ពុំ ចន្ទីនី អញ្ជើញចូលរួមពិធីបុណ្យ “មាឃបូជា” ដែលប្រព្រឹត្តនៅបរិវេណព្រះមហាសក្យមុនីចេតិយ ភ្នំព្រះរាជទ្រព្យ

ភ្នំពេញ៖ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា នាព្រឹកថ្ងៃទី០៥ ខែកុម្ភៈ ឆ្នាំ២០២៣ បានដឹកនាំប្រតិភូអញ្ជើញចូលរួមពិធីបុណ្យ “មាឃបូជា” ដែលប្រព្រឹត្តទៅ ក្រោមអធិបតីភាព លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងមានការចូលរួមពី ថ្នាក់ដឹកនាំ-មន្ត្រី តាមបណ្តាស្ថាប័ននានា និងពុទ្ធបរិស័ទរាប់រយនាក់ បានរាប់បាត្រថ្វាយ និងប្រគេនថ្វាយ ព្រះសង្ឃ ៨០អង្គ នៅបរិវេណព្រះមហាសក្យមុនីចេតិយ ភ្នំព្រះរាជទ្រព្យ ស្ថិតក្នុងភូមិសាស្ត្រភូមិភ្នំ ឃុំផ្សារដែក ស្រុកពញាឮ ខេត្តកណ្ដាល។

សូមបញ្ជាក់ថា៖ ចាប់តាំងពី ៥៨៨ឆ្នាំ មុនគ្រិស្តសករាជ ពុទ្ធបរិស័ទនៅលើសាកលលោកនាំគ្នាប្រារព្ធពិធីបុណ្យ “មាឃបូជា” ដែលធ្វើឡើងជារៀងរាល់ឆ្នាំ នៅថ្ងៃទី ១៥កើត ពេញបូរណ៌មី ខែមាឃ ដែលមានប្រភពពីរយ៉ាងគឺ៖
១- រំលឹកដល់ថ្ងៃនៃការប្រជុំចតុរង្គសន្និបាត នៃព្រះអរហន្ត ១២៥០ អង្គ ដែលមានតែម្ដងគត់ក្នុងពុទ្ធកាលរបស់ព្រះសក្យមុនីគោតមបរមគ្រូនៃយើង។
២- រំលឹកដល់ថ្ងៃដែលព្រះពុទ្ធជាម្ចាស់ប្រកាសដាក់ព្រះជន្មាយុសង្ខារ “ពេញបូណ៌មីខែពិសាខ ខាងមុខនេះ តថាគតនឹងបរិនិព្វានហើយ” ៕