នាយឧត្តមសេនីយ៍ គៀត ច័ន្ទថារិទ្ធ ដឹកនាំកិច្ចប្រជុំឆ្លងសៀវភៅណែនាំស្ដីពីបែបបទនិតិវិធី ក្នុងការអនុវត្តចំពោះជនបរទេសអន្តោប្រវេសន្ត

ភ្នំពេញ៖ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ នាព្រឹកថ្ងៃសុក្រ ១៣ កើត ខែមាឃ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី៣ ខែកុម្ភៈ ឆ្នាំ២០២៣នេះ បានអញ្ជើញដឹកនាំកិច្ចប្រជុំឆ្លងសៀវភៅណែនាំស្ដីពីបែបបទនិតិវិធី ក្នុងការអនុវត្តចំពោះជនបរទេសអន្តោប្រវេសន្ត នៅព្រះរាជាណាចក្រកម្ពុជា ។

កិច្ចប្រជុំនេះក៏មានការអញ្ជើញចូលរួមពីឯកឧត្ដម អគ្គនាយករង លោកប្រធាន-អនុប្រធាននាយកដ្ឋាន លោកនាយការិយាល័យ និងមន្រ្តីពាក់ព័ន្ធនៃនាយកដ្ឋានជនបរទេសអន្តោប្រវេសន្ត។

ជាកិច្ចចាប់ផ្ដើម ឯកឧត្ដម នាយឧត្តមសេនីយ៍ គៀត ច័ន្ទថារិទ្ធ បានមានប្រសាសន៍បើកកិច្ចប្រជុំ និងអនុញ្ញាតឱ្យដំណើរការកិច្ចប្រជុំ។

បន្ទាប់ឯកឧត្តម ឧត្តមសេនីយ៍ឯក យូ សារុំ ប្រធាននាយកដ្ឋាន និងលោកអនុប្រធាននាយកបានអានសេចក្ដីរាយការណ៍ យ៉ាងលំអិតទើលើកសៀវភៅណែនាំស្ដីពីបែបបទនិតិវិធី ក្នុងការអនុវត្តចំពោះជនបរទេសអន្តោប្រវេសន្ត នៅព្រះរាជាណាចក្រកម្ពុជាជូនអគ្គប្រជុំ។

បន្ទាប់មកទៀត ឯកឧត្ដម អគ្គនាយករង លោកប្រធាន-អនុប្រធាននាយកដ្ឋាន បានលេីកយកចំណុចសំខាន់ៗមួយចំនួនមកពិភាក្សា និងកែសម្រួលពាក់ព័ន្ធ សៀវភៅណែនាំស្ដីពីបែបបទនិតិវិធី ។

នាឱកាសនោះឯកឧត្តម នាយឧត្តមសេនីយ៍ អគ្គនាយក បានផ្តួចផ្តើមឲ្យអង្គប្រជុំសិក្សា ពិភាក្សាវែកញែក និងបន្ថែមខ្លឹមសារ ពាក្យពេចន៍មួយចំនួន ក្នុងគោលបំណងឱ្យមន្រ្តីអនុវត្តនិតិវិធីនេះ ក៏ដូចជាជនបរទេសអន្តោប្រវេសន្តមានលក្ខណៈងាយស្រួលក្នុងការអាន ងាយយល់ពីច្បាប់នៃសៀវភៅណែនាំនេះ ដើម្បីគោរពច្បាប់ និងអនុវត្តតាម។

ឆ្លៀតក្នុងឱកាសនោះឯកឧត្ដម នាយឧត្តមសេនីយ៍ អគ្គនាយក បានសង្កត់ធ្ងន់ជូនអង្គប្រជុំថា ការធ្វើសៀវភៅណែនាំស្ដីពីបែបបទនិតិវិធី ក្នុងការអនុវត្តចំពោះជនបរទេសអន្តោប្រវេសន្ត នៅព្រះរាជាណាចក្រកម្ពុជា គឺជាកិច្ចការងារមួយយ៉ាងសំខាន់ដែលការគ្រប់គ្រងជនបរទេសព្រះរាជាណាចក្រកម្ពុជាឱ្យមានមានប្រសិទ្ធភាព ដែលជាការចូលរួម ក្នុងការអភិវឌ្ឍន៍ និងការថែរក្សាសន្តិសុខ សុខភាព សុវត្ថិភាពរបស់ជាតិមាតុភូមិ ។

ជាចុងបញ្ចប់ឯកឧត្ដម នាយឧត្តមសេនីយ៍ គៀត ច័ន្ទថារិទ្ធ ក៏បានបញ្ជាក់ផងដែរថា ការធ្វើកំណែទម្រង់នៃការធ្វើសៀវភៅនេះមានភាពល្អប្រសើរបានច្រើនហើយ។

ឯកឧត្ដម នាយឧត្ដមសេនីយ៍ អគ្គនាយក ក៏បាថ្លែងអំណរគុណដល់នាយកដ្ឋាន និងជំរុញបន្តឱ្យខិតខំប្រឹងប្រែង ធ្វើសៀវភៅណែនាំនេះឡើងឱ្យកាន់ល្អបន្ថែមពីនេះទៀត ៕