ក្រសួងមហាផ្ទៃ បើកកិច្ចប្រជុំផ្សព្វផ្សាយសេចក្តីប្រកាសស្តីពី ការបង្កើតក្រុមប្រឹក្សាប្រឡងប្រណាំងអនុវត្តន៍គោលនយោបាយ «ភូមិ ឃុំ សង្កាត់ មានសុវត្ថិភាព» ស្ថិតក្នុងសមត្ថកិច្ចក្រសួងមហាផ្ទៃ
ភ្នំពេញ៖ នាព្រឹកថ្ងៃទី២ ខែកុម្ភៈ ឆ្នាំ២០២៣ ក្រសួងមហាផ្ទៃ បានបើកកិច្ចប្រជុំផ្សព្វផ្សាយសេចក្តីប្រកាសស្តីពី ការបង្កើតក្រុមប្រឹក្សាប្រឡងប្រណាំងអនុវត្តន៍គោនយោបាយ «ភូមិ ឃុំ សង្កាត់ មានសុវត្ថិភាព» ស្ថិតក្នុងសមត្ថកិច្ចក្រសួងមហាផ្ទៃ ក្រោមអធិបតីភាព ឯកឧត្តម សក់ សេដ្ឋា រដ្ឋលេខាធិការប្រចាំការក្រសួងមហាផ្ទៃ និងជាប្រធានក្រុមប្រឹក្សាប្រឡងប្រណាំងអនុវត្តន៍គោលនយោបាយ «ភូមិ ឃុំ សង្កាត់ មានសុវត្ថិភាព» ដោយមានការអញ្ជើញចូលរួមពី ឯកឧត្តម លោកជំទាវ អនុប្រធាន សមាជិក ព្រមទាំងមន្ត្រីពាក់ព័ន្ធជាច្រើនរូបទៀត។
ឯកឧត្តម សក់ សេដ្ឋា រដ្ឋលេខាធិការប្រចាំការក្រសួងមហាផ្ទៃ បានមានប្រសាសន៍ថា ដោយសារសមាសភាពនៃក្រុមប្រឹក្សាប្រឡងប្រណាំងអនុវត្តន៍គោលនយោបាយ «ភូមិ ឃុំ សង្កាត់ មានសុវត្ថិភាព» និងក្រុមការងារត្រួតពិនិត្យ និងជំរុញការអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» ត្រូវបានផ្លាស់ប្តូរមួយចំនួន ទើបក្រសួងមហាផ្ទៃបានរៀបចំសមាសភាពថ្មីនៃក្រុមការងារទាំងពីរឡើងវិញ និងត្រូវប្រកាសដាក់ឱ្យអនុវត្តន៍នាពេលនេះ។
ទន្ទឹមនេះ ឯកឧត្តម សក់ សេដ្ឋា មានប្រសាសន៍បន្តថា ការដាក់ឱ្យអនុវត្តនូវគោលនយោបាយ «ភូមិ ឃុំ សង្កាត់ មានសុវត្ថិភាព»នេះផងដែរ គឺបានអនុវត្តមានរយៈពេលប្រមាណ១០ឆ្នាំមកហើយ ដោយមានចូលរួមការគាំទ្រ និងទទួលបានជោគជ័យជាច្រើន។
នាឱកាសនោះ ឯកឧត្តម យុន ឈុន្នី រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ក្រុមប្រឹក្សាប្រឡងប្រណាំងអនុវត្តគោលនយោបាយ«ភូមិ ឃុំ សង្កាត់ មានសុវត្ថិភាព» បានអានសេចក្តីប្រកាស ស្តីពី ការបង្កើតក្រុមប្រឹក្សាប្រឡងប្រណាំងអនុវត្តគោនយោបាយ«ភូមិ ឃុំ សង្កាត់ មានសុវត្ថិភាព»ស្ថិតក្នុងសមត្ថកិច្ចក្រសួងមហាផ្ទៃ និងសេចក្តីសម្រេចចាត់តាំងក្រុមកាងារត្រួតពិនិត្យ និងជំរុញការអនុវត្តគោលនយោបាយ«ភូមិ ឃុំ សង្កាត់ មានសុវត្ថិភាព» ស្ថិតក្នុងសមត្ថកិច្ចក្រសួងមហាផ្ទៃនៅថ្នាក់ក្រោមជាតិ។
ឯកឧត្តម បានបញ្ជាក់ថា ក្រុមប្រឹក្សាប្រឡងប្រណាំងអនុវត្តន៍គោលនយោបាយ«ភូមិ ឃុំ សង្កាត់ មានសុវត្ថិភាព» មានតួនាទីសហការជាមួយគណៈបញ្ជាការឯកភាពរដ្ឋបាលរាជធានី ខេត្ត ដើម្បីរៀបចំផ្សព្វផ្សាយ គោលនយោបាយក្រុមប្រឹក្សាប្រឡងប្រណាំងអនុវត្តន៍គោលនយោបាយ«ភូមិ ឃុំ សង្កាត់ មានសុវត្ថិភាព» ជូនដល់មន្ត្រីរាជការ កងកម្លាំងមានសមត្ថកិច្ច សមាគម អង្គការមិនមែនរដ្ឋាភិបាល វិស័យឯកជន និងប្រជាពលរដ្ឋគ្រប់មជ្ឈដ្ឋានឱ្យជ្រួតជ្រាប និងចូលរួមអនុវត្តន៍។ ចំពោះ ក្រុមកាងារត្រួតពិនិត្យ និងជំរុញការអនុវត្តគោលនយោបាយ«ភូមិ ឃុំ សង្កាត់ មានសុវត្ថិភាព» ស្ថិតក្នុងសមត្ថកិច្ចក្រសួងមហាផ្ទៃនៅថ្នាក់ក្រោមជាតិ ឯកឧត្តម បានបញ្ជាក់ថា លេខាធិការដ្ឋាននៃក្រុមប្រឹក្សាប្រឡងប្រណាំងអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព»ស្ថិតក្នុងសមត្ថកិច្ចក្រសួងមហាផ្ទៃ មានសិទ្ធប្រើប្រាស់មន្ត្រីក្រោមឱវាទឱ្យជួយបំពេញភារកិច្ចតាមការចាំបាច់។
ជាមួយគ្នានោះដែរ ឯកឧត្តម សក់ សេដ្ឋា ក៏បានអនុញ្ញាតឱ្យ ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ និងជាសមាជិកលេខាធិការដ្ឋាននៃក្រុមប្រឹក្សាប្រឡងប្រណាំងអនុវត្តន៍គោលនយោបាយ «ភូមិ ឃុំ សង្កាត់ មានសុវត្ថិភាព» រាយការណ៍នូវរបាយការណ៍បូកសរុបលទ្ធផលនៃការអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» ពាក់ព័ន្ធនូវលក្ខណៈសម្បត្តិទី២ ទី៣ ទី៤ ប្រចាំឆ្នាំ២០២២ និង ទិសដៅឆ្នាំ២០២៣។
ឯកឧត្តម ឧត្តមសេនីយ៍ឯក ឆាយ គឹមខឿន មានប្រសាសន៍ឱ្យដឹងថាឆ្លងតាមការពិនិត្យវាយតម្លៃតាមរូបមន្តដែលបានកំណត់ ក្នុងការចាត់តាំងអនុវត្តន៍គោលនយោបាយ ភូមិ ឃុំ សង្កាត់មានសុវត្ថិភាព ពាក់ព័ន្ធលក្ខណៈសម្បត្តិទី២ ទី៣ ទី៤ អង្គស្នងការដ្ឋាននគរបាលជាតិបានរកឃើញ និងកំណត់នូវចំណាក់ថ្នាក់ឃុំ សង្កាត់ទាំង ១.៦៥២ឃុំ សង្កាត់។ ក្នុងនោះការវាយតម្លៃ និងកំណត់នូវចំណាត់ថ្នាក់ ផ្អែកទៅលើស្ថានភាពបទល្មើស លទ្ធផលបង្ក្រាបបទល្មើស វេទិការសាធារណៈ ការផ្សព្វផ្សាយ និងចលនាប្រជាការពារ។
សូមជម្រាបជូនថា គោលនយោបាយ ភូមិ ឃុំ មានសុវត្ថិភាព ផ្អែកលើលក្ខណៈសម្បត្តិសំខាន់ចំនួន៥ រួមមាន១-គ្មានសកម្មភាព លួច ឆក់ ប្លន់ គ្រប់ប្រភេទ ២-គ្មានការផលិត ការចែកចាយ និងការប្រើប្រាស់គ្រឿងញៀនខុសច្បាប់ ៣-គ្មានអំពើអនាចារ ការជួញដូរស្ត្រី និងកុមារ និងអំពើហិង្សាក្នុងគ្រួសារ ៤-គ្មានក្មេងទំនើង និង៥-គ្មានការលេងល្បែងស៊ីសងគ្រប់ប្រភេទ ការប្រើប្រាស់អាវុធខុសច្បាប់ និងបទល្មើសគ្រប់ប្រភេទ៕
