ភ្នំពេញ៖ ក្រុមនិស្សិត៤ក្រុមមកពីគ្រឹះស្ថានឧត្តមសិក្សាចំនួន៤ផ្សេងគ្នា បានចូលរួមប្រកួតប្រជែងក្នុងការរៀបចំគម្រោងផែនការ «ផែនការអភិវឌ្ឍន៍គោលដៅទេសចរណ៍គំរូ នៅស្រុកបន្ទាយស្រី» ដែលរៀបចំដោយក្រសួងទេសចរណ៍ ក្នុងនោះក៏ទទួលបានការវាយតម្លៃយ៉ាងត្រឹមត្រូវពីគណៈកម្មការអន្តរក្រសួង-ស្ថាប័ន។
ជាក់ស្ដែងនាថ្ងៃទី១០ ខែមករា ឆ្នាំ២០២៣នេះ ក្រសួងទេសចរណ៍បានរៀបចំកម្មវិធីវាយតម្លៃជ្រើសរើសជ័យលាភី ក្នុងកម្មវិធីប្រកួតប្រជែងការរៀបចំ «ផែនការអភិវឌ្ឍន៍គោលដៅទេសចរណ៍គំរូ» ក្រោមអធិបតីភាពឯកឧត្ដម ណេប សាមុត អគ្គនាយកគ្រប់គ្រងឧស្សាហកម្មទេសចរណ៍ និងជាប្រធានលេខាធិការដ្ឋានគណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ នៅទីស្តីការក្រសួងទេសចរណ៍។
ឯកឧត្ដម ណេប សាមុត បានឱ្យដឹងថា កម្មវិធីប្រកាសជ័យលាភីកម្មវិធីនេះ ត្រូវបានធ្វើឡើងដើម្បីវាយតម្លៃលើផែនការអភិវឌ្ឍន៍គោលដៅទេសចរណ៍ស្រុកបន្ទាយស្រី ដែលរៀបចំឡើងដោយក្រុមនិស្សិតទាំង៤ក្រុម មកពីសាកលវិទ្យាល័យជាតិគ្រប់គ្រង សាកលវិទ្យាល័យភូមិន្ទភ្នំពេញ សាកលវិទ្យាល័យជាតិបាត់ដំបង និងវិទ្យាស្ថានសន្តប៉ូល បន្ទាប់ពីក្រុមនិស្សិតទាំងនោះបានទទួលការបណ្តុះបណ្តាលដោយក្រសួងទេសចរណ៍ និងចុះកម្មសិក្សាដោយផ្ទាល់ទៅកាន់សហគមន៍ទេសចរណ៍នៅក្នុងស្រុកបន្ទាយស្រី កាលពីអំឡុងខែវិច្ឆិកា ឆ្នាំ២០២២ កន្លងទៅ។
ឯកឧត្ដមអគ្គនាយកបានបញ្ជាក់ថា ជាលទ្ធផល គណៈកម្មការបានជ្រើសរើសជ័យលាភី៣ក្រុម ដែលក្នុងនោះជ័យលាភីលេខ១ បានទៅលើក្រុមនិស្សិតដែលមកពីសាកលវិទ្យាល័យជាតិបាត់ដំបង ជ័យលាភីលេខ២ បានទៅលើក្រុមនិស្សិតដែលមកពីវិទ្យាស្ថានសន្តប៉ូល និងជ័យលាភីលេខ៣ បានទៅលើក្រុមនិស្សិតដែលមកពីសាកលវិទ្យាល័យភូមិន្ទភ្នំពេញ។
ឯកឧត្ដម ណេប សាមុត បានបន្តថា កម្មវិធីប្រកួតប្រជែងខាងលើត្រូវបានចូលរួមដាក់ពិន្ទុនិងវាយតម្លៃពីគណៈកម្មការ ដែលមានសមាសភាពមកពីតំណាងក្រសួងទេសចរណ៍ វិទ្យាស្ថានជាតិទេសចរណ៍ សមាគមទេសចរណ៍អាស៊ីប៉ាស៊ីហ្វិកកម្ពុជា (PATA) និងបណ្តាញសហគមន៍ទេសចរណ៍ស្រុកបន្ទាយស្រី។
សូមរំលឹកថា កម្មវិធីនេះត្រូវបានរៀបចំក្នុងគោលបំណងផ្តល់ឱកាសដល់និស្សិតជំនាញទេសចរណ៍បានចុះសិក្សាស្វែងយល់អំពីសក្តានុពលវិស័យទេសចរណ៍ បញ្ហាប្រឈមនានា និងទទួលបានបទពិសោធន៍ជាក់ស្តែងអំពីយន្តការគ្រប់គ្រងនៃដំណើរការរបស់គោលដៅទេសចរណ៍នីមួយៗ ស្របតាមយុទ្ធនាការ «ទស្សនា ស្រុកយើង» ស្របតាមពាក្យស្លោក «ស្រលាញ់ជាតិ ត្រូវស្គាល់ទឹកដី» ពិសេសអនុលោមតាមអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា «ទេសចរណ៍ផ្សារ ភ្ជាប់ទឹកដី»។
បើតាមឯកឧត្ដម ណេប សាមុត កម្មវិធីប្រកួតប្រជែងនេះក៏បានចូលរួមចំណែកទ្រទ្រង់ដល់ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ២០២១-២០៣៥ តាមរយៈការចូលរួមបង្កើតយុទ្ធសាស្រ្តអភិវឌ្ឍន៍តំបន់ទេសចរណ៍អាទិភាពទាំង៦ក្នុងខេត្តសៀមរាប ដែលក្នុងនោះមានតំបន់ជុំវិញតំបន់ការពារប្រាសាទបន្ទាយស្រី៖
* អភិវឌ្ឍន៍ជាគោលដៅទេសចរណ៍ជនបទ និងកសិទេសចរណ៍
* ចូលរួមក្នុងផែនការជាតិអភិវឌ្ឍជនបទ
* ចូលរួមធ្វើពិពិធកម្ម និងទំនើបកម្មផលិតផលទេសចរណ៍ជនបទ និងកសិទេសចរណ៍
* បញ្ជៀបការយល់ដឹងជាសាធារណៈអំពីវិស័យទេសចរណ៍ (ភ្ញៀវទេសចរ ប្រជាជនមូលដ្ឋាន សិស្ស-និស្សិត និងផ្នែកឯកជន)
* ការលើកទឹកចិត្តឱ្យមានការចូលរួមពីសហគមន៍មូលដ្ឋានចូលរួមជាទស្សនាទានដល់អង្គភាពគ្រប់គ្រងគោលដៅទេសចរណ៍ (Sub-DMOs)។
កម្មវិធីប្រកួតប្រជែងនេះត្រូវបានធ្វើឡើងដោយមាន៥ដំណាក់កាល៖
ដំណាក់កាលទី១៖ ការប្រកាស និងផ្សព្វផ្សាយការដាក់ពាក្យចូលរួមប្រកួត នឹងចាប់ផ្តើមទទួលពាក្យប្រកួតប្រជែងចាប់ពីថ្ងៃទី១៩ កញ្ញា ២០២២។
ដំណាក់កាលទី២៖ ការជ្រើសរើសក្រុមនិស្សិតដែលមានសក្តានុពល និងប្រកបដោយគុណវុឌ្ឍចូលរួមបន្តក្នុងកិច្ចសំភាសន៍ផ្ទាល់មាត់នៅទីស្តីការក្រសួងទេសចរណ៍ នៅថ្ងៃទី៥ តុលា ២០២២។
ដំណាក់កាលទី៣៖ វគ្គបំប៉ន និងតម្រង់ទិសដល់បេក្ខភាពក្រុមនិស្សិតទាំង៤ក្រុម លើប្រធានបទ «ទេសចរណ៍បែបសហគមន៍» កាលពីថ្ងៃទី១៦ វិច្ឆិកា ២០២២។
ដំណាក់កាលទី៤៖ ទស្សនកិច្ចសិក្សាដោយផ្ទាល់នៅស្រុកបន្ទាយស្រី ខេត្តសៀមរាបរបស់ក្រុមនិស្សិតកាលពីថ្ងៃទី១៧-២១ វិច្ឆិកា ឆ្នាំ២០២២។
ដំណាក់កាលទី៥៖ ការវាយតម្លៃ និងបូកសរុបពិន្ទុតាមរយៈការធ្វើបទបង្ហាញ (Final Pitch) របស់ក្រុមនិស្សិតទាំង៤ក្រុម និងជាវគ្គប្រកាសលទ្ធផល នាពីថ្ងៃទី១០ មករា ២០២៣។
ឯកឧត្ដមអគ្គនាយកនៃក្រសួងទេសចរណ៍រូបនេះក៏បានបង្ហាញការរំពឹងថា កម្មវិធីប្រកួតប្រជែងការរៀបចំ «ផែនការអភិវឌ្ឍន៍គោលដៅទេសចរណ៍គំរូ» នឹងក្លាយជាវេទិកាអប់រំ និងបញ្ជ្រាបការយល់ដឹងជាសាធារណៈដល់សាធារណជន ជាពិសេសនិស្សិតដែលចាប់យកជំនាញទេសចរណ៍ក្នុងការសិក្សាស្វែងយល់ ដោយផ្សារភ្ជាប់ជាមួយនឹងទ្រឹស្តីទៅនឹងការអនុវត្តជាក់ស្តែង ពិសេសទទួលបានបទពិសោធន៍ដោយផ្ទាល់នៅក្នុងការអភិវឌ្ឍន៍ និងគ្រប់គ្រងរៀបចំគោលដៅ និងសហគមន៍ទេសចរណ៍ប្រកបដោយប្រសិទ្ធភាព និងនិរន្តរភាព៕
