សាខាកាកបាទក្រហមកម្ពុជា រាជធានីភ្នំពេញ ចុះសំណេះសំណាលសួរសុខទុក្ខ និងនាំយកអំណោយចែកជូនបងប្អូនអ្នករេីសអេតចាយ នៅទីលានចាក់សំរាមដង្កោ
ភ្នំពេញ៖ នៅព្រឹកថ្ងៃទី២ ខែមករា ឆ្នាំ២០២៣ នៅទីលានចាក់សំរាម ស្ថិតក្នុងភូមិតាឡី សង្កាត់ដង្កោ ខណ្ឌដង្កោ សាខាកាកបាទក្រហមកម្ពុជា រាជធានីភ្នំពេញ ដឹកនាំដោយ លោកជំទាវ ជា សុីណា ឃួង ស្រេង ប្រធានក្រុមការងារសាខា តំណាងឯកឧត្តម ឃួង ស្រេង ប្រធានគណៈកម្មាធិការសាខា បានចុះសំណេះសំណាលសាកសួរសុខទុក្ខ និងនាំយកអំណោយមនុស្សធម៌ទៅចែកជូនដល់បងប្អូនអ្នករេីសអេតចាយ នៅទីលានចាក់សំរាមដង្កោ សរុបចំនួន៣៨០គ្រួសារ ។
មានមតិនាឱកាសនោះ លោកជំទាវ ជា សុីណា បានពាំនាំនូវការផ្តាំផ្ញើសាកសួរសុខទុក្ខពីឯកឧត្តម ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ ជាពិសេសពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់បងប្អូនអ្នករេីសអេតចាយនៅទីលានចាក់សំរាមទាំងអស់ប្រកបដោយសេចក្តីនឹករលឹក ។
លោកជំទាវ បានគូសបញ្ជាក់ថា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា មានការព្រួយបារម្ភ អាណិតស្រលាញ់ និងយកចិត្តទុកដាក់ចំពោះសុខទុក្ខបងប្អូនប្រជាពលរដ្ឋយេីងជានិច្ច ជាពិសេសជនរងគ្រោះ និងងាយរងគ្រោះគ្រប់ប្រភេទ ដោយមិនប្រកាន់ពីនិន្នាការនយោបាយ ជាតិសាសន៍ សាសនា វណ្ណៈ ពណ៌សម្បុរអ្វីទាំងអស់ ពោល ឱ្យតែកន្លែងណាមានការរងគ្រោះ ប្រជាពលរដ្ឋជួបការលំបាក តែងតែមានវត្តមានកាកបាទក្រហមកម្ពុជា ទៅជួយសង្គ្រោះជានិច្ច ។
លោកជំទាវប្រធានក្រុមការងារសាខា ក៏សូមថ្លែងនូវការកោតសរសេីរដល់បងប្អូនអ្នករេីសអេតចាយទាំងអស់ ទោះជាមានជួបការលំបាកក្នុងជីវភាពយ៉ាងណាក្តី ក៏បងប្អូនខិតខំប្រកបរបរដែលសុចរិតដេីម្បីចិញ្ចឹមជីវិត ព្រមទាំងសូមផ្តាំផ្ញេីដល់បងប្អូនយកចិត្តទុកដាក់ជានិច្ចការពារ និងថែរក្សាសុខភាពជាចំបង ជាពិសេសសូមបងប្អូនអញ្ជេីញទៅចាក់វ៉ាក់សាំងដុសជំរុញបង្ការការពារជំងឺកូវីដ១៩ ឱ្យបានគ្រប់ៗគ្នា និងបន្តអនុវត្តវិធានការបង្ការ និងការពារខ្លួនគឺ៣ការពារ និង៣កុំ ឱ្យបានខ្ជាប់ខ្ជួន ។
អំណោយមនុស្សធម៌ដែលបានចែកជូនក្នុង១គ្រួសារៗទទួលបាន៖ អង្ករ២៥គីឡូក្រាម មី១កេស ទឹកត្រី១យួរ ទឹកសុីអុីវ១យួរ ទឹកសុទ្ធឱរ៉ាល់១កេស នំបុ័ងបាក់យ៉ុង២ដេីម ថ្នាំបំបាត់ក្តៅខ្លួន២បន្ទះ និងថវិកាចំនួន៣មុឺនរៀល ។ សូមបញ្ជាក់ថា៖ ក្នុងនោះ នំបុ័ងបាក់យ៉ុង ថ្នាំបំបាត់ក្តៅខ្លួន និងថវិកាចំនួន៣មុឺនរៀលសម្រាប់ក្នុង១គ្រួសារៗ ជាអំណោយរបស់សប្បុរសជនខ្មែររស់នៅប្រទេសអូស្ត្រាលី៕
