ផ្លូវលេខ១៤៦បេ និងលេខ១៤៨ គ្រោងនឹងសម្ពោធបើកឱ្យប្រើប្រាស់ជាផ្លូវការនៅថ្ងៃទី២២ ខែធ្នូ ក្រោមអធិបតីភាពរបស់សម្តេចតេជោ ហ៊ុន សែន

ភ្នំពេញ៖ ផ្លូវលេខ១៤៦បេ និងលេខ១៤៨ ប្រវែងសរុបប្រមាណ​ ៤៣,០២គីឡូម៉ែត្រ គ្រោងនឹងរៀបចំពិធីសម្ពោធបើកឱ្យប្រើប្រាស់ជាផ្លូវការនៅថ្ងៃទី២២ ខែធ្នូ ឆ្នាំ ២០២២ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា

នៅថ្ងៃទី១៣ ខែធ្នូ ឆ្នាំ២០២២ ឯកឧត្តម សួង ហេង រដ្ឋលេខាធិការក្រសួងសាធារណការ និងដឹកជញ្ជូន ទទួលបន្ទុកជាប្រធានគណៈកម្មការត្រៀមរៀបចំពិធីសម្ពោធបើកឱ្យប្រើប្រាស់ជាផ្លូវការផ្លូវលេខ១៤៦បេ និងលេខ១៤៨ បានអញ្ជើញចុះពិនិត្យទីតាំងសម្រាប់រៀបចំកម្មវិធីសម្ពោធបើកឱ្យប្រើប្រាស់ ដឹកនាំដោយឯកឧត្តម យូ ស៊ុនឡុង រដ្ឋមន្រ្តីប្រតិភូអមនាយករដ្ឋមន្រ្តី និងឯកឧត្តម ហ៊ុន ស៊ីថា រដ្ឋមន្រ្តីប្រតិភូអមនាយករដ្ឋមន្រ្តី នាយរងខុទ្ទកាល័យសម្តេចតេជោនាយករដ្ឋមន្រ្តី អភិបាលនៃគណៈខេត្តព្រះសីហនុ កងកម្លាំងសមត្ថកិច្ច និងអាជ្ញាមូលដ្ឋាន និងមន្ត្រីជំនាញពាក់ព័ន្ធផងដែរ។

ក្រោយពីការចុះពិនិត្យទីតាំងជាក់ស្តែងរួចមក នៅសាលប្រជុំសាលាស្រុកព្រៃនប់ ខេត្តព្រះសីហនុ គណៈប្រតិភូខាងលើ បានជួបប្រជុំពិភាក្សាអំពីតួនាទី និងភារកិច្ចទទួលខុសត្រូវរបស់ស្ថាប័នពាក់ព័ន្ធលើបីចំណុចរួមមាន៖ ១) ទីតាំងប្រារព្ធពិធី ២) ការរៀបចំមហាជនចូលរួម និង៣)សន្តិសុខសុវត្ថិភាព។

ជាលទ្ធផល អង្គប្រជុំបានសម្រេចជ្រើសរើសយកទីតាំងប្រារព្ធពិធីឋិតនៅចម្ងាយពីផ្លូវជាតិលេខ៤ ប្រវែង ៥គីឡូម៉ែត្រ ស្ថិតនៅភូមិវាលធំ ឃុំវាលរេញ ស្រុកព្រៃនប់ និងមានចំងាយ២០គីឡូម៉ែត្រពីផ្លូវប្តូរទិសស្ទឹងហាវ។ ក្រសួងសាធារណការ និងដឹកជញ្ជូន ត្រូវចាត់ចែងឈូសឆាយសម្រួលទីតាំងពិធី និងទីតាំងចតរថយន្ត រៀបចំប៉ាណូរូបភាព និងការងារមួយចំនួនទៀត។ អាជ្ញាធរខេត្តនឹងរៀបចំមហាជនចូលរួមប្រមាណ ៣ ០០០ នាក់។ ដោយឡែក ការងារសន្តិសុខសុវត្ថិភាព ត្រូវចាត់ចែងរៀបចំដោយសមត្ថកិច្ច សហការជាមួយអាជ្ញាធរមូលដ្ឋាន។

សូមជម្រាបជូនថា ពិធីសម្ពោធបើកឱ្យប្រើប្រាស់ជាផ្លូវការផ្លូវលេខ១៤៦បេ និងលេខ១៤៨ ប្រវែងសរុបប្រមាណ ៤៣,០២គីឡូម៉ែត្រ ស្ថិតនៅខេត្តព្រះសីហនុ គ្រោងនឹងប្រព្រឹត្តទៅនៅថ្ងៃទី២២ ខែធ្នូ ឆ្នាំ ២០២២ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា៕