មន្ត្រីជាន់ខ្ពស់ក្រសួងបរិស្ថាន៖ កម្ពុជា លើកទឹកចិត្តដល់ការវិនិយោគ លើការផលិតប្លាស្ទិក ដែលធ្វើពីវត្ថុធាតុដើម ជីវៈប្លាស្ទិក
ភ្នំពេញ៖ ឯកឧត្ដម នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានថ្លែងថា កម្ពុជាលើកទឹកចិត្ត ដល់ការវិនិយោគលើការផលិត ប្លាស្ទិក ដែលធ្វើពីវត្ថុធាតុដើម ជីវៈប្លាស្ទិក ដូចជាធ្វើពីអង្ករ និងដំឡូងមីជាដើម ។
ឯកឧត្ដមរដ្ឋលេខាធិការ នេត្រ ភក្ត្រា បានមានប្រសាសន៍ថា ក្នុងអនុក្រឹត្យអំពីការគ្រប់គ្រងប្លាស្ទិក គឺប្រទេសកម្ពុជាហាមឃាត់ មិនឲ្យមានការនាំចូលនូវផលិតផលប្លាស្ទិក ដែលមានកម្រាស់លើសពី ០,០៣មីលីម៉ែត្រទេ ។
ឯកឧត្ដមបន្តថា នៅប្រទេសកម្ពុជា មានសហគ្រាសផលិតប្លាស្ទិក ដែលធ្វើពីសារធាតុជីវៈប្លាស្ទិក នៅខេត្តពោធិ៍សាត់ ដែលបានបំភ្លេចបំពង់បឺត ចាន និងកែវជាដើម ។
ឯកឧត្ដមអ្នកនាំពាក្យ ថ្លែងថា យើងក៏លើកទឹកចិត្តឲ្យមានការកែច្នៃឡើងវិញ នូវប្រភេទប្លាស្ទិក ព្រោះសំណល់នៅក្នុងប្រទេសកម្ពុជាយើង ១ឆ្នាំមានជាង ៤លានតោន ហើយក្នុងមួយថ្ងៃជាង ១ម៉ឺនតោន ដែលក្នុងនោះ ៦០ទៅ៦៥ភាគរយ ជាសំណល់សរីរាង្គ ដោយឡែកប្រមាណជាង ២០ភាគរយ ជាសំណល់ប្លាស្ទិក នៅសល់ប៉ុន្មានជាសំណល់រឹង ។
ឯកឧត្ដម នេត្រ ភក្ត្រា ក៏បានអំពាវនាវឲ្យប្រជាពលរដ្ឋ ចូលរួមក្នុងការកាត់បន្ថយការប្រើប្រាស់ថង់ប្លាស្ទិក និងលើកទឹកចិត្តឲ្យមានការកែច្នៃបន្ថែមទៀត ។ ឯកឧត្ដមថា សំខាន់គឺការប្រើប្រាស់នូវរបស់របរ ដែលមានមេត្រីភាពបរិស្ថានសម្រាប់ ការកាត់បន្ថយការបំពុល ហើយឥឡូវយើងឃើញមានចលនា នៃការផ្លាស់ប្តូរឥរិយាបថ មានការប្រើប្រាស់ដបទឹករួម មានការកែច្នៃផ្សេងផ្សេងៗ និងមានការប្រើប្រាស់នូវវត្ថុមួយចំនួនដែល គេហៅថាមេត្រីបរិស្ថាន កែវទឹក ឬក៏បំពង់បឺតហ្នឹង ដែលគេប្រើប្រាស់ ហើយសំខាន់មួយទៀតគឺយើងកំពុងតែគិតគូរ ទៅលើការគ្រប់គ្រងទៅលើសំណល់ប្លាស្ទិក គេហៅថាផលិតផលប្លាស្ទិក ដែលប្រើប្រាស់ម្ដងបោះចោល ។
ឯកឧត្ដមគូសបញ្ជាក់ថា សំណល់ប្លាស្ទិកនៅលើភពផែនដី របស់យើង គឺមានច្រើនហើយនៅឆ្នាំ២០៥០ បើយើងអត់បានទប់ស្កាត់ឲ្យបានទេ សំណល់ប្លាស្ទិកឡើងរហូតដល់ ៣៤ប៊ីលានតោន ដែលជាបញ្ហាមួយយើងត្រូវដោះស្រាយ ៕
