អគារសិក្សា១ខ្នង មាន៤បន្ទប់ និងបង្គន់អនាម័យ ១ខ្នង៤បន្ទប់ ចំណាយទឹកប្រាក់ជាង ៤ម៉ឺនដុល្លារ ជាអំណោយអង្គការសម្រេចសុបិនកុមារកម្ពុជា ត្រូវបានដាក់សម្ពោធដាក់ឱ្យប្រើប្រាស់
ភ្នំពេញ៖ លោកស្រី រស់ សុផានី អភិបាលរងខេត្តបន្ទាយមានជ័យ តំណាងដ៏ខ្ពង់ខ្ពស់ឯកឧត្តម អ៊ុំ រាត្រី អភិបាលខេត្តបន្ទាយមានជ័យ នាថ្ងៃទី២ ខែធ្នូ ឆ្នាំ២០២២ បានអញ្ជើញជាអធិបតីភាព សម្ភោធដាក់ឱ្យប្រើប្រាស់អគារសិក្សា១ ខ្នង មាន៤បន្ទប់ និងបង្គន់អនាម័យ ១ខ្នង ៤បន្ទប់ នៅសាលាបឋមសិក្សាតាប៉ុន ឃុំទឹកជោរ ស្រុកព្រះនេត្រព្រះ ដែលជាអំណោយ របស់អង្គការសម្រេចសុបិនកុមារកម្ពុជា ។
ពិធីសម្ភោធដាក់ឱ្យប្រើប្រាស់អគារសិក្សានោះដែរក៏មានការចូលរួមពី លោក ម៉ាក ថូម៉ាសជេននី សហស្ថាបនិកសម្រេចសុបិនកុមារកម្ពុជា លោក ជូ ស្មិត និងលោកស្រី ម៉ូនីកា ជាម្ចាស់ជំនួយរបស់អង្គការសម្រេចសុបិនកុមារកម្ពុជា លោក លោកស្រី ប្រធាន អនុប្រធាន មន្ទីរ-អង្គភាព ជុំវិញខេត្ត អភិបាលរងស្រុកព្រះនេត្រព្រះ លោក លោកស្រី មន្ត្រីរាជការ អាជ្ញាធរដែនដី កម្លាំងប្រដាប់អាវុធគ្រប់អង្គភាព – លោកគ្រូ អ្នកគ្រូ អាណាព្យាបាល សិស្សានុសិស្ស ប្រមាណជាង៥០០នាក់។
លោក ម៉ាក ថូម៉ាសជេននី សហស្ថាបនិកសម្រេចសុបិនកុមារកម្ពុជា បានលើកឡើងថា ៖ ក្នុងរយៈពេល២០ឆ្នាំមកនេះ អង្គការបានចូលរួមសាងសង់ អគារសិក្សា នៅប្រទេសកម្ពុជាសរុបចំនួន២០៤ខ្នងមកហើយ ដើម្បីជាការចូលរួមជាមួយរាជរដ្ឋាភិបាលកម្ពុជា លើវិស័យអប់រំ។
ជាមួយនោះលោកក៏បាននបង្ហាញពីអារម្មណ៍រីករាយ នៅពេលឃើញកុមារកម្ពុជា មានភាពរួសរាយរាក់ទាក់ ស្រលាញ់ការសិក្សារៀនសូត្រ មានភាពវៃឆ្លាត។ ក្នុងនាមសហស្ថាបនិកសម្រេចសុបិនកុមារកម្ពុជា លោកសន្យាថានឹងចូលរួមជាមួយរាជរដ្ឋាភិបាលកម្ពុជា លើកកម្ពស់វិស័យអប់រំនៅកម្ពុជា ឱ្យកាន់តែឈានមុខជាលំដាប់។
ថ្លែងនាឱកាសនោះ លោកស្រី រស់ សុផានី ក៏បានសម្តែងនូវការ កោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់មន្ទីរអប់រំ យុវជន និងកីឡាខេត្ត ក៏ដូចជាថ្នាក់ដឹកនាំគ្រប់លំដាប់ថ្នាក់ ជាពិសេសអង្គការសម្រេចសុបិនកុមារកម្ពុជា ដែលបានខិតខំស្វែងរកការគាំទ្រពីសប្បុរសជនក្រៅប្រទេស និងដៃគូពាក់ព័ន្ធក្នុងការជួយអភិវឌ្ឍដល់វិស័យអប់រំ ជាពិសេសក្នុងខេត្តបន្ទាយមានជ័យ។
លោកស្រី អភិបាលរងខេត្ត ក៏បានលើកឡើងទៀតថា ៖ កុមារគ្រប់រូបត្រូវ ទទួលបានសេវាអប់រំកុមារតូច តាមគ្រប់រូបភាព ចូលរៀននៅបឋមសិក្សា មធ្យមសិក្សា និងកម្រិតឧត្តមសិក្សា ព្រមទាំងផ្តល់នូវជម្រើសផ្សេងៗទៀត ដល់កុមារនិងយុវជន ដែលពុំមានលទ្ធភាពក្នុងការសិក្សាឱ្យ ទទួលបានសេវាអប់រំក្រៅប្រព័ន្ធ។ ការសាងសង់អាគារសិក្សានេះ គឺជាការឆ្លើយតបទៅនឹងគោលនយោបាយ យុទ្ធសាស្ត្ររបស់ក្រសួងអប់រំ យុវជន និងកីឡា គឺ ៖ទី១ សមធម៌នៃការចូលរៀន, ទី២ គុណភាព និងប្រសិទ្ធភាពនៃសេវាអប់រំ, ទី៣ ការកសាងសមត្ថភាព និងការអភិវឌ្ឍស្ថាប័ន ។
សូមបញ្ជាក់ផងដែរថា៖ អគារដែលបានដាក់សម្ពោធឱ្យប្រើប្រាស់នេះ ជាអគារសិក្សាទី២២ ដែលអង្គការសម្រេចសុបិនកុមារ បានផ្តល់ជូនសិស្សានុសិស្សក្នុងខេត្តបន្ទាមានជ័យ។ ដោយឡែកអគារ សិក្សា១ខ្នងនៅសាលាបឋមសិក្សាតាប៉ុន មាន៤បន្ទប់ រួមនឹងបន្ទប់ទឹក១ខ្នង មាម៤បន្ទប់ ដែលចំណាយថវិកាសាងសង់សរុបចំនួន ៤៤,៧៩៩ ដុល្លារ៕
