ឯកឧត្តមកិត្តិសេដ្ឋាបណ្ឌិត ជាម យៀប ដឹកនាំកិច្ចប្រជុំពិនិត្យរៀបចំ សេចក្តីស្នើវិសោធនកម្ម បទបញ្ជាផ្ទៃក្នុងរដ្ឋសភា
ភ្នំពេញ៖ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា និងជាប្រធានគណៈកម្មការពិសេសចំពោះកិច្ច នាថ្ងៃទី៣១ ខែតុលា ឆ្នាំ២០២២ បានអញ្ជើញដឹកនាំកិច្ចប្រជុំ ដើម្បីស្តាប់របាយការណ៍របស់ អនុគណៈកម្មការពិសេសចំពោះកិច្ចរៀបចំ សេចក្តីស្នើវិសោធនកម្ម បទបញ្ជាផ្ទៃក្នុងរដ្ឋសភា ប្រការ ២ថ្មី (ពីរ) ប្រការ ៥ថ្មី (ពីរ) ប្រការ ១០ថ្មី (បី) ប្រការ១៦ និងប្រការ ៣៥ថ្មី នៃបទបញ្ជាផ្ទៃក្នុងរដ្ឋសភា នៃព្រះរាជាណាចក្រកម្ពុជា។
កិច្ចប្រជុំនេះមានការអញ្ជើញចូលរួមពីឯកឧត្តម លោកជំទាវ ជាសមាជិក សមាជិកាគណ:កម្មការជំនាញ នៃរដ្ឋសភា និងលោក លោកស្រីជាសមាជិក សមាជិកាគណៈកម្មការពិសេសចំពោះកិច្ច។
ឯកឧត្តម ឈាង វុន ប្រធានគណៈកម្មការទី២ នៃរដ្ឋសភា និងជាអនុប្រធានគណៈកម្មការពិសេសចំពោះកិច្ចរៀបចំសេចក្តីស្នើវិសោធនកម្មបទបញ្ជាផ្ទៃក្នុងរដ្ឋសភា នៃព្រះរាជាណាចក្រកម្ពុជា បានជម្រាបជូនអង្គប្រជុំថា បទបញ្ជាផ្ទៃក្នុងរដ្ឋសភា បានធ្វើឡើងក្នុងគោលបំណងដើម្បីអោយខ្លឹមសារមានសង្គតិភាពនឹងបទប្បញ្ញតិនៃរដ្ឋធម្មនុញ្ញ មាត្រា៨៩ថ្មី(មួយ)និងច្បាប់ធម្មនុញ្ញបន្ថែមសំដៅធានានូវដំណើរការជាប្រក្រតីនៃស្ថាប័នជាតិ មាត្រា៤ថ្មី(មួយ)។ ធានាអោយរដ្ឋសភា ដែលជាស្ថាប័នមានអំណាចនីតិប្បញ្ញត្តិ មានដំណើរការប្រព្រឹត្តទៅជាប្រក្រតីដោយរលូន និងប្រកបដោយនិរន្តរភាពនៅគ្រប់កាលៈទេសៈ ដើម្បីធានា ការពារ និងថែរក្សានូវ សន្តិភាព សន្តិសុខ សង្គម សណ្តាប់ធ្នាប់សាធារណៈ ស្ថិរភាពនយោបាយរបស់ប្រទេសជាតិ។ ធានាបាននូវកាគោរពគោលការណ៍បែងចែកអំណាច លទ្ធិប្រជាធិបតេយ្យ សេរីពហុបក្ស និងរបបរាជានិយមអាស្រ័យរដ្ឋធម្មនុញ្ញ។ កំណត់អំពីបែបបទ និងនីតិវិធីនៃការជ្រើសតាំងរចនាសម្ព័ន្ធដឹកនាំរដ្ឋសភា នៅដើមនីតិកាលនីមួយៗនៃរដ្ឋសភា នៅគ្រប់កាលៈទេសៈ ព្រមទាំងការអញ្ជើញសមាជិករាជរដ្ឋាភិបាល អមដោយឥស្សរជនជាអ្នកជំនាញក្នុងវិស័យណាមួយមកបំភ្លឺរដ្ឋសភា អំពីបញ្ហាដែលមានសារៈសំខាន់ពិសេស និងការធ្វើញ្ញត្តិបន្ទោសរាជរដ្ឋាភិបាល។ ធានាអោយអគ្គលេខាធិការដ្ឋានរដ្ឋសភា ក្នុងការទំនាក់ទំនងការងារផ្សេងៗ ខាងក្រៅរដ្ឋសភាជាមួយក្រសួង ស្ថាប័ននានា និងដៃគូអភិវឌ្ឍន៍នានា ព្រមទាំងការងារការទូតសភាកាន់តែមានប្រសិទ្ធភាព។
ឯកឧត្តម បានបន្តថា សេចក្តីស្នើវិសោធនកម្មបទបញ្ជាផ្ទៃក្នុងរដ្ឋសភា បានប្រជុំពិភាក្សាចប់សព្វ់គ្រប់រួចរាល់អស់ហើយដោយរក្សានៅទម្រង់អត្ថបទដើមទាំងស្រុង។
ឯកឧត្តមកិត្តិសេដ្ឋាបណ្ឌិត ជាម យៀប បានថ្លែងការកោតសរសើរ ជូនចំពោះគណៈកម្មការ ពិសេសចំពោះកិច្ចរៀបចំសេចក្តីស្នើវិសោធនកម្មបទបញ្ជាផ្ទៃក្នុងរដ្ឋសភា និងសមាជិកសមាជិកាទាំងអស់ដែលបានខិតខំយកអស់កម្លាំងកាយចិត្តក្នុងការជួយរៀបចំសេចក្តីស្នើវិសោធនកម្មបទបញ្ជាផ្ទៃក្នុងរដ្ឋសភា នៃព្រះរាជាណាចក្រកម្ពុជា មានលក្ខណៈស្របតាមនីតិប្បញ្ញត្តិ និងស្របតាមរដ្ឋធម្មនុញ្ញនៃព្រះរាជាណាចក្រកម្ពុជា។
ឯកឧត្តម បានបន្តថា ឯកឧត្តម នឹងដាក់សេចក្តីស្នើវិសោធនកម្មបទបញ្ជាផ្ទៃក្នុងរដ្ឋសភា ជូនគណៈកម្មាធិការអចិន្ត្រៃយ៍ពិនិត្យសម្រេចនាពេលខាងមុខ ៕
