លោកជំទាវ ឡោក ខេង អញ្ជើញសំណេះសំណាលជាមួយយុវជន និងយុវនារី ព្រមទាំងស្ត្រី នៅភូមិទាំង៦ ក្នុងសង្កាត់ច្បារអំពៅទី២
ភ្នំពេញ៖ លោកជំទាវ ឡោក ខេង តំណាងរាស្ត្រមណ្ឌលរាជធានីភ្នំពេញ និងជាប្រធានគណៈកម្មការទី៨ នៃរដ្ឋសភា នាថ្ងៃ១៧ ខែតុលា ឆ្នាំ២០២២ បានអញ្ជើញចុះជួបសំណេះសំណាលជាមួយយុវជន និងយុវនារី ព្រមទាំងស្រ្តី នៅភូមិទាំង៦ក្នុងសង្កាត់ច្បារអំពៅទី២ សរុបចំនួន ២០៦នាក់ នៅសាលប្រជុំសង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។
ក្នុងឱកាសនោះ លោកជំទាវ ឡោក ខេង បានមានប្រសាសន៍ រម្លឹកពីអតីតកាលនៃកិច្ចខិតខំប្រឹងប្រែងរួមគ្នាដើម្បីការពារអាយុជីវិតប្រជាជនដ៏សែនលំបាកវេទនា ក្នុងនោះរួមមាន៖
-របបប្រល័យពូជសាសន៍ប៉ុលពត
-សម័យកូវីដ-១៩ នៃរោគរាតត្បាតសកល ដែលម្នាក់ៗបានឆ្លងកាត់មិនអាចបំភ្លេចបានជាដាច់ខាត ការប្តូរអាយុជីវិតដើម្បីជាតិ និងប្រជាជនគ្រប់ដំណាក់កាល “យើងអាចភ្លេចកូវីដ តែកូវីដអត់ភ្លេចយើងទេ”។
លោកជំទាវបានលើកឡើងផងដែរថា បច្ចុប្បន្ននេះប្រទេសយើងមានការអភិវឌ្ឍលើគ្រប់វិស័យក្នុងរយ:ពេល២៣ឆ្នាំនៃសន្តិភាពក្រោមនយោបាយឈ្នះៗ និងការទទួលបាននូវអត្ថប្រយោជន៍ជាច្រើនដែលជាគោលនយោបាយរាជរដ្ឋាភិបាលលើការគាំទ្រប្រជាជនក្រីក្រ ដែលផ្តល់អោយនូវមូលនិធិសមធម៌ ស្ត្រីក្រីក្រមានផ្ទៃពោះ និងកុមារក្រោមពីរឆ្នាំពេលចាក់វ៉ាក់សាំង ការឧបត្ថម្ភសាច់ប្រាក់ប្រចាំខែអ្នកប៉ះពាល់ពីកូវីដ អ្នកស្លាប់ ជាពិសេសចាប់ពីខែតុលាឆ្នាំ២០២២ ទទួលបានកម្មវិធីគ្រួសារស្តីពីហានិភ័យ នៃអតិផរណា និងរបបសន្តិសុខសង្គមចំពោះមន្ត្រីរាជការ និវត្តជន អតីតយុទ្ធជន កម្មករ កម្មការិនី បុគ្គលិកវិស័យឯកជន។ ជាមួយនេះយុវជន សិស្ស និសិ្សត ទទួលបានអាហារូបករណ៍ ទាំងក្នុង និងក្រៅប្រទេសទៅតាមសមត្ថភាព។
លោកជំទាវតំណាងរាស្ត្រ បានបញ្ជាក់ផងដែរថា ឧត្តមភាព កិត្យានុភាព ប្រទេសកម្ពុជាលើឆាកអន្តរជាតិជាងពីរទសវត្សរ៍ នៃកំណើនសេដ្ឋកិច្ច ៧% ជាកូនខ្លាសេដ្ឋកិច្ចក្នុងអាស៊ាន និងពីប្រទេសមានសង្គ្រាមរ៉ាំរ៉ៃជាង៥០០ឆ្នាំ មកមានសន្តិភាពពេញលេញ និងបានជួយថែរក្សាសន្តិភាពពិភពលោកតាមរយ:ទាហ៊ានមួកខៀវ UN ការជួយសង្គ្រោះប្រជាជនច្រើនសញ្ជាតិក្នុងកប៉ាល់អាំស្តែដាំពីកូវីដ-១៩ -សម្តេចអគ្គមហាសេនាបតីតេជោ ហ៊ុន សែន ជាបុរសសង្ហាដើរបញ្ច្រាស់ទិស -ជាម្ចាស់ផ្ទះក្នុង១០០ឆ្នាំម្តងនៃកិច្ចប្រជុំកំពូលអាស៊ី-អឺរុប លើកទី១៣ នៃរាជរដ្ឋាភិបាល និងសភា (ASEM និង ASEP) -ជាប្រធានប្តូរវេនអាស៊ាន និងសហប្រធានកិច្ចប្រជុំកំពូលអាស៊ាន អាមេរិក និងកិច្ចប្រជុំពាក់ព័ន្ធនានា -ប្រធានកិច្ចប្រជុំកំពូលអាស៊ានលើកទី៤០ និងទី៤១ នាថ្ងៃទី១០ ដល់ថ្ងៃទី១៣ ខែវិច្ឆិកា ឆ្នាំ២០២២ ខាងមុខ -ជាម្ចាស់ផ្ទះនៃការប្រកួតកីឡាស៊ីហ្គេមSEA GAME លើកទី៣២ នាថ្ងៃទី៥ ខែឧសភា ឆ្នាំ២០២៣។
លោកជំទាវ ឡោក ខេង ក៏បានលើកឡើងពីការប្តេជ្ញាចិត្ត រួមគ្នាលើគោលនយោបាយរាជរដ្ឋាភិបាល “មនុស្ស ផ្លូវ ទឹក ភ្លើង” ដើម្បីចូលរួមដឹកនាំ និងអភិវឌ្ឍន៍ប្រទេសជាតិ ពិសេសសម្រេចអោយបានពីប្រទេសមានចំណូលមធ្យមកំរិតទាប ទៅជាប្រទេសមានចំណូលមធ្យមកំរិតខ្ពស់នៅឆ្នាំ២០៣០ និងជាប្រទេសចំណូលខ្ពស់នូវឆ្នាំ២០៥០ ដូច្នេះយុវជន យុវនារី ត្រូវខិតខំពង្រឹងចំណេះដឹង ជំនាញ វិជ្ជាជីវ: ជាពិសេសគឺតាមអោយទាន់នូវវិទ្យាសាស្ត្របច្ចេកវិទ្យាឧស្សាហកម្ម៤.០ ចាប់អោយជាប់នូវកាលានុវត្តភាពដ៏ធំធេងនៃបច្ចេកវិទ្យាឌីជីថល ដើម្បីសេដ្ឋកិច្ចសង្គមឌីជីថលកម្ពុជា ៕
